Hangangaa mengkoruke i topoparenta
13
1 Ope-ope tauna hangangaa mengkoru i topoparenta. Lawi bara ara topoparenta au bara molambi kuasa hangko i Pue Ala. Hai topoparenta au ara napakanotomi Pue Ala. 2 Mewali, tauna au moewa topoparenta mosapuakahe apa au napakanoto Pue Ala. Tauna au nodo babehianda, batenda rahuku! 3 Ane maroa babehianta, barake langa i topoparenta. Au langa, batenda pea tauna au kadake babehianda. Mewali, hangangaa mobabehike au maroa bona ratoiake hai datike langa i topoparenta. 4 Lawi topoparenta iti, sarungkorona Pue Ala au mobago bona maroa katuwonta. Agaiana ane mobabehike dake, batena langake i topoparenta, lawi ara kuasanda mehuku. Lawi topoparenta iti sarungkoroNa worihe Pue Ala au mopabukei pehukuna Pue Ala i tauna au kadake. 5 Ido hai hangangaa mengkoruke i topoparenta. Mengkoruke i topoparenta bona datike rahuku. Agaiana melumbu hangko inditi, hangangaa tababehi nodo, lawi taisami i lalunta, itimi au hintoto tababehi.6 Idomi hai hangangaa mobaiarike asele bona topoparenta peisa mampopolumao bagonda au napahaleangiahe Pue Ala. 7 Nibaiari ope-ope i tauna apa au hintoto nibaiari. Nibaiari asele ba pobaiari au ntanina i topoparenta. Mengkorukau i tauna au hintoto rapengkorui. Bila tauna au hintoto rabila.
Ahi mopabukei ope-ope Aturana Musa
8 Ineeke moinda i hangka ranganta, agaiana hangangaa mombepokaahirike. Lawi tauna au mampokaahi hangka rangana, mampeulaimohe ope-ope Aturana Pue Ala au napahawe Musa. 9 Lawi i lalu Aturana Pue Ala ara hawa au manguli node, “Inee mebualosi, inee mepapate, inee manangka, inee nipokaelu anu-anuna rangami.” Ope-ope hawa ide hai hawa au ntanina, tapabukeimi ane mampeulaike hawa au hampaka ide, “Nipokaahi hangka rangami nodo pampokaahimi watami haduduami.” 10 Ane maahike i hangka ranganta, barapoke mobabehi au kadake irihira. Mewali ane maahike, tapabukeimi Aturana Pue Ala.
11 Ope-ope iti hangangaa tababehi, lawi taisa mpuu apa au hintoto tababehi i tempo ide: hangangaa mearomoke hangko i kaletanta. Lawi mepongka hangko i kanipoinalaina Pue, kahungku-hungkuami kamaiana Pue Yesu au karombelana. Ina maike Nahorema hangko i dunia au kadake ide. 12 Tempo kaindi ide ina liumi, hai ina mabaami. Ido hai hangangaa tatende babehia au makaindi hai tapake parewa pombeala au mewangka. 13 Nibabehi babehia au hintoto i kabaakana. Ineekau mosusa-susa hai malangu-langu. I babehia tobalilo hai towawine, ineekau mobabehi babehia au sala ba au moula peundeana lalunta au kadake. Ineekau mobungka-bungka ba mahina. 14 Hangangaa tapeulai babehiana Pue Yesu Kerisitu i lalu katuwonta, inee tapeulai peundeana lalunta au kadake.