پرڀُو يسُوع رو بادشاھ آݪِي ڪار يروشلم ۾ جاوڻ
21
جڏي پرڀُو يسُوع ھانَ اُوئي را چيلا يروشلم شھر رَي نيڙا زيتُون رَي جبل تي بيت فِگي گون رَي نيڙا پُگا، تو پرڀُو يسُوع ٻيئون چيلون نَي اَي ڪئي ميليا ڪہ، 2 ”ݾوملَي گون ۾ جائو ھانَ پُگتئي ٿي اوٿ ھيڪ گڏِي ٻاڌوڙِي ڏيکشو ھانَ اُوئي ڀيڙو ھيڪ گڏيو ڀِي ھوشَي۔ ٿي او کولي مھَي ڪڍي لي آئو۔ 3 جي ڪُڻ ٿون ݾون پُوڇَي، تو ڪھيا ڪہ، ’پرڀُو نَي اِيئون رِي ضرُورت ھَي۔‘ تو او ٿونَي اُوئيج ٽيم لي جاوڻ ڏيشَي۔“4 اَي اِيئي رَي ڪري اِيئون ھويو ڪہ جڪو نبِي ڪھيو ھتو، او پُورو ھووَي ڪہ،
5 ”صيئون شھر رَي مِنکون نَي ڪَي ڪہ،
جوئو، ٿونرو بادشاھ ٿون ڪڍي آوَي پڙيو۔
او نِموڻو ھَي ھانَ گڏِي تي،
پڻ گڏئَي تي ݾَوار ھَي۔“
6 پَڇي چيلا گيا ھانَ اُوئون اِيئوج ڪيئو، جون پرڀُو يسُوع اُوئون نَي ڪھيو ھتو۔ 7 او گڏِي ھانَ اُوئي رَي گڏئَي نَي لي آيا ھانَ آپرا گاڀا اُوئون تي ڍاڙيا۔ پَڇي پرڀُو يسُوع گڏئَي تي ݾَوار ھويو۔ 8 تموم گھڻَي مِنکون آپرا گاڀا مارگ تي بِڇايا ھانَ ٻيجا مِنک بَڻون رَي ٽاݪَي باڍي مارگ تي بِڇاوتا گيا 9 ھانَ ݾجائِي مِنک جڪو پرڀُو يسُوع آگھي ھانَ لاري ھتا، او زور ݾون نارا ھڻڻ لاگا ڪہ،
”جَئي جَئي ڪار، دائُود رَي اولاد رِي،
ڌن ھَي او جڪو پرميشوَر رَي نون ݾون آوَي ھَي۔
ݾُرگ ۾ ايشوَر رِي جَئي ڪار ھووَي۔“
10 جڏي پرڀُو يسُوع يروشلم ۾ پُگو، تو شھر را ݾجائِي مِنک جوش ۾ آئي پُوڇڻ لاگا ڪہ، ”اَي ڪُڻ ھَي؟“ 11 رش ۾ مِنکون ڪھيو ڪہ، ”اَي يسُوع ھَي جڪو گليل صُوبَي رَي ناصرت شھر رو نبِي ھَي۔“
ايشوَر رَي گھر ݾون واپاري ڪاڍڻ
12 پَڇي پرڀُو يسُوع ايشوَر رَي گھر ۾ گيو ھانَ اُوئون مِنکون نَي ٻاھر ڪاڍڻ لاگو جڪو اوٿ ڪاروبار ڪرتا پڙيا۔ اُوئي رُپيا مٽاوڻ آݪون را ٽيبل ھانَ ڪٻُوتر بيچڻ آݪون را ݾندل اُونڌا ڪري ڇوڙيا۔ 13 پَڇي اُوئون نَي ڪھيو ڪہ، ”شاستر ۾ لِکيوڙو ھَي ڪہ،
’مھارو گھر پراٿنا رو گھر ھوشَي۔‘
پڻ ٿون اِيئي نَي ڌاڙيلون رو اَڏو ٺائي ڇوڙيو ھَي۔“
