انگُورون رَي باگ رَي مزُورون رو مِثال
20
پَڇي پرڀُو يسُوع ڪھيو ڪہ، ”آڪاش رِي بادشاھي رِي مِثال اِيئون ھَي ڪہ ھيڪ باگ رو مالڪ ݾاڪݪي تارھي اُٺي ٻاھر گيو ڪہ آپرَي انگُورون رَي باگ رَي ݾارُو مزُور راکَي۔ 2 اُوئي ڪئين مزُورون نَي چوندِي رو ھيڪ ھيڪ ݾِڪو ٻول ڪري اُوئون نَي تاريڪ تي راکيا ھانَ آپرَي باگ ڏيݾا ميليا۔ 3 پَڇي او نَئو بَجي ڀڙي شھر گيو، اوٿ اُوئي ڪئين ٻيجا مزُور ڏيٺا جڪو ووندا اُڀا ھتا۔ 4 مالڪ اُوئون نَي ڪھيو ڪہ، ’ٿي ڀِي مھارَي باگ ۾ جائو ھانَ جڪو ڀِي مزُورِي ھوشَي، او ھُون ٿونَي ڏئين۔‘ 5 پَڇي او ڀِي باگ ڏيݾا گيا۔ پَڇي مالڪ ڀڙي ٻارھي بَجي ھانَ تيني بَجي ٻاھر گيو ھانَ ݾاگي نمُونَي اِيئوج ڪيئو۔ 6 ڀڙي مالڪ پونچي بَجي ٻاھر گيو ھانَ اوٿ ڪئين مزُور اُڀوڙا ڏيٺا، تو اُوئون نَي ڪھيو ڪہ، ’ٿي ݾجو ڏِن ايٿ ووندا ڪيئون اُڀا ھو؟‘ 7 اِيئي تي اُوئون ڪھيو ڪہ، ’مھونَي ڪَي ڀِي ڪوم تي ڪونھي راکيا۔‘ تو مالڪ ڪھيو ڪہ، ’ٿي ڀِي جائي مھارَي انگُورون رَي باگ ۾ ڪوم ڪرو۔‘ 8 پَڇي جڏي شام ھوئِي، تو مالڪ آپرَي مُنڇِي نَي ڪھيو ڪہ، ’مزُورون نَي ھيلو ڪري اُوئون نَي مزُورِي ڏي، پيل اُوئون نَي جڪو پڇاڙِي ۾ ڪوم تي آيا ھتا ھانَ پڇاڙِي ۾ اُوئون نَي جڪو پيل ڪوم تي آيا ھتا۔‘ 9 جڪو مزُور پونچي بَجي ڪوم تي آيا ھتا، اُوئون ݾجون نَي چوندِي رو ھيڪ ھيڪ ݾِڪو مزُورِي ملِي۔ 10 اِيئي رَي ڪري جڪو مزُور پيل ڪوم تي آيا ھتا، اُوئون ݾوچو ڪہ مھونَي وڌيڪ مزُورِي ملشَي، پڻ اُوئون نَي ڀِي ھيڪ ھيڪ چوندِي رو ݾِڪو مِليو۔ 11 اُوئون مزُورِي تو لِي، پڻ مالڪ ڪڍي جائي دانھن ڏي ڪيوَڻ لاگا ڪہ، 12 ’مھون ݾجو ڏِن ڪاڙھَي ۾ ڪوم ڪيئو، تو ڀِي مھونَي اُترِي مزُورِي ملِي ھَي، جترِي رُگو ھيڪ ڪلاڪ ڪوم ڪرڻ آݪون نَي۔‘ 13 اِيئي تي مالڪ اُوئون ۾ ھيڪَي نَي ڪھيو ڪہ، ’ادا، مھَي ٿَي ݾون ڪو ناحقِي تو ڪونھي ڪِي۔ ڪِي ٿَي مھَي ݾون چوندِي رَي ھيڪَي ݾِڪَي رِي ٻولِي ڪونھي ڪِي ھتِي؟ 14 اِيئي رَي ڪري جڪو ٿارو حق ھَي، او لَي ھانَ بُوئو جا۔ اَي مھارِي مرضِي ھَي ڪہ جترِي ٿارِي مزُورِي ھَي، او ڏيئون ھانَ اِتريج پڇاڙِي ۾ آوڻ آݪون نَي ڀِي ڏيئون۔ 15 ڪِي مھارو اَي حق ڪونھي ڪہ آپرَي پَشون نَي جون وڻَي اِيئون خرچ ڪرون؟ ھُون مھربون ھون، اِيئي رَي ڪري ٿنَي ريݾ آئِي ھَي؟‘ 16 اِيئي نمُونَي جڪو ھڻون لاري ھَي او آگھي ھوشَي ھانَ جڪو آگھي ھَي، او لاري ھوشَي۔“پرڀُو يسُوع رِي تيجو گُھمرو آپرِي موت رِي اگڪٿِي
17 جڏي پرڀُو يسُوع يروشلم شھر ڏيݾا جاوتو پڙيو، تو مارگ ۾ آپرَي ٻارھون چيلون نَي ھيڪَي پاݾَي لي جائي ڪھيو ڪہ، 18 ”ݾُڻو، آپي يروشلم شھر ڏيݾا ھالون پڙيا، جيٿ مِنک مھَي مُنش پُتر نَي، ايشوَر رَي موٽَي پُوجاريون ھانَ ڌرمي گُروئون رَي حوالي ڪرشَي ھانَ او مھارِي موت رو فيصلو ڪرشَي۔ 19 پَڇي او مھنَي ٻيجَي قومون رَي حوالي ڪرشَي، او مھَي تي ٺٺولَي ڪرشَي، چاٻڪون ھڻشَي ھانَ ݾُولِي تي چاڙھي ڪوڪا ھڻي ماري ڇوڙشَي، پڻ ھُون تيجَي ڏِن جيتو ھوئي جائين۔“
