چالاڪ مُنڇِي رو مِثال
16
پَڇي پرڀُو يسُوع آپرَي چيلون نَي ڪھيو ڪہ، ”ڪَي زميندار رو ھيڪ مُنڇِي ھتو۔ مِنکون مُنڇِي رِي گِلا ڪري زميندار نَي ڪھيو ڪہ، ’مُنڇِي دوکَي ݾون ٿارِي ملڪيت کاوَي پڙيو۔‘ 2 اِيئي تي زميندار مُنڇِي نَي اَڻائي پُوڇو ڪہ، ’ھُون ٿارَي بارَي ۾ ڪھڙَي باتون ݾُڻون پڙيو؟ آپرَي ݾجَي ڪوم رو حِساب ڏي، ڪيونڪہ آج ݾون پَڇي ھُون ٿنَي مُنڇِي ڪونھي راکتو۔‘ 3 مُنڇِي آپرَي من ۾ ݾوچو ڪہ، ’ھمَي ھُون ڪِي ڪرون؟ ڪيونڪہ مھارو مالڪ مھَي ݾون مُنڇپائِي لَي پڙيو ھانَ ٻنِي ٻارو تو مھَي ݾون ھووَي ڪونھي ھانَ پِنڻ ݾون مھنَي لاج آوَي ھَي۔ 4 ھمَي مھنَي اھڙو ڪوم ڪرڻ کپَي جي مھارِي مُنڇپائِي ختم ڀِي ھوئي جاوَي، تو مِنک مھنَي خُوشِي ݾون آپرَي گھري آوڻ ڏَي۔‘ 5 پَڇي مُنڇِي آپرَي مالڪ رَي ݾجون قرضيون نَي ھيڪ ھيڪ ڪري ھيلو ڪيئو۔ پَڇي اُوئي پيلڪَي قرضِي ݾون پُوڇو ڪہ، ’ٿَي تي مھارَي مالڪ رو ڪِترو قرض ھَي؟‘ 6 اُوئي ڪھيو ڪہ، ’ݾئو مَڻ تيل را۔‘ تو مُنڇِي اُوئي قرضِي نَي ڪھيو ڪہ، ’اَي لَي کاتَي رو ڪِتاب ھانَ ڇيڪائِي ڪري اِيئي ۾ گھٽ ڪري پنجاھ مَڻ لِک را۔‘ 7 پَڇي اُوئي ٻيجَي قرضِي نَي اَڻائي پُوڇو ڪہ، ’ٿَي تي ڪِترو قرض ھَي؟‘ اُوئي قرضِي ڪھيو ڪہ، ’مھَي تي پونچ ݾئو مَڻ ڪڻڪ را ھَي۔‘ تو مُنڇِي اُوئي نَي ڪھيو ڪہ، ’اَي لَي کاتَي رو ڪِتاب ھانَ ڇيڪائِي ڪري اِيئي ۾ گھٽ ڪري چار ݾئو مَڻ لِک۔‘ 8 اِيئي تي مالڪ آپرَي بَئيمون مُنڇِي رِي نيڪِي ڪِي، ڪيونڪہ اُوئي چالاڪِي ݾون ڪوم ڪيئو۔ اِيئي نمُونَي جگت را مِنک دُنياوِي ڪومون ۾ ايشوَر رَي مِنکون ݾون وڌيڪ ھوشيار ھَي۔“ 9 پَڇي پرڀُو يسُوع ڪھيو ڪہ، ”ھُون ٿونَي ڪونھ ھون ڪہ اِيئي دُنيا رَي ڌن ݾون غريبون رِي مدد ڪرتا رو ھانَ اِيئي ݾون آپرا دوست ٺائو، تو ٿونَي ݾُرگ ۾ خُوشِي ݾون آوڻ ڏينو جاشَي، ڪيونڪہ ڌن تو مرڻ ݾون پَڇي ڀيڙو ڪونھي ھالَي۔ 10 جڪو ٿوڙَي ۾ ايموندار ھَي او گھڻَي ۾ ايموندار ھوشَي ھانَ جڪو ٿوڙَي ۾ بَئيمون ھَي، او گھڻَي ۾ ڀِي بَئيمون ھوشَي۔ 11 اِيئي رَي ڪري جي ٿي دُنيا رَي ڌن ۾ بَئيمون ھو، تو پَڇي ٿونَي ݾُرگ رو ݾاچو ڌن ڪُڻ ڏيشَي؟ 12 جي ٿي جگت ۾ ڪَي ٻيجِي ملڪيت ۾ ايموندار ڪونھي، تو پَڇي ٿونَي ݾُرگ رِي ملڪيت ڪُڻ ڏيشَي؟ 13 ڪو ڀِي نوڪر ھيڪَي ٽيم ۾ ٻيئون مالڪون رِي شيوا ڪري ڪونھي ݾگھتو، ڪيونڪہ جون تو ھيڪَي رِي گِلا ڪرشَي ھانَ ٻيجَي ݾون پريم ڪرشَي جون ھيڪَي ݾون وفادار ريشَي ھانَ ٻيجَي ݾون دگا ڪرشَي۔ اِيئي نمُونَي ٿي ھيڪَي ٽيم ۾ ايشوَر ھانَ ڌن ٻيئون رِي شيوا ڪري ڪونھي ݾگھتا۔“پرڀُو يسُوع رو فريسي مِنکون نَي ڇينڀڻ
