طلاق نِي ڏيوَڻ رَي بارَي ۾ ݾيکاوڻ
19
جڏي پرڀُو يسُوع اَي باتون ݾيکائي ھئو ڪيئو، تو پَڇي او گليل صُوبَي ݾون بَئير ھوئي يردن دريا رَي ٻيجَي پاݾَي يھُوديا صُوبَي رَي علائقون ۾ گيو۔ 2 اُوئي لاري تموم گھڻا مِنک آوتا پڙيا ھانَ اُوئون ۾ جڪو بيمار ھتا، پرڀُو يسُوع اُوئون نَي اوٿج ݾاجا ڪيئا۔ 3 اُوئي ٽيم ڪئينڪہ فريسي مِنک پرڀُو يسُوع رو آزمُوتو ليوَڻ رَي ݾارُو اُوئي ڪڍي آيا ھانَ پُوڇو ڪہ، ”ڪِي اَي جائز ھَي ڪہ ڪو ڀِي مِنک آپرِي لُگائِي نَي ڪَي بات رَي ڪري طلاق ڏَي؟“ 4 پرڀُو يسُوع بݪتِي ڏينِي ڪہ، ”ڪِي ٿون شاستر ۾ ڪونھي پڙھيو ڪہ ايشوَر اِنسون نَي شرُوع ݾون نَر ھانَ نارِي ٺاھيا 5 ھانَ ڪھيو ڪہ، ’اِيئي رَي ڪري آڏمي آپرَي ما ٻاپ نَي ڇوڙي آپرِي لُگائِي ڀيڙو ريشَي ھانَ او ٻيئي ھيڪ تن ھوشَي۔‘ 6 تو پَڇي او ٻي نا، پڻ ھيڪ ھَي ڪيونڪہ جڪون نَي ايشوَر جوڙيا ھَي، اِنسون اُوئون نَي ڌار نِي ڪرَي۔“ 7 تو فريسي مِنکون پُوڇو ڪہ، ”مُوسيٰ ڪيئون اَي حُڪم ڏينو ھَي ڪہ، ’آڏمي آپرِي لُگائِي نَي طلاق رو ڪاگڏ ڏي ڇوڙي ݾگھَي ھَي؟‘“ 8 پرڀُو يسُوع بݪتِي ڏينِي ڪہ، ”مُوسيٰ ٿونرَي ڪاٺَي من رَي ڪري ٿونَي آپرِي لُگائِي نَي طلاق ڏيوَڻ رِي موڪل ڏينِي ھتِي، پڻ شرُوع ۾ اِيئون ڪونھي ھتو۔ 9 پڻ ھُون ٿونَي ڪونھ ھون ڪہ جڪو ڀِي آپرِي لُگائِي نَي بُڇڙَي ڪوم ݾون ٽاݪ ٻيجِي ڪَي بات رَي ڪري ڦٽِي ڪري، ڪَي ٻيجِي لُگائِي ݾون بيئان ڪرَي ھَي، تو او زنا ڪرَي ھَي [ھانَ جڪو ڦٽِي ڪيئوڙِي لُگائِي ݾون بيئان ڪرَي ھَي، تو او ڀِي زنا ڪرَي ھَي۔“] 10 اَي بات ݾُڻي پرڀُو يسُوع رَي چيلون ڪھيو ڪہ، ”جي ڌڻِي لُگائِي رو آپت ۾ اَي حال ھَي، تو پَڇي پرڻيجڻ نِي کپَي۔“ 11 اِيئي تي پرڀُو يسُوع اُوئون نَي ڪھيو ڪہ، ”ݾجائِي ڪنوارا رئي پاپون ݾون اݪگا رئي ڪونھي ݾگھتا، پڻ رُگو اوج اِيئون ڪري ݾگھَي ھَي جڪون رِي ايشوَر مدد ڪرَي، 12 ڪيونڪہ تموم گھڻَي باتون رَي ڪري مِنک بيئان ڪونھي ڪرتا، گھڻا مِنک جنم ݾون کدڙا ھووَي ھَي، ڪئين اھڙا ھَي جڪون نَي مِنکون بيئان ڪرڻ ڪونھي ڏينو ھانَ ڪئين اھڙا ھَي جڪون آڪاش رِي بادشاھي رَي ڪري بيئان ڪونھي ڪيئو۔ جي ڪينَي اَي بات ݾُٺِي لاگَي، تو ڀلي او اِيئون ڪرَي۔“پرڀُو يسُوع رو ٻاݪون نَي برڪت ڏيوَڻ
13 ھيڪ ڏِن ڪئينڪہ مِنک آپرا ٻاݪيا پرڀُو يسُوع ڪڍي لي آيا ڪہ او اُوئون ماٿَي ھاٿ راکي پراٿنا ڪرَي، پڻ چيلون اُوئون نَي دڙڪا ڏي پاليا۔ 14 پرڀُو يسُوع ڪھيو ڪہ، ”ٻاݪون نَي مھَي ڪڍي آوڻ ڏيئو ھانَ اُوئون نَي پالو نِي، ڪيونڪہ آڪاش رِي بادشاھي اُوئون رَي ݾارُو ھَي جڪو اِيئون ٻاݪون جھڙا ھَي۔“ 15 پَڇي پرڀُو يسُوع ٻاݪون ماٿَي آپرو ھاٿ راکي پراٿنا ڪِي ھانَ پَڇي اوٿ ݾون بُوئو گيو۔