يعقُوب ھانَ يُوحنا رِي ما رِي مِنٿ
20 پَڇي زبدي رِي لُگائِي آپرَي ٻيئون ڏيڪرون ڀيڙِي پرڀُو يسُوع ڪڍي آئِي ھانَ مِنٿ ڪرڻ رَي ݾارُو اُوئي رَي پگون ۾ کِري۔ 21 پرڀُو يسُوع اُوئي ݾون پُوڇو ڪہ، ”تُو ڪِي مونگَي ھَي؟“ تو اُوئي ڪھيو ڪہ، ”مھَي ݾون واعدو ڪر، جڏي ٿارِي بادشاھي آوَي، تو مھارو ھيڪ ڏيڪرو ٿارَي ݾاجَي پاݾَي ھانَ ٻيجو کاٻَي پاݾَي ٻيݾَي۔“ 22 پرڀُو يسُوع اُوئي رَي ڏيڪرون نَي ڪھيو ڪہ، ”ٿونَي خبر ڪونھي ڪہ ٿي ڪِي مونگو پڙيا۔ ڪِي ٿي ڏُکون رو او پيالو پيئي ݾگھو ھو، جڪو ھُون پيئڻ آݪو ھون؟“ اُوئون بݪتِي ڏينِي ڪہ، ”ھاوي، مھي پيئي ݾگھون ھون۔“ 23 پرڀُو يسُوع اُوئون نَي ڪھيو ڪہ، ”ݾاچيلي ٿي مھارو پيالو پيشو، پڻ ڪينَي ڀِي مھارَي ݾاجَي جون کاٻَي پاݾَي ٻيݾاڙڻ، اَي مھارو ڪوم ڪونھي۔ او جگھائون اُوئون رَي ھَي جڪون رَي ݾارُو مھارَي آڪاشِي پِتا تيار ڪيئَي ھَي۔“
24 جڏي باقي ڏَݾ چيلون اَي بات ݾُڻِي، تو اُوئون ٻيئون ڀايون تي ڪاوڙيا۔ 25 پڻ پرڀُو يسُوع اُوئون ݾجون نَي ھيلو ڪري ڪھيو ڪہ، ”ٿونَي خبر ھَي ڪہ ٻيجَي قومون را ݾردار اُوئون تي حُڪم ھلاوَي ھَي ھانَ موٽَي وزيرون رو اُوئون تي اِختيار ھَي۔ 26 پڻ ٿون ۾ اِيئون نِي ھوئڻ کپَي۔ جي ٿون ۾ ڪيرِي موٽَي ھوئڻ رِي مرضِي ھووَي، تو او ݾجون ݾون نِنيو ھوئي شيواداري ھووَي۔ 27 جي ٿون ۾ ڪيرِي مرضِي ھووَي ڪہ او اَگووڻ ھووَي، تو او ٿونرو غُلوم ھووَي۔ 28 اِيئي نمُونَي ھُون مُنش پُتر اِيئي رَي ڪري ڪونھي آيو ڪہ ٻيجا مھارِي شيوا ڪرَي پڻ ھُون اِيئي رَي ڪري آيو ھون ڪہ ھُون آپ ٻيجون رِي شيوا ڪرون ھانَ تموم گھڻَي مِنکون نَي مُگتي ڏيوَڻ رَي ݾارُو آپ ٻَليدون ھوئون۔“
پرڀُو يسُوع رو ٻيئون اونڌون نَي ݾاجا ڪرڻ
29 جڏي پرڀُو يسُوع آپرَي چيلون ڀيڙو يريحُو شھر ݾون جاوڻ لاگو، تو مِنکون رو موٽو ٽولو اُوئي لاري آيو۔ 30 اوٿ ٻي اونڌا مارگ ۾ ھيڪَي پاݾَي ٻيٺا ھتا۔ جڏي اُوئون ݾُڻيو ڪہ پرڀُو يسُوع ايٿ ݾون جاوَي پڙيو، تو او زور ݾون رڙَي ڪري ڪيوَڻ لاگا ڪہ، ”اي پرڀُو، دائُود بادشاھ را اولاد، مھون تي دايا ڪرو۔“ 31 اِيئي تي مِنک اُوئون نَي دڙڪا ڏي ماٺ ڪراوڻ لاگا، پڻ او اَڃون ڀِي زور ݾون ڪيوَڻ لاگا ڪہ، ”اي پرڀُو، دائُود بادشاھ را اولاد، مھون تي دايا ڪرو۔“ 32 تو پرڀُو يسُوع اُڀي رھيو ھانَ اُوئون نَي ھيلو ڪري پُوڇو ڪہ، ”ٿونرِي ڪھڙِي مرضِي ھَي ڪہ ھُون ٿونرَي ݾارُو ڪِي ڪرون؟“ 33 اُوئون ڪھيو ڪہ، ”اي پرڀُو، مھورَي اونکيون رِي ديد پاڇِي آوَي۔“ 34 پرڀُو يسُوع نَي اُوئون تي دايا آئِي ھانَ اُوئون رَي اونکيون تي ھاٿ لگايو، تو او يڪدم جوئڻ لاگا۔ پَڇي او پرڀُو يسُوع لاري بيوَڻ لاگا۔