پرڀُو يسُوع رو قانا شھر ۾ پيلڪو پرچو
2
ٻيئون ڏِنون ݾون پَڇي گليل صُوبَي رَي قانا شھر ۾ ھيڪ بيئان ھتو۔ پرڀُو يسُوع رِي ما ڀِي اوٿ آيوڙِي ھتِي۔ 2 پرڀُو يسُوع ھانَ اُوئي رَي چيلون نَي ڀِي اُوئي بيئان رِي دعوت ھتِي۔ 3 جڏي بيئان ۾ انگُورون رو رس ختم ھويو، تو پرڀُو يسُوع رِي ما اُوئي نَي ڪھيو ڪہ، ”اِيئون ڪڍي انگُورون رو رس ختم ھويو رو۔“ 4 اِيئي تي پرڀُو يسُوع ڪھيو ڪہ، ”ما، تُو مھنَي ڪيئون ݾُڻاوَي ھَي۔ اَڃون تو مھارو ٽيم ڪونھي آيو۔“ 5 پَڇي اُوئي رِي ما شيوادارون نَي ڪھيو ڪہ، ”جڪو ڪئين ٿونَي اَي ڪَي، او ڪرو۔“6 اوٿ پٿر رَي ڇَي ھودَي راکيوڙا ھتَي۔ اُوئون ھوديون رَي پوڻي ݾون يھُودي مِنک آپرِي ريت تي آپنَي ڌوتا۔ ھر ھيڪ ھودِي ۾ ٻي مَڻ ݾون لي تين مَڻ پوڻي آوتو۔ 7 پَڇي پرڀُو يسُوع شيوادارون نَي ڪھيو ڪہ، ”ھوديون ۾ پوڻي ڀرو۔“ تو اُوئون ھودَي تارو تار ڀري ڇوڙئَي۔ 8 اُوئي ݾون پَڇي پرڀُو يسُوع اُوئون نَي ڪھيو ڪہ، ”ھمَي اِيئي ھوديون ݾون پوڻي ڪاڍي بيئان رَي اَگووڻ ڪڍي لي جائو۔“ تو اُوئون اِيئوج ڪيئو۔ 9 بيئان رَي اَگووڻ او پوڻي چاکيو جڪو انگُورون رو رس ھويوڙو ھتو۔ اُوئي نَي خبر ڪونھي ھتِي ڪہ اَي انگُورون رو رس ڪيٿ ݾون آيو ھَي، پڻ شيوادارون نَي ݾجِي خبر ھتِي جڪون پوڻي ڀريو ھتو۔ پَڇي بيئان رَي اَگووڻ لاڏَي نَي اَڻايو 10 ھانَ ڪھيو ڪہ، ”ھر ھيڪ مِنک انگُورون رو ݾُٺو رس پيل ڏَي ھَي ھانَ پَڇي جڏي ݾجائِي پيئي ڌاپَي ھَي، تو پَڇي انگُورون رو ھلڪو رس ڏَي ھَي، پڻ ٿَي تو انگُورون رو ݾُٺو رس اَڃون توڻي بچائي راکيو ھَي۔“
11 پرڀُو يسُوع رو اَي پيلڪو پرچو ھتو جڪو اُوئي گليل صُوبَي رَي قانا شھر ۾ بتايو ھانَ اِيئي ݾون اُوئي آپرِي قُدرت بتائِي۔ اَي جوئي اُوئي رَي چيلون اُوئي تي وِشواس راکيو۔ 12 اُوئي ݾون پَڇي پرڀُو يسُوع آپرِي ما، آپرَي ڀايون ھانَ آپرَي چيلون ڀيڙو ڪفرنَحُوم شھر ڏيݾا گيو ھانَ اوٿ ڪئينڪہ ڏِن رھيو۔
ايشوَر رَي گھر ݾون واپاري ڪاڍڻ
