پرڀُو يسُوع رو بادشاھ آݪِي ڪار يروشلم ۾ جاوڻ
11
جڏي پرڀُو يسُوع ھانَ اُوئي را چيلا يروشلم شھر رَي نيڙا زيتُون رَي جبل تي بيت فِگي گون ھانَ بيت عِنيا گون رَي نيڙا پُگا، تو پرڀُو يسُوع آپرَي چيلون ۾ ٻيئون نَي ميليا 2 ھانَ ڪھيو ڪہ، ”ݾوملَي گون ۾ جائو۔ جڏي ٿي اوٿ پُگشو، تو اوٿ ھيڪ گڏيو ٻاڌوڙو ڏيکشو جڪَي تي اَڃون توڻي ڪو ڀِي ݾَوار ڪونھي ھويو۔ او کولي مھَي ڪڍي لي آئو۔ 3 جي ڪُڻ ٿون ݾون پُوڇَي ڪہ، ’اَي ڪِي ڪرو ھو؟‘ تو ڪھيا ڪہ، ’پرڀُو نَي اِيئي رِي ضرُورت ھَي۔‘ تو اُوئيج ٽيم ڏي ميلشَي۔“4 پَڇي او ٻيئي چيلا گيا ھانَ اُوئون گڏئَي نَي گھٽِي تي ٻاڌوڙو ڏيٺو۔ جڏي او کولڻ لاگا، 5 تو اوٿ اُڀوڙَي مِنکون پُوڇو ڪہ، ”اَي ڪِي ڪرو ھو؟ اِيئي نَي ڪيئون کولو ھو؟“ 6 تو اُوئون اوج ڪھيو جون پرڀُو يسُوع اُوئون نَي ڪھيو ھتو۔ پَڇي اُوئون گڏيو لي جاوڻ ڏينو۔ 7 پَڇي او گڏئَي نَي پرڀُو يسُوع ڪڍي لي آيا ھانَ آپرا گاڀا اُوئي ماٿَي ڍاڙيا۔ پَڇي پرڀُو يسُوع اُوئي تي ݾَوار ھويو۔ 8 تموم گھڻَي مِنکون اُوئي رِي عِزت رَي ݾارُو آپرا گاڀا مارگ تي بِڇايا ھانَ ٻنِي ݾون بَڻون رَي ٽاݪَي باڍي مارگ تي بِڇاوتا گيا۔ 9 جڪو مِنک پرڀُو يسُوع آگھي لاري ھتا، او زور ݾون نارا ھڻڻ لاگا ڪہ،
”ايشوَر رِي جَئي جَئي ڪار،
ڌن ھَي او جڪو پرميشوَر رَي نون ݾون آوَي ھَي۔
10 پرميشوَر رِي برڪت اِيئي بادشاھ تي ھَي
جڪو آپرَي ڏاڏَي دائُود رِي جگھا تي بادشاھي ڪرشَي۔
ݾُرگ ۾ ايشوَر رِي بڏائي ھووَي۔“
11 پرڀُو يسُوع يروشلم شھر ۾ پُگو ھانَ او ايشوَر رَي گھر ۾ گيو ھانَ اوٿ چارئي پاݾَي ھر ھيڪ شئي نَي ڏيٺِي۔ پَڇي او آپرَي ٻارھون چيلون ڀيڙو بيت عِنيا گون ڏيݾا گيو ڪيونڪہ شام ھوئڻ آݪِي ھتِي۔
پرڀُو يسُوع رو انجير رَي بَڻ نَي پِٽڻ
12 ٻيجَي ڏِن جڏي پرڀُو يسُوع بيت عِنيا گون ݾون پاڇو آوتو پڙيو، تو مارگ ۾ اُوئي نَي بُوک لاگِي۔ 13 اُوئي اݪگِي ڀون ݾون انجير رو ݾائو بَڻ ڏيٺو، تو او اُوئي ڏيݾا ڦل جوئڻ گيو۔ جڏي او اُوئي رَي نيڙو گيو، تو اُوئي ۾ پونون ݾون ٽاݪ ڪئين ڪونھي ھتو، ڪيونڪہ انجير رِي مُند ڪونھي ھتِي۔ 14 پرڀُو يسُوع اُوئي بَڻ نَي ڪھيو ڪہ، ”آج ݾون پَڇي ٿَي ۾ ڪڏي ڀِي ڦل ڪونھي لاگَي۔“ اَي بات اُوئي رَي چيلون ڀِي ݾُڻِي۔
ايشوَر رَي گھر ݾون واپاري ڪاڍڻ
15 جڏي پرڀُو يسُوع ھانَ اُوئي را چيلا يروشلم ۾ آيا، تو او ايشوَر رَي گھر ۾ گيو۔ پَڇي او اُوئون مِنکون نَي ٻاھر ڪاڍڻ لاگو جڪو اوٿ ڪاروبار ڪرتا پڙيا۔ اُوئي رُپيا مٽاوڻ آݪون را ٽيبل ھانَ ڪٻُوتر بيچڻ آݪون را ݾندل اُونڌا ڪري ڇوڙيا 16 ھانَ جڪو مِنک ايشوَر رَي گھر ݾون سيمون لي آوتا ھانَ لي جاوتا پڙيا اُوئون نَي ڀِي پاليا۔ 17 پَڇي اُوئي مِنکون نَي ݾيکائي ڪھيو ڪہ، ”ڪِي شاستر ۾ اِيئون ڪونھي لِکيوڙو ڪہ،