14 پَڇي اونڌا ھانَ مَنڊا پرڀُو يسُوع ڪڍي ايشوَر رَي گھر ۾ آيا ھانَ اُوئي اُوئون نَي ݾاجا ڪيئا۔ 15 پڻ جڏي ايشوَر رَي موٽَي پُوجاريون ھانَ ڌرمي گُروئون، پرڀُو يسُوع را ڪيئوڙا عجيب ڪوم ڏيٺا ھانَ نِنئي ٻاݪون ݾون ايشوَر رَي گھر ۾ زور ݾون اَي ڪيتَي ݾُڻيو ڪہ، ”دائُود بادشاھ رَي اولاد رِي جَئي جَئي ڪار۔“ تو او ريݾي ٻَݪيا۔ 16 اُوئون پرڀُو يسُوع نَي ڪھيو ڪہ، ”تُو ݾُڻتو ڪونھي ڪہ اَي ڪِي ڪَي پڙيا؟“ پرڀُو يسُوع بݪتِي ڏينِي ڪہ، ”ھاوي، ھُون ݾُڻون پڙيو۔ پڻ ڪِي ٿون شاستر رِي اَي بات ڪڏي ڀِي ڪونھي پڙھِي ڪہ،
’ٿَي ٻاݪون ھانَ ڏُوڌ پيئڻ آݪَي ٻاݪيون ݾون ڀِي آپرِي بکوڻ ڪرائِي ھَي۔‘“
17 پَڇي او اُوئون نَي ڇوڙي شھر ݾون ٻاھر نڪري بيت عِنيا گون ڏيݾا گيو ھانَ رات اوٿج رھيو۔
پرڀُو يسُوع رو انجير رَي بَڻ نَي پِٽڻ
18 ٻيجَي ڏِن ݾاڪݪي تارھي جڏي پرڀُو يسُوع يروشلم شھر ڏيݾا پاڇو جاوتو پڙيو، تو اُوئي نَي بُوک لاگِي۔ 19 اُوئي مارگ ۾ ھيڪ انجير رو بَڻ ڏيٺو، تو او اوٿ گيو پڻ اُوئي بَڻ ۾ پونون ݾون ٽاݪ ڪئين ڪونھي ھتو۔ تو اُوئي بَڻ نَي ڪھيو ڪہ، ”آج ݾون پَڇي ٿَي ۾ ڪڏي ڀِي ڦل ڪونھي لاگَي۔“ اُوئيج ٽيم او بَڻ ݾُوڪي گيو۔ 20 جڏي چيلون اَي ڏيٺو، تو حيرون ھوئي پُوڇڻ لاگا ڪہ، ”انجير رو اَي بَڻ اِترو ڇيڪو ڪيڪر ݾُوڪو ھَي؟“ 21 پرڀُو يسُوع اُوئون نَي بݪتِي ڏينِي ڪہ، ”ھُون ٿونَي ݾاچِي ڪونھ ھون ڪہ جي ٿي وِشواس راکو ھانَ شَڪ نِي ڪرو، تو جڪو ڪئين مھَي اِيئي بَڻ ݾون ڪيئو ھَي، ٿي ڀِي اِيئون رو اِيئون ڪرشو۔ پڻ جي ٿي اِيئي جبل نَي ڪشو ڪہ آپرِي جگھا ݾون اُکڙي جائي ݾمُوندر ۾ کِر، تو اَي ھوئي جاشَي۔ 22 جي ٿي وِشواس راکشو، تو جڪو ڀِي پراٿنا ۾ مونگشو، تو او ٿونَي مِلي جاشَي۔“
پرڀُو يسُوع رَي اِختيار رَي بارَي ۾ سوال
