طلاق نِي ڏيوَڻ رَي بارَي ۾ ݾيکاوڻ
10
پَڇي پرڀُو يسُوع اوٿ ݾون بَئير ھوئي يردن دريا رَي پيلوڙَي پاݾَي يھُوديا صُوبَي رَي علائقَي ۾ گيو۔ اوٿ ڀِي تموم گھڻا مِنک اُوئي ڪڍي آئي ڀيڙا ھويا ھانَ پرڀُو يسُوع اَگي آݪِي ڪار اُوئون نَي ݾيکاوڻ لاگو۔ 2 تو ڪئينڪہ فريسي مِنک پرڀُو يسُوع رو آزمُوتو ليوَڻ رَي ݾارُو اُوئي ڪڍي آيا ھانَ پُوڇو ڪہ، ”ڪِي اَي جائز ھَي ڪہ ڪو ڀِي مِنک آپرِي لُگائِي نَي طلاق ڏَي؟“ 3 پرڀُو يسُوع اُوئون ݾون پُوڇو ڪہ، ”اِيئي رَي بارَي ۾ ٿونَي مُوسيٰ ڪھڙو حُڪم ڏينو ھَي؟“ 4 اُوئون ڪھيو ڪہ، ”مُوسيٰ تو موڪل ڏينِي ھَي ڪہ آڏمي آپرِي لُگائِي نَي طلاق رو ڪاگڏ ڏي ڇوڙي ݾگھَي ھَي۔“ 5 پڻ پرڀُو يسُوع اُوئون نَي ڪھيو ڪہ، ”مُوسيٰ اَي حُڪم ٿونرَي ڪاٺَي من رَي ڪري لِکيو ھتو۔ 6 پڻ ايشوَر اِنسون نَي شرُوع ݾون نَر ھانَ نارِي ٺاھيا۔ 7 ’اِيئي رَي ڪري آڏمي آپرَي ما ٻاپ نَي ڇوڙي آپرِي لُگائِي ڀيڙو ريشَي۔‘ 8 پَڇي او ٻيئي ھيڪ تن ھوشَي۔ اِيئي رَي ڪري او ٻي نا، پڻ ھيڪ ھَي 9 ڪيونڪہ جڪون نَي ايشوَر جوڙيا ھَي اِنسون اُوئون نَي ڌار نِي ڪرَي۔“10 جڏي او گھري ھتا، تو چيلون اُوئي بات رَي بارَي ۾ پرڀُو يسُوع ݾون پُوڇو۔ 11 تو اُوئي اُوئون نَي بݪتِي ڏينِي ڪہ، ”جڪو ڀِي آپرِي لُگائِي نَي ڇوڙي ٻيجِي لُگائِي ݾون بيئان ڪرَي ھَي، تو او زنا ڪرَي ھَي 12 ھانَ جڪو لُگائِي آپرَي ڌڻِي نَي ڇوڙي ٻيجو ڌڻِي ڪرَي ھَي، تو او ڀِي زنا ڪرَي ھَي۔“
پرڀُو يسُوع رو ٻاݪون نَي برڪت ڏيوَڻ
13 ھيڪ ڏِن مِنک آپرا ٻاݪيا پرڀُو يسُوع ڪڍي لي آيا ڪہ او اُوئون ماٿَي ھاٿ راکي برڪت ڏَي پڻ چيلون اُوئون نَي دڙڪا ڏينا۔ 14 اَي جوئي پرڀُو يسُوع چيلون تي ڪاوڙيو ھانَ ڪھيو ڪہ، ”ٻاݪون نَي مھَي ڪڍي آوڻ ڏيئو ھانَ اُوئون نَي پالو نِي، ڪيونڪہ ايشوَر رِي بادشاھي اُوئون رَي ݾارُو ھَي جڪو اِيئون ٻاݪون آݪِي ڪار ھَي۔ 15 ھُون ٿونَي ݾاچِي ڪونھ ھون ڪہ جترِي توڻي ڪو ڀِي بدليجي ايشوَر رِي بادشاھي نَي ٻاݪون آݪِي ڪار منَي ڪونھي، تو او ايشوَر رِي بادشاھي ۾ ڪڏي ڀِي جائي ڪونھي ݾگھَي۔“ 16 پَڇي پرڀُو يسُوع ٻاݪون نَي آپرَي کوڙَي ۾ ليئا ھانَ اُوئون ماٿَي ھاٿ راکي برڪت ڏينِي۔