’مھارو گھر ݾجَي قومون رَي ݾارُو پراٿنا رو گھر ھوشَي‘
پڻ ٿون اِيئي نَي ڌاڙيلون رو اَڏو ٺائي ڇوڙيو ھَي۔“
18 اِيئي تي ايشوَر را موٽا پُوجاري ھانَ ڌرمي گُرو پرڀُو يسُوع نَي مارڻ رِي ڪوشش ڪرڻ لاگا، پڻ او مِنکون ݾون ٻيئاجتا ڪيونڪہ مِنک اُوئي رَي باتون تي حيرون ھتا۔
19 جڏي شام ھوتِي، تو پرڀُو يسُوع ھانَ اُوئي را چيلا شھر ݾون ٻاھر جاوتا۔
ݾُوڪڙَي انجير رَي بَڻ ݾون سبق
20 ٻيجَي ڏِن ݾاڪݪي تارھي جڏي او اوٿ ݾون لنگھيا، تو اُوئون انجير رَي بَڻ نَي ݾُوڪوڙو ڏيٺو۔ 21 پطرس نَي پرڀُو يسُوع رِي ڪھيوڙِي او بات ياد آئِي، تو اُوئي ڪھيو ڪہ، ”گُرو جِي، جوئو، جڪَي انجير رَي بَڻ نَي ٿون پِٽيو ھتو، او ݾُوڪو رو۔“ 22 پرڀُو يسُوع اُوئون نَي بݪتِي ڏينِي ڪہ، ”ٿي ايشوَر تي وِشواس راکو۔ 23 ھُون ٿونَي ݾاچِي ڪونھ ھون ڪہ جي ڪُڻ آپرَي من ۾ شَڪ نِي ڪرَي ھانَ پڪو وِشواس راکشَي، تو جي او اِيئي جبل نَي ڪشَي ڪہ آپرِي جگھا ݾون اُکڙي جائي ݾمُوندر ۾ کِر، تو اَي ھوئي جاشَي۔ 24 اِيئي رَي ڪري ھُون ٿونَي ڪونھ ھون ڪہ جڪو ڪئين ٿي پراٿنا ۾ مونگشو ھانَ وِشواس راکشو، تو او ٿونَي مِلي جاشَي۔ 25 جڏي ٿي پراٿنا رَي ݾارُو اُٺو ھو ھانَ جي ٿون ݾون ڪو ريݾاجوڙو ھَي، تو اُوئي نَي معاف ڪرو، اِيئي نمُونَي ٿونرو آڪاشِي پِتا ٿونرا ڏوھ معاف ڪرشَي۔“ 26 [جي ٿي اُوئي نَي معاف ڪونھي ڪرو، تو ٿونرو آڪاشِي پِتا ڀِي ٿونرا پاپ معاف ڪونھي ڪرَي۔]
پرڀُو يسُوع رَي اِختيار رَي بارَي ۾ سوال
27 پَڇي جڏي او يروشلم شھر ۾ آيا ھانَ پرڀُو يسُوع ايشوَر رَي گھر رَي اوڱڻَي ۾ ڦِرتو پڙيو، تو ايشوَر را موٽا پُوجاري، ڌرمي گُرو ھانَ يھُودي اَگووڻ اُوئي ڪڍي آيا۔ 28 او اُوئي ݾون پُوڇڻ لاگا ڪہ، ”تُو اَي ڪوم ڪيرَي اِختيار ݾون ڪرَي ھَي؟ ٿنَي اَي اِختيار ڪَي ڏينو ھَي؟“ 29 پرڀُو يسُوع اُوئون نَي ڪھيو ڪہ، ”ھُون ڀِي ٿون ݾون ھيڪ سوال پُوڇون ھون۔ جي ٿون مھنَي اِيئي رِي بݪتِي ڏينِي، تو پَڇي ھُون ڀِي ٿونَي ݾُڻائين ڪہ ھُون اَي ڪوم ڪيرَي اِختيار ݾون ڪرون ھون۔ 30 مھنَي ݾُڻائو، يُوحنا ايشوَر رَي طرفون پويتر سِنون ڏيتو جون اِنسون رَي طرفون؟“ 31 اِيئي تي او آپت ۾ ڪيوَڻ لاگا ڪہ، ”جي آپي ڪونھ ڪہ ايشوَر رَي طرفون، تو پَڇي او آپون نَي ڪشَي ڪہ ٿون اُوئي تي وِشواس ڪيئون ڪونھي راکيو؟ 32 ھانَ جي آپون ڪونھ ڪہ اِنسون رَي طرفون، تو پَڇي آپڻو ڪِي ھوشَي۔“ او مِنکون ݾون ٻيئاجتا، ڪيونڪہ مِنک يُوحنا نَي نبِي ݾمجھتا۔ 33 اِيئي رَي ڪري اُوئون پرڀُو يسُوع نَي بݪتِي ڏينِي ڪہ، ”مھونَي خبر ڪونھي۔“ تو پرڀُو يسُوع اُوئون نَي ڪھيو ڪہ، ”تو ھُون ڀِي ٿونَي ڪونھي ݾُڻائُون ڪہ ھُون اَي ڪوم ڪيرَي اِختيار ݾون ڪرون ھون۔“