23 جڏي پرڀُو يسُوع ايشوَر رَي گھر ۾ آئي مِنکون نَي ݾيکاوتو پڙيو، تو ايشوَر را موٽا پُوجاري ھانَ يھُودي اَگووڻ آيا ھانَ پُوڇو ڪہ، ”تُو اَي ڪوم ڪيرِي اِختياري ݾون ڪرَي ھَي؟ او ڪُڻ ھَي جڪَي ٿنَي اَي اِختياري ڏينِي ھَي؟“ 24 پرڀُو يسُوع اُوئون نَي بݪتِي ڏينِي ڪہ، ”ھُون ڀِي ٿون ݾون ھيڪ سوال پُوڇون ھون۔ جي ٿون مھنَي اِيئي رِي بݪتِي ڏينِي، تو پَڇي ھُون ڀِي ٿونَي ݾُڻائين ڪہ ھُون اَي ڪوم ڪيرَي اِختيار ݾون ڪرون ھون۔ 25 مھنَي ݾُڻائو، يُوحنا ايشوَر رَي طرفون پويتر سِنون ڏيتو، جون اِنسون رَي طرفون؟“ اِيئي تي او آپت ۾ ڪيوَڻ لاگا ڪہ، ”جي آپي ڪونھ ڪہ ايشوَر رَي طرفون، تو پَڇي او ڪشَي ڪہ ٿون اُوئي تي وِشواس ڪيئون ڪونھي راکيو؟ 26 پڻ جي آپي ڪونھ ڪہ اِنسون رَي طرفون، تو آپون نَي مِنکون رو ٻِي ھَي، ڪيونڪہ مِنک يُوحنا نَي نبِي ݾمجَھي ھَي۔“ 27 اِيئي رَي ڪري اُوئون ڪھيو ڪہ، ”مھونَي خبر ڪونھي۔“ تو پرڀُو يسُوع اُوئون نَي ڪھيو ڪہ، ”تو پَڇي ھُون ڀِي ٿونَي ڪونھي ݾُڻائُون ڪہ ھُون اَي ڪوم ڪيرَي اِختيار ݾون ڪرون ھون۔“
ٻيئون ڏيڪرون رو مِثال
28 پَڇي پرڀُو يسُوع ھيڪ مِثال ݾُڻايو ڪہ، ”ھيڪَي مِنک را ٻي ڏيڪرا ھتا۔ ٻاپ موٽَي ڏيڪرَي نَي ڪھيو ڪہ، ’ڏيڪرا، آج تُو جا ھانَ جائي انگُورون رَي باگ ۾ ڪوم ڪر۔‘ 29 اُوئي جواب ڏينو ڪہ، ’ھُون ڪونھي جائُون۔‘ پڻ پَڇي ݾوچي بُوئو گيو۔ 30 پَڇي ٻاپ نِنئي ڏيڪرَي نَي ڪھيو۔ اُوئي بݪتِي ڏينِي ڪہ، ’ھاوي اَبا۔‘ پڻ او ڪونھي گيو۔ 31 ھمَي مھنَي ݾُڻائو ڪہ اُوئون ٻيئون ۾ ڪَي آپرَي ٻاپ رِي مرضِي پُورِي ڪِي؟“ اُوئون بݪتِي ڏينِي ڪہ، ”موٽَي ڏيڪرَي۔“ اِيئي تي پرڀُو يسُوع اُوئون نَي ڪھيو ڪہ، ”ھُون ٿونَي ݾاچِي ڪونھ ھون ڪہ ايشوَر رِي بادشاھي ۾ ٿون ݾون پيل ناڪو ليوَڻ آݪا ھانَ ڀُونڏَي لُگائَي جاشَي، 32 ڪيونڪہ پويتر سِنون ڏيوَڻ آݪو يُوحنا، تو ٿونَي ڀلائي رو مارگ بتاوڻ آيو ھتو، پڻ ٿون اُوئي رو وِشواس ڪونھي ڪيئو۔ پڻ ناڪو ليوَڻ آݪون ھانَ ڀُونڏَي لُگايون اُوئي رو وِشواس ڪيئو۔ ٿون ݾجو ڪئين ڏيٺو، تو ڀِي آپرِي ݾوچ ڪونھي بدلائِي ھانَ توبھون ڪونھي ڪِي ھانَ نَڪو اُوئي تي وِشواس راکيو۔“
انگُورون رَي باگ رَي ٺيڪدارون رو مِثال