شاھُوڪار ھانَ ايشوَر رِي بادشاھي
17 ھيڪ ڏِن جڏي پرڀُو يسُوع مارگ جھالي جاوتو پڙيو، تو ھيڪ مِنک ناݾتو اُوئي ڪڍي آيو ھانَ اُوئي آگھي گوڏا کوڙي پُوڇڻ لاگو ڪہ، ”گُرو جِي، ٿي تو نيڪ ھو۔ مھنَي ݾُڻائو ڪہ ھُون ڪِي ڪرون ڪہ ايشوَر مھنَي اَمر جيوَن ڏَي۔“ 18 پرڀُو يسُوع اُوئي نَي ڪھيو ڪہ، ”تُو مھنَي نيڪ ڪيئون ڪَي ھَي؟ ايشوَر ݾون ٽاݪ ٻيجو ڪو ڀِي نيڪ ڪونھي۔ 19 ٿنَي ايشوَر رَي حُڪمون رِي خبر تو ھَي ڪہ، خُون نِي ڪر، زنا نِي ڪر، چورِي نِي ڪر، ڪُوڙِي ݾاک نِي ڀر، ٺَگِي نِي ڪر ھانَ آپرَي ما ٻاپ رِي عِزت ڪر۔“ 20 اِيئي تي اُوئي ڪھيو ڪہ، ”گُرو جِي، ھُون تو اِيئون ݾجون حُڪمون تي ٻاݪڪپڻ ݾون بيتو آئُون پڙيو۔“ 21 اِيئي تي پرڀُو يسُوع اُوئي ڏيݾا پريم ݾون جويو ھانَ اُوئي نَي ڪھيو ڪہ، ”اَڃون ڀِي ٿَي ۾ ھيڪِي بات رِي گھٽتائِي ھَي۔ تُو جا ھانَ آپرِي ݾجِي ملڪيت بيچي اُوئي را پَشا غريبون ۾ بِݪا، تو ٿنَي آڪاش ۾ خزونو ملشَي ھانَ پَڇي آئي مھارَي لاري بَي۔“ 22 اَي بات ݾُڻي اُوئي مِنک رو مونڏو اُتري گيو ھانَ پريشون ھوئي بُوئو گيو، ڪيونڪہ او موٽو شاھُوڪار ھتو۔ 23 پَڇي پرڀُو يسُوع چوڌاري جوئي آپرَي چيلون نَي ڪھيو ڪہ، ”شاھُوڪار رو ايشوَر رِي بادشاھي ۾ جاوڻ تموم گھڻو ڏُکيو ھَي۔“ 24 چيلا پرڀُو يسُوع رِي اَي بات ݾُڻي حيرون ھويا۔ اِيئي رَي ڪري پرڀُو يسُوع ڀڙي اُوئون نَي ڪھيو ڪہ، ”اي ٻاݪون، ايشوَر رِي بادشاھي ۾ جاوڻ تموم گھڻو ڏُکيو ھَي۔ 25 اُونٺ رو ݾُئِي رَي ناڪَي ۾ لنگھڻ تو ڏُکيو ھَي، پڻ شاھُوڪار مِنک رو ايشوَر رِي بادشاھي ۾ جاوڻ اُوئي ݾون ڀِي وڌيڪ ڏُکيو ھَي۔“ 26 جڏي چيلون اَي ݾُڻيو، تو او تموم گھڻا حيرون ھويا ھانَ ڪيوَڻ لاگا ڪہ، ”تو پَڇي ڪينَي ڀِي مُگتي ڪونھي ملَي۔“ 27 پرڀُو يسُوع اُوئون ڏيݾا ڌھيون ݾون جوئي ڪھيو ڪہ، ”جڪو ڪوم اِنسون ݾون ڪونھي ھوتا، او ايشوَر ڪري ݾگھَي ھَي ڪيونڪہ ايشوَر ݾجو ڪئين ڪري ݾگھَي ھَي۔“ 28 تو پطرس ڪھيو ڪہ، ”جوئو، مھون آپرو ݾجو ڪئين ڇوڙي ھانَ ٿونرا چيلا ھوئي ٿون لاري بون پڙيا۔