يُوحنا 3

پرڀُو يسُوع ھانَ نيڪوديمس

ھيڪ فريسي مِنک ھتو جڪَي رو نون نيڪوديمس ھتو۔ او ھيڪ يھُودي ݾردار ھتو۔ ‏2 ھيڪِي رات رو او پرڀُو يسُوع ڪڍي آيو ھانَ اُوئي نَي ڪھيو ڪہ، ”گُرو جِي، مھونَي خبر ھَي ڪہ ٿي ايشوَر را ميليوڙا گُرو ھو، ڪيونڪہ جڪو پرچا ٿي بتائو ھو اھڙا پرچا ٻيجو ڪو ڀِي بتائي ڪونھي ݾگھتو، جترِي توڻي ايشوَر اُوئي ڀيڙو نِي ھووَي۔“ ‏3 اِيئي تي پرڀُو يسُوع اُوئي نَي ڪھيو ڪہ، ”ھُون ٿنَي ݾاچِي ڪونھ ھون ڪہ جترِي توڻي ڪو ڀِي مِنک نُوئو جنم ڪونھي ليتو، اُترِي توڻي او ايشوَر رِي بادشاھي ۾ جائي ڪونھي ݾگھتو۔“ ‏4 اِيئي تي نيڪوديمس پُوڇو ڪہ، ”ھيڪ موٽِي عُمر آݪو ڏوڪرو ڪيڪر نُوئو جنم لي ݾگھَي ھَي؟ ڪِي او آپرِي ما رَي پيٽ ݾون ڀڙي نُوئو جنم ليشَي؟“ ‏5 پرڀُو يسُوع اُوئي نَي بݪتِي ڏينِي ڪہ، ”ھُون ٿنَي ݾاچِي ڪونھ ھون ڪہ جترِي توڻي ڪو ڀِي مِنک، پوڻي ھانَ پويتر آتما ݾون جنم ڪونھي ليتو، اُترِي توڻي او ايشوَر رِي بادشاھي ۾ جائي ڪونھي ݾگھتو۔ ‏6 جڪو اِنسون ݾون جنم لَي ھَي، او اِنسون ھَي پڻ جڪو آتما ݾون جنم لَي ھَي، او آتما ھَي۔ ‏7 اِيئي بات تي حيرون نِي ھو ڪہ مھَي ٿنَي ڪھيو ڪہ ٿون ݾجون نَي نُوئو جنم ليوَڻ کپَي۔ ‏8 بائيرو آپرِي مرضِي ݾون بَي ھَي ھانَ تُو رُگو اُوئي رو آواز ݾُڻَي ھَي، پڻ اَي خبر ڪونھي ڪہ او ڪيٿ ݾون آوَي ھَي ھانَ ڪيئا جاوَي ھَي۔ او مِنک ڀِي اِيئوج ھَي جڪو آتما ݾون جنم لَي ھَي۔“ ‏9 تو نيڪوديمس اُوئي ݾون پُوڇو ڪہ، ”اَي ڪيڪر ھوئي ݾگھَي ھَي؟“ ‏10 پرڀُو يسُوع بݪتِي ڏينِي ڪہ، ”تُو تو اِسرائيلي قوم رو موٽو گُرو ھَي، تو ڀِي ٿنَي اِيئون باتون رِي خبر ڪونھي؟ ‏11 ھُون ٿنَي ݾاچِي ڪونھ ھون ڪہ جڪَي رِي مھونَي خبر ھَي، اوج ڪونھ ھون ھانَ جڪَي نَي مھون ڏيٺو ھَي، اُوئي رِي گواھِي ڏيئون ھون پڻ ٿون ۾ ڪو ڀِي مھورِي گواھِي ڪونھي منتو۔ ‏12 جڏي ھُون ٿون ݾون جگت رَي باتون ڪرون ھون، تو ٿي ڀروسو ڪونھي ڪرتا۔ ھمَي جي ھُون ٿون ݾون ݾُرگ رَي باتون ڪرون، تو ٿي ڪيڪر ڀروسو ڪرشو؟“

