گُميجوڙِي رڍ رو مِثال
15
ݾجائِي ناڪو ليوَڻ آݪا ھانَ پاپي مِنک پرڀُو يسُوع رَي باتون ݾُڻڻ رَي ݾارُو اُوئي ڪڍي آوتا۔ 2 فريسي ھانَ ڌرمي گُرو آپت ۾ ڪيوَڻ لاگا ڪہ، ”اَي مِنک پاپيون ݾون ملَي ھَي ھانَ اُوئون ڀيڙو کاوَي پيئَي ھَي۔“3 اِيئي تي پرڀُو يسُوع اُوئون نَي ھيڪ مِثال ڏي ڪھيو ڪہ، 4 ”جي ٿون ۾ ڪَي ڪڍي ݾئو رڍون ھووَي ھانَ اُوئون ۾ ھيڪ گُميجَي رِي، تو او ڪِي ڪرشَي؟ او نَوانوي رڍون نَي ميدون ۾ ڇوڙي اُوئي گُميجوڙِي رڍ نَي اُترِي توڻي جوتو ريشَي، جترِي توڻي او نِي لاڌَي۔ 5 پَڇي جڏي او رڍ لاڌَي ھَي، تو او خُوش ھوئي اُوئي نَي کوئَي تي کڻَي ھَي۔ 6 پَڇي گھري پُگي دوستون ھانَ گون آݪون نَي ھيلو ڪري ڪَي ھَي ڪہ، ’مھَي ڀيڙا ھوئي خُوشِي ملھائو، ڪيونڪہ مھارِي گُميجوڙِي رڍ لاڌِي ھَي۔‘ 7 ھُون ٿونَي ڪونھ ھون ڪہ اِيئي نمُونَي نَوانوي نيڪ مِنکون، جڪون نَي توبھون ڪرڻ رِي ضرُورت ڪونھي، اُوئون رِي ڀيٽ ۾ ھيڪَي توبھون ڪرڻ آݪَي پاپي رَي ڪري آڪاش ۾ تموم گھڻِي خُوشِي ھوشَي۔“
گُميجوڙَي ݾِڪَي رو مِثال
8 پَڇي پرڀُو يسُوع ڪھيو ڪہ، ”جي ھيڪِي لُگائِي ڪڍي چوندِي را ڏَݾ ݾِڪا ھووَي ھانَ اُوئون ۾ ھيڪ ݾِڪو گُميجَي رو، تو او ڪِي ڪرشَي؟ تو او لُگائِي ڏِيئو ٻاݪي گھر ۾ ٻونگھرِي ڏيشَي ھانَ اُترِي توڻي جوتِي ريشَي، جترِي توڻي او نِي لاڌَي۔ 9 پَڇي جڏي او ݾِڪو لاڌَي ھَي، تو او آپرَي ݾاٿڻڪيون نَي ھانَ گون آݪون نَي ھيلو ڪري ڪشَي ڪہ، ’مھَي ڀيڙا خُوشِي ملھائو، ڪيونڪہ مھارو گُميجوڙو ݾِڪو مھنَي لاڌو رو۔‘ 10 ھُون ٿونَي ڪونھ ھون ڪہ اِيئي نمُونَي جڏي ھيڪ پاپي توبھون ڪرَي ھَي، تو اُوئي رَي ڪري ايشوَر آپرَي فريشتون ڀيڙو خُوشِي ملھاوَي ھَي۔“
گُميجوڙَي ڏيڪرَي رو مِثال
11 پَڇي پرڀُو يسُوع ڪھيو ڪہ، ”ھيڪَي مِنک را ٻي ڏيڪرا ھتا۔ 12 نِنئي ڏيڪرَي آپرَي ٻاپ نَي ڪھيو ڪہ، ’اَبا، ملڪيت ۾ جڪو ڀِي مھارو حِصو ھَي، او مھنَي ڏي۔‘ اِيئي تي اُوئي رَي ٻاپ آپرِي ملڪيت ٻيئون ڏيڪرون ۾ بِݪائي ڇوڙِي۔ 13 ڪئينڪہ ڏِنون ݾون پَڇي نِنيو ڏيڪرو آپرو ݾجو ڪئين لي ڪَي اݪگَي مُلڪ بُوئو گيو ھانَ اوٿ آپرِي ملڪيت ڀُونڏَي ڪومون ۾ اُڏائي ڇوڙِي 14 ھانَ اُوئي رو ݾجو ڪئين ختم ھوئي گيو۔ اُوئون ڏِنون ۾ اُوئي مُلڪ ۾ تموم گھڻو ڏُڪاݪ پڙيو ھانَ او بُوک مرڻ لاگو۔ 15 تو او اُوئي مُلڪ رَي ھيڪَي مِنک ڪڍي مزُورِي ڪرڻ گيو ھانَ اُوئي مِنک اُوئي نَي آپرِي ٻنِي ۾ ݾُوئر چارڻ رو ڪوم ڏينو۔ 16 اوٿ اُوئي نَي ڪو ڀِي ٻاٽِي ڪونھي ڏيتو، اِيئي رَي ڪري اُوئي رو من ڪرتو ڪہ جڪو ڦݪَي ݾُوئر کاوَي ھَي، اُوئون ݾون آپرو پيٽ ڀرَي، پڻ او ڀِي اُوئي نَي ڪونھي ملتَي۔ 