“ 29 پرڀُو يسُوع ڪھيو ڪہ، ”ھُون ٿونَي ݾاچِي ڪونھ ھون ڪہ جڪو ڀِي مھارَي ڪري ھانَ خُوشِي رِي خبر رَي ڪري، آپرو گھر، ڀائي، ٻينون، ما ٻاپ جون آپرا اولاد ھانَ ٻنِي ٻارو ڇوڙَي ھَي، 30 جي اُوئي تي ظُلم ڀِي ھووَي، تو اُوئي نَي نِي رُگو اِيئي جگت ۾ ݾئو گُھمرا گھر، ڀائي ٻينون، ما ٻاپ، اولاد ھانَ ٻنِي ٻارو ملشَي، پڻ آوڻ آݪَي جگت ۾ اَمر جيوَن ڀِي ملشَي۔ 31 تموم گھڻا مِنک جڪو ھڻون آگھي ھَي، او لاري ھوشَي ھانَ جڪو لاري ھَي او آگھي ھوشَي۔“
پرڀُو يسُوع رِي تيجو گُھمرو آپرِي موت رِي اگڪٿِي
32 جڏي پرڀُو يسُوع ھانَ اُوئي را چيلا يروشلم شھر ڏيݾا جاوتا پڙيا، تو او اُوئون آگھي جاوتو پڙيو۔ چيلا حيرون ھتا ھانَ جڪو مِنک لاري ھتا، او ٻيئاجڻ لاگا۔ پَڇي پرڀُو يسُوع آپرَي ٻارھون چيلون نَي ڌار لي جائي اُوئون باتون رَي بارَي ۾ ݾُڻايو جڪو ھوئڻ آݪَي ھتَي ڪہ، 33 ”ݾُڻو، آپي يروشلم ڏيݾا ھالون پڙيا جيٿ مِنک مھَي مُنش پُتر نَي، ايشوَر رَي موٽَي پُوجاريون ھانَ ڌرمي گُروئون رَي حوالي ڪرشَي۔ او مھارِي موت رو فيصلو ڪرشَي۔ پَڇي او مھنَي ٻيجَي قومون رَي حوالي ڪرشَي۔ 34 مِنک مھَي تي ٺٺولَي ڪرشَي ھانَ مھَي تي ٿُوڪشَي۔ او مھنَي چاٻڪون ھڻي ماري ڇوڙشَي، پڻ ھُون تيجَي ڏِن جيتو ھوئي جائين۔“
يعقُوب ھانَ يُوحنا رِي مِنٿ
35 پَڇي زبدي را ٻيئي ڏيڪرا يعقُوب ھانَ يُوحنا پرڀُو يسُوع ڪڍي آيا ھانَ مِنٿ ڪري ڪھيو ڪہ، ”گُرو جِي، مھورِي مرضِي ھَي ڪہ مھي ٿون ݾون جڪو ڪئين مونگو، ٿي او مھورَي ݾارُو ڪرو۔“ 36 پرڀُو يسُوع اُوئون ݾون پُوڇو ڪہ، ”ٿونرِي ڪھڙِي مرضِي ھَي ڪہ ھُون ٿونرَي ݾارُو ڪِي ڪرون؟“ 37 اُوئون ڪھيو ڪہ، ”جڏي ٿي موٽِي مھما ݾون بادشاھي ڪرو، تو مھون ۾ ھيڪ ٿونرَي ݾاجَي ھانَ ٻيجو کاٻَي پاݾَي ٻيݾَي۔“ 38 پرڀُو يسُوع اُوئون نَي ڪھيو ڪہ، ”ٿونَي خبر ڪونھي ڪہ ٿي ڪِي مونگو پڙيا۔ ڪِي ٿي ڏُکون رو او پيالو پيئي ݾگھو ھو جڪو ھُون پيئڻ آݪو ھون، ڪِي ٿي او پويتر سِنون لي ݾگھشو جڪو مھنَي ليوَڻو ھَي؟“ 39 اُوئون بݪتِي ڏينِي ڪہ، ”ھاوي، مھي اِيئون ڪري ݾگھون ھون۔“ پرڀُو يسُوع اُوئون نَي ڪھيو ڪہ، ”ݾاچيلي، جڪو پيالو ھُون پيئڻ آݪو ھون، او ٿي پيشو ھانَ جڪو پويتر سِنون ھُون ليوَڻ آݪو ھون او ٿي ليشو۔ 40 پڻ ڪينَي آپرَي ݾاجَي جون کاٻَي پاݾَي ٻيݾاڙڻ مھارو ڪوم ڪونھي۔ او جگھائون اُوئون رَي ݾارُو ھَي جڪون رَي ݾارُو ٺاھيوڙَي ھَي۔“ 41 جڏي باقي ڏَݾون چيلون يعقُوب ھانَ يُوحنا رِي اَي بات ݾُڻِي، تو اُوئون تي ڪاوڙيا۔ 42 پڻ پرڀُو يسُوع اُوئون ݾجون نَي ھيلو ڪري ڪھيو ڪہ، ”ٿونَي خبر ھَي ڪہ ٻيجِي قوم را اَگووڻ اُوئون تي حُڪم ھلاوَي ھَي ھانَ اُوئون اَگووڻون تي اُوئون رَي موٽَي وزيرون رو اِختيار ھَي۔ 43 پڻ ٿون ۾ اِيئون نِي ھوئڻ کپَي۔ ٿون ۾ ڪيرِي موٽَي ھوئڻ رِي مرضِي ھووَي، تو او ݾجون ݾون نِنيو ھوئي شيواداري ھووَي۔ 44 ٿون ۾ جي ڪيرِي مرضِي ھووَي ڪہ او اَگووڻ ھووَي، تو او ݾجون رو غُلوم ھووَي۔ 45 ڪيونڪہ مُنش پُتر يعني ھُون اِيئي رَي ڪري ڪونھي آيو ھون ڪہ ٻيجا مھارِي شيوا ڪرَي پڻ ھُون اِيئي رَي ڪري آيو ھون ڪہ ھُون آپ ٻيجون رِي شيوا ڪرون ھانَ تموم گھڻَي مِنکون نَي مُگتي ڏيوَڻ رَي ݾارُو آپ ٻَليدون ھوئون۔“
پرڀُو يسُوع رو اونڌَي نَي ݾاجو ڪرڻ
46 پَڇي جڏي پرڀُو يسُوع آپرَي چيلون ھانَ تموم گھڻَي مِنکون ڀيڙو يريحُو شھر ݾون ھوئي جاوتو پڙيو، تو مارگ رَي ھيڪَي پاݾَي ھيڪ اونڌو فقير پِنتو پڙيو۔ اُوئي رو نون برتمائي ھتو يعني ”تِمائي رو ڏيڪرو۔“ 47 جڏي اُوئي ݾُڻيو ڪہ يسُوع ناصرِي ايٿ ݾون جاوَي پڙيو، تو اُوئي رَڙ ڪري ڪھيو ڪہ، ”اي يسُوع، دائُود بادشاھ را اولاد، مھَي تي دايا ڪرو۔“ 48 اِيئي تي مِنک اُوئي نَي دڙڪا ڏي ماٺ ڪراوڻ لاگا، پڻ او اَڃون ڀِي زور ݾون ڪيوَڻ لاگو ڪہ، ”اي دائُود بادشاھ را اولاد، مھَي تي دايا ڪرو۔“ 49 تو پرڀُو يسُوع اُڀي رھيو ھانَ ڪھيو ڪہ، ”اُوئي نَي مھَي ڪڍي لي آئو۔“ پَڇي اُوئون اونڌَي نَي ھيلو ڪيئو ھانَ اُوئي نَي ڪھيو ڪہ، ”ھِمت راک۔ اُٺِي، پرڀُو يسُوع ٿنَي اَڻايو ھَي۔“ 50 اَي ݾُڻي اُوئي آپرِي چادر اُتاري اُڇلائِي ھانَ ٽِپ ڏي اُٺي پرڀُو يسُوع ڪڍي آيو۔ 51 پرڀُو يسُوع اُوئي ݾون پُوڇو ڪہ، ”ݾُڻا، ھُون ٿارَي ݾارُو ڪِي ڪرون؟“ اُوئي ڪھيو ڪہ، ”اي پرڀُو، مھارَي اونکيون رِي ديد پاڇِي آوَي۔“ 52 پرڀُو يسُوع اُوئي نَي ڪھيو ڪہ، ”جا، ٿنَي ٿارَي وِشواس ݾاجو ڪيئو ھَي۔“ او يڪدم جوئڻ لاگو ھانَ پرڀُو يسُوع رو چيلو ھوئي، اُوئي لاري بيوَڻ لاگو۔