13 جڏي يھُودي قوم رو فَسح رو پَرٻ نيڙو آيو، تو پرڀُو يسُوع يروشلم شھر ۾ گيو۔ 14 اُوئي اوٿ جائي ڏيٺو ڪہ ايشوَر رَي گھر ۾ واپاري ڍگا، رڍون ھانَ ڪٻُوتر بيچَي پڙيا ھانَ رُپيا مٽاوڻ آݪا ٻيٺا ھَي۔ 15 اَي جوئي پرڀُو يسُوع رنڍوڙيون رو چاٻڪ ٺائي ݾجَي واپاريون، رڍون ھانَ ڍگون نَي ايشوَر رَي گھر ݾون ٻاھر ڪاڍيا ھانَ رُپيا مٽاوڻ آݪون را ݾِڪا بِکوري ڇوڙيا ھانَ اُوئون را ݾندل اُونڌا ڪري ڇوڙيا۔ 16 پَڇي پرڀُو يسُوع ڪٻُوتر بيچڻ آݪون نَي ڪھيو ڪہ، ”اِيئون نَي ايٿ ݾون ڪاڍو۔ مھارَي پِتا رَي گھر نَي واپار رو اَڏو نِي ٺائو۔“ 17 اَي بات ݾُڻي اُوئي رَي چيلون نَي شاستر رِي لِکيوڙِي او بات ياد آئِي ڪہ،
”ٿارَي گھر رِي غيرت
مھارَي من ۾ باݾڏي آݪِي ڪار ٻݪَي ھَي۔“
18 اِيئي تي يھُودي اَگووڻون پرڀُو يسُوع نَي ڪھيو ڪہ، ”مھونَي ڪو اھڙو نِشون بتا جڪَي ݾون خبر پڙَي ڪہ ٿنَي اِيئون ڪرڻ رِي اِختياري ھَي؟“ 19 اِيئي تي پرڀُو يسُوع اُوئون نَي بݪتِي ڏينِي ڪہ، ”جي ٿي ايشوَر رَي اِيئي گھر نَي بِکورو، تو ھُون اِيئي نَي تينون ڏِنون ۾ ڀڙي پاڇو ٺائين رو۔“ 20 اَي بات ݾُڻي يھُودي اَگووڻون ڪھيو ڪہ، ”ايشوَر رو گھر ٺاوڻ ۾ ڇئيتالي ݾال لاگا ھَي، تو پَڇي ڪِي تُو اِيئي نَي تينون ڏِنون ۾ ٺائِي رو؟“ 21 پڻ پرڀُو يسُوع اَي بات آپرَي ݾَرير رَي بارَي ۾ ڪِي ھتِي ڪہ اَي ايشوَر رو گھر ھَي۔ 22 جڏي او مُوئوڙون ݾون ڀڙي جيتو ھويو، تو اُوئي رَي چيلون نَي پرڀُو يسُوع رِي او بات ياد آئِي۔ پَڇي اُوئون ايشوَر رَي شاستر ھانَ پرڀُو يسُوع رِي بات تي وِشواس راکيو۔
23 جڏي پرڀُو يسُوع فَسح پَرٻ تي يروشلم شھر ۾ ھتو، تو تموم گھڻَي مِنکون اُوئي را ڪيئوڙا پرچا ڏيکي اُوئي تي وِشواس راکيو۔ 24 پڻ پرڀُو يسُوع نَي اُوئون تي ڀروسو ڪونھي ھتو، ڪيونڪہ اُوئي نَي ݾجون رِي خبر ھتِي۔ 25 اُوئي نَي ڪو ڀِي ضرُورت ڪونھي ھتِي ڪہ مِنکون رَي بارَي ۾ ڪو اُوئي نَي ݾُڻاوَي، ڪيونڪہ اُوئي نَي ݾجِي خبر ھتِي ڪہ اِنسون رَي من ۾ ڪِي ھَي۔