شاھُوڪار ھانَ ايشوَر رِي بادشاھي
16 ھيڪ مِنک پرڀُو يسُوع ڪڍي آيو ھانَ اُوئي پُوڇو ڪہ، ”گُرو جِي، ھُون ڪھڙو ݾُٺو ڪوم ڪرون جڪَي ݾون ايشوَر مھنَي اَمر جيوَن ڏَي؟“ 17 پرڀُو يسُوع اُوئي نَي بݪتِي ڏينِي ڪہ، ”تُو مھَي ݾون ݾُٺَي ڪوم رَي بارَي ۾ ڪيئون پُوڇَي ھَي؟ ݾُٺو تو رُگو ايشوَر ھَي۔ جي ٿنَي اَمر جيوَن کپَي، تو ايشوَر رَي حُڪمون تي بَي۔“ 18 اُوئي پُوڇو ڪہ، ”ڪيا حُڪم؟“ پرڀُو يسُوع اُوئي نَي بݪتِي ڏينِي ڪہ، ”خُون نِي ڪر، زنا نِي ڪر، چورِي نِي ڪر، ڪُوڙِي ݾاک نِي ڀر، 19 آپرَي ما ٻاپ رِي عِزت ڪر ھانَ آپرَي پاڙَي آݪَي ݾون آپ جِترو پريم ڪر۔“ 20 اِيئي تي اُوئي نوجوان ڪھيو ڪہ، ”ھُون تو اِيئون ݾجون حُڪمون تي اَگي ݾون بون پڙيو، تو پَڇي ھمَي مھَي ۾ ٻيجِي ڪھڙِي گھٽتائِي ھَي؟“ 21 پرڀُو يسُوع اُوئي نَي ڪھيو ڪہ، ”جي ٿارِي مرضِي ھَي ڪہ ٿَي ۾ ڪو گھٽتائِي نِي رَي، تو پَڇي تُو جا ھانَ آپرِي ݾجِي ملڪيت بيچي اُوئي را رُپيا غريبون ۾ بِݪا، تو ٿنَي آڪاش ۾ خزونو ملشَي ھانَ پَڇي آئي مھارَي لاري بَي۔“ 22 جڏي اُوئي نوجوان پرڀُو يسُوع رِي اَي بات ݾُڻِي، تو او پريشون ھوئي بُوئو گيو، ڪيونڪہ او موٽو شاھُوڪار ھتو۔ 23 پَڇي پرڀُو يسُوع آپرَي چيلون نَي ڪھيو ڪہ، ”ھُون ٿونَي ݾاچِي ڪونھ ھون ڪہ شاھُوڪار مِنک رو آڪاش رِي بادشاھي ۾ جاوڻ تموم گھڻو ڏُکيو ھَي۔ 24 ھُون ٿونَي ڀڙي ڪونھ ھون ڪہ اِيئي ۾ ڪو ڀِي شَڪ ڪونھي ڪہ اُونٺ رو ݾُئِي رَي ناڪَي ۾ لنگھڻ تو ڏُکيو ھَي، پڻ شاھُوڪار مِنک رو ايشوَر رِي بادشاھي جاوڻ اُوئي ݾون ڀِي وڌيڪ ڏُکيو ھَي۔“ 25 جڏي چيلون اَي ݾُڻيو، تو او تموم گھڻا حيرون ھويا ھانَ ڪيوَڻ لاگا ڪہ، ”تو پَڇي ڪينَي مُگتي ملشَي؟“ 26 پرڀُو يسُوع اُوئون ڏيݾا ڌھيون ݾون جوئي ڪھيو ڪہ، ”اَي ڪوم اِنسون رَي وَس ݾون ٻاھر ھَي، پڻ ايشوَر ݾجو ڪئين ڪري ݾگھَي ھَي۔“ 27 تو پطرس پُوڇو ڪہ، ”جوئو، مھي ݾجو ڪئين ڇوڙي ٿون لاري بون پڙيا، تو پَڇي مھونَي ڪِي ملشَي؟“ 28 پرڀُو يسُوع بݪتِي ڏينِي ڪہ، ”ھُون ٿونَي ݾاچِي ڪونھ ھون ڪہ جڏي ھُون مُنش پُتر آوڻ آݪَي نُوئَي زمونَي ۾ آپرَي مھما آݪَي تخت تي ٻيݾين، تو ٿي مھارا ٻارھَي چيلا ٻارھَي تختون تي ٻيݾي اِسرائيلي قوم رَي ٻارھون قبيلون را فيصلا ڪرشو۔ 29 اِيئي نمُونَي جڪو مھارَي ڪري آپرو گھر، ٻين ڀائي، ما ٻاپ، اولاد ھانَ آپرو ٻنِي ٻارو ڇوڙَي ھَي، تو اُوئي نَي ݾئو گُھمرا وڌيڪ ملشَي ھانَ اُوئي نَي اَمر جيوَن ڀِي ملشَي۔ 30 پڻ تموم گھڻا مِنک جڪو ھڻون آگھي ھَي، او لاري ھوشَي ھانَ جڪو لاري ھَي او آگھي ھوشَي۔“