17 پَڇي اُوئي آپرَي من ۾ ݾوچو ڪہ، ’مھارَي اَبا رَي نوڪرون نَي ڍئو ݾون ٻاٽِي ملَي ھَي، پڻ ھُون تو ايٿ بُوکي مرون ھون۔ 18 ھمَي ھُون آپرَي اَبا ڪڍي جائين ھانَ اُوئي نَي ڪئين ڪہ اَبا، ھُون ايشوَر رو ھانَ ٿارو ڏوھي ھون۔ 19 ھُون اِيئي لائق ڪونھي ڪہ ھمَي ٿارو ڏيڪرو ڪھيجون، پڻ دايا ڪري مھنَي آپرو نوڪر ڪري راک۔‘ 20 او اَي ݾوچي آپرَي ٻاپ ڏيݾا جاوڻ لاگو۔ جڏي اُوئي رَي ٻاپ آپرَي ڏيڪرَي نَي اݪگِي ڀون ݾون آوتو ڏيٺو، تو اُوئي نَي آپرَي ڏيڪرَي تي دايا آئِي ھانَ ناݾي جائي اُوئي ڪڍي گيو ھانَ ٻاٿ گھاتي ميٺکَي ڏينَي۔ 21 ڏيڪرَي اُوئي نَي ڪھيو ڪہ، ’اَبا، ھُون ايشوَر رو ھانَ ٿارو ڏوھي ھون۔ ھُون ھمَي اِيئي لائق ڀِي ڪونھي ڪہ ٿارو ڏيڪرو ڪھيجون۔‘ 22 ٻاپ آپرَي غُلومون نَي ڪھيو ڪہ، ’ڇيڪا ھوئي ڦُوٽرَي ݾون ڦُوٽرا گاڀا اِيئي نَي پيرائو ھانَ پگون ۾ جُتا ھانَ ھاٿ ۾ بيٽِي پيرائو۔ 23 پَڇي جائو ھانَ ھيڪ موٽو پھرُو باڍي ݾُٺو طعوم تيار ڪرو ڪہ آپي ڀيڙا کائُون ھانَ خُوشِي ملھائُون۔ 24 ڪيونڪہ مھارو اَي ڏيڪرو مُوئو ھتو، ھمَي جيتو ھويو ھَي، گُميجو ھتو، ھمَي لاڌو ھَي۔‘ پَڇي او خُوشِي ڪرڻ لاگا۔
25 اُوئي ٽيم موٽو ڏيڪرو جڪو ٻنِي تي گيوڙو ھتو۔ جڏي او گھر رَي نيڙو پُگو، تو اُوئي نَي گاوڻ بجاوڻ رو ھاڪو ݾُڻڻ ۾ آيو۔ 26 تو اُوئي ھيڪَي نوڪر نَي ھيلو ڪري پُوڇو ڪہ، ’اَي ڪھڙو ھاڪو ھَي؟‘ 27 نوڪر ڪھيو ڪہ، ’ٿارو نِنيو ڀائي خيريت ݾون پاڇو گھري آيو ھَي، اِيئي رَي ڪري ٿارَي اَبا، اُوئي رِي خُوشِي ۾ موٽو تازو پھرُو بڍايو ھَي۔‘ 28 اَي ݾُڻي اُوئي نَي تموم گھڻِي ريݾ آئِي ھانَ گھري جاوڻ ݾون اِنڪار ڪيئو۔ پَڇي اُوئي رو ٻاپ گھر ݾون ٻاھر آيو ھانَ اُوئي نَي ݾمجھاوڻ لاگو۔ 29 اُوئي آپرَي ٻاپ نَي ڪھيو ڪہ، ’جوئو، ھُون اترَي ݾالون ݾون ٿارِي شيوا ڪرون پڙيو ھانَ مھَي ھميشا ٿارو حُڪم منيو ھَي۔ پڻ ٿَي مھنَي ڪڏي ڀِي ٻڪرِي رو ھيڪ ڦݪ ڀِي ڪونھي ڏينو ڪہ ھُون جائي آپرَي دوستون ڀيڙو خُوشِي ملھائُون۔ 30 پڻ جڏي ٿارو اَي ڏيڪرو آيو ھَي جڪَي ٿارِي ݾجِي ملڪيت خراب ڪومون ۾ اُڏائي ڇوڙِي ھَي، تو ٿَي اُوئي رَي ݾارُو موٽو پھرُو بڍايو ھَي۔‘ 31 اِيئي تي اُوئي رَي اَبا اُوئي نَي ڪھيو ڪہ، ’ڏيڪرا، تُو تو ھميشا مھَي ڀيڙو ھَي ھانَ جڪو ڪئين مھارو ھَي، او ݾجو ڪئين ٿارو تو ھَي۔ 32 پڻ اَي خُوشِي ڪرڻ آپون ݾجون رَي ݾارُو ضرُوري ھتِي، ڪيونڪہ ٿارو اَي ڀائي جڪو مُوئو ھتو، ھمَي جيتو ھويو ھَي ھانَ گُميجو ھتو ھمَي لاڌو ھَي۔‘“