پرڀُو يسُوع رو آپرَي بارَي ۾ ݾُڻاوڻ

‏13 پَڇي پرڀُو يسُوع ڪھيو ڪہ، ”مھَي مُنش پُتر ݾون ٽاݪ ٻيجو ڪو ڀِي آڪاش تي ڪونھي گيو، ڪيونڪہ ھُون آڪاش ݾون آيو ھون۔ ‏14 جھڙَي نمُونَي مُوسيٰ رڻ پَٽ ۾ مِنکون نَي بچاوڻ رَي ݾارُو پيتل رو ناگ لڪڙِي ماٿَي لٽڪائي اُونچو ڪيئو ھتو، اُوئيج نمُونَي ھُون مُنش پُتر ڀِي ضرُور اُونچو ڪيئو جائين ‏15 ڪہ جڪو ڀِي مھَي تي وِشواس راکَي، تو اُوئي نَي اَمر جيوَن ملَي۔ ‏16 ايشوَر جگت ݾون اِترو تو پريم ڪيئو ڪہ اُوئي آپرو ھيڪج ڏيڪرو ڏينو ڪہ جڪو ڀِي اُوئي تي وِشواس راکَي، او مرَي نِي، پڻ اُوئي نَي اَمر جيوَن ملَي۔ ‏17 ايشوَر آپرو ڏيڪرو جگت ۾ اِيئي رَي ڪري ڪونھي ميليو ڪہ او مِنکون نَي سزا ڏيوَڻ رو فيصلو ڪرَي، پڻ اِيئي رَي ڪري ميليو ڪہ اُوئي رَي وسيلَي دُنيا رَي مِنکون نَي مُگتي ملَي۔ ‏18 جڪو ڀِي ڏيڪرَي تي وِشواس راکَي ھَي، اُوئي تي سزا رو حُڪم ڪونھي، پڻ جڪو اُوئي تي وِشواس ڪونھي راکتو، تو اُوئي تي پيل ݾون سزا رو حُڪم ھويو رو، ڪيونڪہ او ايشوَر رَي ھيڪَي ڏيڪرَي تي وِشواس ڪونھي راکتو۔ ‏19 ايشوَر اِيئي رَي ڪري سزا رو حُڪم ڏَي ھَي ڪہ اُجاݪو دُنيا ۾ آيو، پڻ مِنکون نَي اُجاݪَي ݾون وڌيڪ انڌارو وڻيو، ڪيونڪہ اُوئون را ڪوم بُڇڙا ھتا۔ ‏20 جڪو بُڇڙا ڪوم ڪرَي ھَي، اُوئي نَي اُجاݪو ݾُٺو ڪونھي لاگتو، اِيئي رَي ڪري او اُجاݪَي ڪڍي ڪونھي آوتو، متان اِيئون نِي ھووَي ڪہ اُوئي را بُڇڙا ڪوم پَڌرا ھووَي۔ ‏21 پڻ جڪو ݾاچ تي بَي ھَي، او اُجاݪَي ڪڍي آوَي ھَي ڪہ اُوئي را ڪوم ڏيکيجَي جڪو اُوئي ايشوَر رِي مرضِي تي ڪيئا ھَي۔“

پويتر سِنون ڏيوَڻ آݪَي يُوحنا رِي گواھِي

‏22 اُوئي ݾون پَڇي پرڀُو يسُوع ھانَ اُوئي را چيلا يھُوديا صُوبَي رَي ٻاھراڙِي علائقَي ۾ گيا۔ پرڀُو يسُوع اوٿ آپرَي چيلون ڀيڙو رئي مِنکون نَي پويتر سِنون ڏيوَڻ لاگو۔ ‏23 اُوئون ڏِنون ۾ يُوحنا ڀِي شاليم شھر رَي نيڙو، عينُون نون رِي جگھا تي پويتر سِنون ڏيتو، ڪيونڪہ اوٿ پوڻي تموم گھڻو ھتو ھانَ مِنک اُوئي ڪڍي آئي پويتر سِنون ليتا۔ ‏24 اَي ݾجَي باتون يُوحنا نَي جيل ۾ گھاتڻ ݾون پيل رَي ھَي۔

