ݾجون ݾون موٽو ڪُڻ؟
18
پَڇي پرڀُو يسُوع را چيلا اُوئي ڪڍي آيا ھانَ پُوڇڻ لاگا ڪہ، ”آڪاش رِي بادشاھي ۾ ݾجون ݾون موٽو ڪُڻ ھَي؟“ 2 اِيئي تي پرڀُو يسُوع ھيڪَي ٻاݪ نَي اَڻائي اُوئون رَي بِچ ۾ اُڀاڙيو 3 ھانَ ڪھيو ڪہ، ”ھُون ٿونَي ݾاچِي ڪونھ ھون ڪہ جترِي توڻي ٿي بدليجي ٻاݪ جھڙا ڪونھي ھوئو، اُترِي توڻي آڪاش رِي بادشاھي ۾ ڪڏي ڀِي جائي ڪونھي ݾگھتا۔ 4 پڻ آڪاش رِي بادشاھي ۾ ݾجون ݾون موٽو او ھَي، جڪو آپنَي اِيئي ٻاݪ آݪِي ڪار نِنيو ݾمجَھي ھَي 5 ھانَ جڪو ڀِي اُوئون نِنيون ۾ ڪَي ھيڪَي نَي مھارَي نون تي قبُول ڪرَي ھَي، تو او مھنَي قبُول ڪرَي ھَي۔“گُھمراھ ڪراوڻ آݪَي رِي سزا
6 پَڇي پرڀُو يسُوع ڪھيو ڪہ، ”جڪو ڀِي مھَي تي وِشواس راکڻ آݪون، اِيئون نِنيون ۾ ڪَي ھيڪَي نَي گُھمراھ ڪرَي ھَي، تو اُوئي رَي ݾارُو ݾُٺو اَي ھوشَي ڪہ اُوئي رَي گݪَي ۾ گھٽِي رو پُڙ ٻونڌي اُوئي نَي ݾمُوندر ۾ نوکيو جاوَي۔ 7 اِيئي جگت را مِنک ضرُور گُھمراھ ھوئي پاپون ۾ ڦاݾي جاشَي، پڻ ڏُک ھَي اُوئي مِنک تي جڪَي رَي ڪري او گُھمراھ ھوشَي۔ 8 جي ٿارو ھاٿ جون پگ پاپ ڪراوَي، تو اُوئي نَي باڍي اݪگو اُڇلائي ڇوڙ، ڪيونڪہ ٻيئون ھاٿون پگون ݾون نرگ رَي باݾڏي ۾ جاوڻ ݾون ݾُٺو اَي ھَي ڪہ تُو ٺُونٺو جون لُولھو ھوئي ݾُرگ ۾ جاوَي۔ 9 جي ٿارِي اونک ٿَي ݾون پاپ ڪراوَي، تو اُوئي نَي ڪاڍي اݪگِي اُڇلا، ڪيونڪہ ٻيئون اونکيون ݾون نرگ رَي باݾڏي ۾ جاوڻ ݾون ݾُٺو اَي ھَي ڪہ تُو ڪوڻو ھوئي ݾُرگ ۾ جاوَي۔“
گُميجوڙِي رڍ رو مِثال
10 پَڇي پرڀُو يسُوع ڪھيو ڪہ، ”ھوشيار رھيا، اِيئون نِنيون ۾ ڪَي ڀِي ھيڪَي نَي گھٽ نِي ݾمجھا، ڪيونڪہ ھُون ٿونَي ڪونھ ھون ڪہ اِيئون را فريشتا آڪاش ۾ ھر ٽيم مھارَي آڪاشِي پِتا آگھي حاضر اُڀا ھَي۔ 11 [ڪيونڪہ ھُون مُنش پُتر گُميجوڙون نَي جوئڻ ھانَ اُوئون نَي مُگتي ڏيوَڻ آيو ھون۔] 12 ٿونرو ڪھڙو خيال ھَي؟ جي ڪَي مِنک ڪڍي ݾئو رڍون ھووَي ھانَ اُوئون ۾ ھيڪ گُميجَي رِي، تو ڪِي او نَوانوي رڍون نَي جبلون ۾ ڇوڙي اُوئي گُميجوڙِي رڍ نَي ڪونھي جووَي؟ 13 ھُون ٿونَي ݾاچِي ڪونھ ھون ڪہ جڏي او رڍ لاڌَي ھَي، تو او نَوانوي جڪو گُميجَي ڪونھي، اُوئي ھيڪِي رڍ رَي ڪري تموم گھڻو خُوش ھوشَي۔ 14 اِيئي نمُونَي ٿونرَي آڪاشِي پِتا رِي مرضِي ڪونھي ڪہ اِيئون نِنيون ۾ ڪو ڀِي ھيڪ گُميجَي۔“
آپرَي ڏوھي ڀائي نَي ݾمجھاوڻ
15 پَڇي پرڀُو يسُوع ڪھيو ڪہ، ”جي ٿارو ڀائي ٿارو ڪو ڏوھ ڪرَي، تو اُوئي نَي آپرَي مُونھ لي جائي ݾمجھا۔ جي او ٿارِي بات منَي، تو ݾمجھي ڪہ ٿنَي ٿارو ڀائي پاڇو مِليو رو۔ 16 جي او ٿارِي بات نِي ݾُڻَي، تو آپ ڀيڙا ھيڪ جون ٻي مِنک اُوئي ڪڍي لي جا ڪہ ٻيئون جون تينون گواھون رَي رُوبرو ݾجو ڏوھ اُوئي تي ثابت ھووَي۔ 17 جي او اُوئون رِي نِي ݾُڻَي، تو تُو وِشواسي مَنڊلِي نَي ݾُڻا۔ جي او اُوئون رِي بات نِي ݾُڻَي، تو تُو اُوئي ݾون واسطو نِي راک ھانَ ݾمجھ ڪہ او ٻيجِي قوم آݪو ھَي ھانَ ناڪو ليوَڻ آݪون جھڙو ھَي، جڪو ايشوَر نَي ڪونھي منتا۔“
پرڀُو يسُوع رو چيلون نَي اِختياري ڏيوَڻ
18 پَڇي پرڀُو يسُوع ڪھيو ڪہ، ”ھُون ٿونَي ݾاچِي ڪونھ ھون ڪہ جڪو ڪئين ٿي ڌرتي تي بند ڪرشو، تو او آڪاش ۾ بند ڪيئو جاشَي ھانَ جڪو ٿي ڌرتي تي کولشو، تو او آڪاش ۾ کوليو جاشَي۔ 19 ھُون ٿونَي اَي ڀِي ڪونھ ھون ڪہ جي ٿون ۾ ڪو ٻي مِنک ڀيڙا ھوئي ڌرتي تي ڪَي بات رَي ݾارُو پراٿنا ڪرشَي، تو مھارو آڪاشِي پِتا ٿونرَي ݾارُو او ڪوم ڪرشَي، 20 ڪيونڪہ جيٿ ٻي جون تين مھارَي نون ݾون ڀيڙا ھوشَي، تو ھُون اوٿ اُوئون ڀيڙو ھون۔“
معاف نِي ڪرڻ آݪَي غُلوم رو مِثال
21 پَڇي پطرس پرڀُو يسُوع ڪڍي آئي پُوڇو ڪہ، ”اي پرڀُو، جي مھارو ڀائي گھڙِي گھڙِي مھارو ڏوھ ڪرَي، تو ھُون اُوئي نَي گھڻا گُھمرا معاف ڪرون؟ ڪِي ݾات گُھمرا؟“ 22 پرڀُو يسُوع بݪتِي ڏينِي ڪہ، ”ھُون اَي ڪونھي ڪيتو ڪہ رُگو ݾات گُھمرا، پڻ ݾتھتر گُھمرا، 23 ڪيونڪہ آڪاش رِي بادشاھي رِي مِثال اِيئون ھَي ڪہ ھيڪَي بادشاھ آپرَي غُلومون ݾون حِساب ليوَڻ رو فيصلو ڪيئو۔ 