33 پَڇي پرڀُو يسُوع ڪھيو ڪہ، ”ھيڪ ٻيجو مِثال ݾُڻو، ھيڪَي زميندار انگُورون رو باگ لگايو ھانَ اُوئي رَي چوڌاري لوڙھو ڏيرايو ھانَ رس ڪاڍڻ رَي ݾارُو ھودِي ڀِي ٺڙائِي ھانَ پھرو ڏيوَڻ رَي ݾارُو مورچو ڀِي ٺڙايو۔ پَڇي باگ ٺيڪَي تي ڏي آپ ڪَي ٻيجَي مُلڪ بُوئو گيو۔ 34 پَڇي جڏي انگُورون رِي مُند آئِي، تو اُوئي آپرا غُلوم باگايون ڏيݾا ميليا ڪہ آپرَي انگُورون رو حِصو لي آوَي۔ 35 پڻ باگايون ھيڪَي غُلوم نَي جھالي مار ڪاڍِي ھانَ ٻيجَي نَي ماري ڇوڙيو ھانَ تيجَي نَي پٿر ھڻي ٺُپ ماري ڇوڙيو۔ 36 پَڇي مالڪ پيل ݾون ڀِي وڌيڪ ٻيجا غُلوم ميليا، پڻ باگايون اُوئون ݾون ڀِي اِيئوج ڪيئو۔ 37 نيٺ اُوئي آپرو ڏيڪرو اُوئون ڏيݾا اَي ݾوچي ميليو ڪہ او ضرُور مھارَي ڏيڪرَي رو خيال ڪرشَي۔ 38 پڻ جڏي باگايون اُوئي رَي ڏيڪرَي نَي آوتو ڏيٺو، تو اُوئون آپت ۾ صلاح ڪِي ڪہ، ’اَي تو مالڪ رو بارݾ ھَي۔ آئو تو آپي اِيئي نَي ماري ڇوڙون، تو پَڇي ݾجِي ملڪيت آپڻِي ھوئي جاشَي۔‘ 39 پَڇي اُوئون اُوئي نَي باگ ݾون ٻاھر ڪاڍي ماري ڇوڙيو۔“
40 پَڇي پرڀُو يسُوع پُوڇو ڪہ، ”ھمَي جڏي باگ رو مالڪ آشَي، تو اُوئون باگايون ݾون ڪِي ڪرشَي؟“ 41 اُوئون ڪھيو ڪہ، ”او ضرُور اُوئون بُڇڙون نَي ماري ڇوڙشَي ھانَ باگ رو ٺيڪو ٻيجَي باگايون نَي ڏيشَي، جڪو انگُور اُترڻ رَي ٽيم اُوئي رو حِصو اُوئي نَي ڏَي۔“ 42 پَڇي پرڀُو يسُوع اُوئون نَي ڪھيو ڪہ، ”ڪِي ٿون شاستر ۾ ڪونھي پڙھيو ڪہ،
’جڪَي پٿر نَي ڪاريگرون بيڪار ݾمجھو،
اوج ݾجون ݾون خاص پٿر ھويو۔
اَي پرميشوَر رِي مرضِي ݾون ھويو
ھانَ آپڻَي ݾارُو ڪترِي حيرت آݪِي بات ھَي۔‘
43 اِيئي رَي ڪري ھُون ٿونَي ڪونھ ھون ڪہ ايشوَر رِي بادشاھي ٿون ݾون کوݾِي جاشَي ھانَ اُوئي قوم نَي ڏينِي جاشَي، جڪو پُورو پُورو ڦل ڏَي ھَي يعني ايشوَر رِي مرضِي تي بَي ھَي۔“ 44 [جڪو ڀِي اِيئي پٿر تي کرشَي، تو او ٽُڪڙا ٽُڪڙا ھوئي جاشَي، پڻ جڪَي ماٿَي اَي پٿر کرشَي اُوئي نَي چِپلي ڇوڙشَي۔]