‏25 پَڇي يُوحنا رَي چيلون رِي ھيڪَي يھُودي مِنک ݾون آپنَي ڌوئڻ آݪِي ريت رَي بارَي ۾ بَحث ھوئِي۔ ‏26 تو او يُوحنا ڪڍي آيا ھانَ ڪھيو ڪہ، ”گُرو جِي، جڪو مِنک يردن دريا رَي پيلوڙَي پاݾَي ٿَي ڀيڙو ھتو ھانَ تُو اُوئي رَي بارَي ۾ گواھِي ڏيتو، ھمَي او ڀِي پويتر سِنون ڏَي ھَي ھانَ ݾجائِي مِنک اُوئي ڪڍي جاوَي پڙيا۔“ ‏27 اِيئي تي يُوحنا ڪھيو ڪہ، ”اِنسون نَي اُوئي ٽيم توڻي ڪئين ڪونھي مِلتو، جترِي توڻي ايشوَر اُوئي نَي نِي ڏَي۔ ‏28 ٿي آپ اِيئي بات را گواھ ھو ڪہ مھَي اَي ڪھيو ھتو ڪہ، ’ھُون مَسيح ڪونھي ھون، پڻ ايشوَر مھنَي اُوئي ݾون پيل ميليو ھَي۔‘ ‏29 لاڏِي تو لاڏَي رِي ھووَي ھَي، پڻ لاڏَي رو اَڻوَر اُڀو رَي ھَي ھانَ لاڏَي رِي ھر ھيڪ بات ݾُڻي خُوش ھووَي ھَي، اِيئي نمُونَي ھُون ڀِي تموم گھڻو خُوش ھون۔ ‏30 اَي ضرُور ھَي ڪہ او بڌَي ھانَ ھُون گھٽون۔

‏31 جڪو ماٿَي ݾون آوَي ھَي، او ݾجون ݾون ماٿَي ھَي، پڻ جڪو زمين تي ھَي، او زمين رو ھَي ھانَ او زمين رَي بارَي ۾ بات ڪرَي ھَي، پڻ جڪو آڪاش ݾون آوَي ھَي، او ݾجون ݾون ماٿَي ھَي۔ ‏32 جڪو ڪئين اُوئي ڏيٺو ھانَ ݾُڻيو، اُوئي رِي گواھِي ڏَي ھَي، پڻ مِنک اُوئي رِي گواھِي ڪونھي منتا۔ ‏33 جڪو ڀِي اُوئي رِي گواھِي تي وِشواس راکَي ھَي، تو او اِيئي بات رِي ثابُوتِي ڏَي ھَي ڪہ ايشوَر ݾاچو ھَي، ‏34 ڪيونڪہ جڪَي نَي ايشوَر ميليو ھَي، او ايشوَر رَي باتون ڪرَي ھَي ڪيونڪہ ايشوَر اُوئي نَي بِنا حِساب پويتر آتما ڏَي ھَي۔ ‏35 پِتا، آپرَي ڏيڪرَي ݾون اِترو پريم ڪرَي ھَي ڪہ اُوئي ݾجو ڪئين اُوئي رَي ھاٿ ۾ ڏينو ھَي۔ ‏36 اِيئي رَي ڪري جڪو ڏيڪرَي تي وِشواس راکَي ھَي، اُوئي نَي اَمر جيوَن ملَي ھَي، پڻ جڪو ڏيڪرَي تي وِشواس ڪونھي راکتو، تو اُوئي نَي ڪڏي ڀِي اَمر جيوَن ڪونھي ملَي، پڻ رھندي ايشوَر رو ڪھر اُوئي تي ھميشا رَي ھَي۔“