24 جڏي حِساب ڪرڻ لاگو، تو اُوئي ڪڍي ھيڪ اھڙو غُلوم لي آيا جڪو لَکون رُپيون رو قرضِي ھتو۔ 25 پڻ اُوئي ڪڍي اترِي رقم ڪونھي ھتِي ڪہ او قرض ڀرَي۔ تو اُوئي رَي مالڪ حُڪم ڏينو ڪہ، ’اِيئي نَي لُگائِي ھانَ ٻاݪون ݾُوڌو بيچو ھانَ جڪو ڪئين اِيئي ڪڍي ھَي، او ڀِي بيچي مھارو ݾجو قرض پُورو ڪرو۔‘ 26 اِيئي تي غُلوم آپرَي مالڪ رَي پگون ۾ کِري مِنٿ ڪري ڪھيو ڪہ، ’مھنَي موھلت ڏيئو، تو ھُون ٿونرو ݾجو قرض ڀري ڏئين۔‘ 27 مالڪ نَي اُوئي تي دايا آئِي ھانَ اُوئي نَي ڦِٽو ڪيئو ھانَ ݾجو قرض معاف ڪري ڇوڙيو۔
28 پَڇي جڏي او غُلوم ٻاھر نڪريو، تو آپ ڀيڙو ڪوم ڪرڻ آݪو ھيڪ غُلوم ڀيڙو ھويو، جڪَي ڏيݾا اُوئي را چوندِي را ݾئو ݾِڪا قرض ھتو۔ اُوئي، اُوئي نَي جھالي گُھٽو ڏينو ھانَ ڪھيو ڪہ، ’مھارو قرض مھنَي پاڇو ڏي۔‘ 29 اِيئي تي او اُوئي رَي پگون ۾ کِري مِنٿ ڪري ڪيوَڻ لاگو ڪہ، ’مھنَي موھلت ڏي، تو ھُون ٿارو قرض پاڇو ڏئين۔‘ 30 پڻ اُوئي، اُوئي رِي ڪو ڀِي بات ڪونھي ݾُڻِي ھانَ اُوئي نَي جيل ۾ ھڻايو جترِي توڻي او ݾجو قرض پاڇو نِي ڏَي۔
31 جڏي ٻيجون غُلومون اَي ڏيٺو، تو اُوئون نَي تموم گھڻو ڏُک ھويو ھانَ جائي ݾجِي بات آپرَي مالڪ نَي ݾُڻائِي۔ 32 اِيئي تي مالڪ اُوئي غُلوم نَي اَڻائي ڪھيو ڪہ، ’اي بُڇڙا، مھَي تو ٿارو ݾجو قرض معاف ڪيئو ھتو، ڪيونڪہ ٿَي مھنَي مِنٿ ڪِي ھتِي۔ 33 جون مھَي ٿَي تي دايا ڪِي ھتِي، تو ڪِي تُو ڀِي آپ ڀيڙو ڪوم ڪرڻ آݪَي تي دايا ڪري ڪونھي ݾگھتو؟‘ 34 پَڇي اُوئي رو مالڪ تموم گھڻو ڪاوڙيو ھانَ حُڪم ڏينو ڪہ، ’اِيئي نَي جيل ۾ گھاتو، جترِي توڻي اَي مھارو ݾجو قرض نِي ڀرَي، اُترِي توڻي سزا ڏيتا رو۔‘
35 اِيئي نمُونَي جي ٿون ۾ ھر ھيڪ آپرَي ڀائي نَي ݾاچَي من ݾون معاف ڪونھي ڪرَي، تو مھارو آڪاشِي پِتا ڀِي ٿون ݾون اِيئوج ڪرشَي۔“