14 فريسي مِنک ڌن ݾون تموم گھڻو پريم ڪرتا، اِيئي رَي ڪري او پرڀُو يسُوع رِي بات ݾُڻي ٺٺولَي ڪرڻ لاگا۔ 15 پرڀُو يسُوع اُوئون نَي ڪھيو ڪہ، ”ٿي او ھو جڪو مِنکون آگھي آپنَي ݾاچا ݾمجھو ھو، پڻ ايشوَر ٿونرَي من نَي اوݪکَي ھَي۔ ڪيونڪہ جڪَي شيون رِي قدر دُنياوِي مِنک ڪرَي ھَي ايشوَر رِي نظر ۾ اُوئي رِي ڪو ڀِي قدر ڪونھي۔“
پرڀُو يسُوع رو شريعت رَي بارَي ۾ ݾيکاوڻ
16 پرڀُو يسُوع ڪھيو ڪہ، ”شريعت ھانَ نبيون رَي باتون پويتر سِنون ڏيوَڻ آݪَي يُوحنا توڻي ھتَي۔ اُوئي ݾون پَڇي ايشوَر رِي بادشاھي رَي بارَي ۾ خُوشِي رِي خبر ݾُڻائِي جاوَي پڙِي ھانَ ھر ھيڪ اُوئي بادشاھي ۾ جاوڻ رَي ݾارُو تموم گھڻِي ڪوشش ڪرَي پڙيو۔ 17 پڻ اِيئي رو اَي مطلب ڪونھي ڪہ شريعت ختم ھوئِي رِي۔ ڌرتي ھانَ آڪاش تو مِٽي ݾگھَي ھَي، پڻ شريعت رو ھيڪ ڀِي آکر مِٽَي ڪونھي۔ 18 مِثال رِي بات، جي ڪُڻ آپرِي لُگائِي نَي ڦٽِي ڪري ٻيجِي لُگائِي ݾون بيئان ڪرَي ھَي، تو او زنا ڪرَي ھَي ھانَ جڪو ڦٽِي ڪيئوڙِي لُگائِي ݾون بيئان ڪرَي ھَي، تو او ڀِي زنا ڪرَي ھَي۔“
اَمير ھانَ لعزر نون رَي غريب رو مِثال
19 پَڇي پرڀُو يسُوع ڪھيو ڪہ، ”ھيڪ اَمير مِنک ھتو جڪو ڦُوٽرا گاڀا پيرتو ھانَ ھروز ݾُٺا ݾُٺا طعوم کاوتو ھانَ تموم گھڻو موج ݾون ريتو۔ 20 اُوئي اَمير مِنک رَي در تي لعزر نون رو ھيڪ غريب مِنک پڙيو ريتو، جڪو ناسُورون ݾون ڀريجوڙو ھتو۔ 21 او اِيئي آݾرَي ۾ ٻيٺو ھتو ڪہ اَمير مِنک رَي بچوڙَي ٽُڪڙون ݾون آپرو پيٽ ڀرَي۔ اترِي توڻي ڪہ ڪُتا ڀِي اُوئي را ڦَٽ چاٽتا۔ 22 پَڇي اِيئون ھويو ڪہ او غريب مري گيو ھانَ فريشتون اُوئي نَي کڻي ݾُرگ ۾ اڀراھيم رَي پاݾَي ۾ ٻيݾاڙيو۔ پَڇي اَمير مِنک ڀِي مُوئو ھانَ مِنکون لي جائي ٻُوري ڇوڙيو۔ 23 او اَمير مِنک نرگ ۾ گيو جيٿ او تموم گھڻو ڏُکون ۾ ھتو۔ پَڇي جڏي اُوئي آپرَي اونکَي کولئَي، تو اݪگِي ڀون ݾون اڀراھيم ڪڍي لعزر نَي ٻيٺوڙو ڏيٺو۔ 24 اِيئي تي اُوئي رَڙ ڪري ڪھيو ڪہ، ’ڏاڏا اڀراھيم، مھَي تي دايا ڪرو ھانَ لعزر نَي ميلو، تو او آپرِي اونگڙِي پوڻي ۾ ٻوڙي مھارِي زِبون نَي ٺارَي، ڪيونڪہ ھُون اِيئي باݾڏي ۾ تڙپون پڙيو۔‘ 25 اڀراھيم ڪھيو ڪہ، ’ڏيڪرا، ياد ڪر ڪہ ٿَي آپرِي زندگِي ۾ آپرَي حِصَي رَي ݾُٺَي ݾُٺَي شيون ليئَي رَي، پڻ لعزر نَي خراب شيون مِلئَي۔ اِيئي رَي ڪري ھمَي ايٿ اَي آروم ۾ ھَي ھانَ تُو ڏُکون ۾ ھَي۔ 26 اِيئي ݾجَي باتون ݾون ٽاݪ ٿونرَي ھانَ مھورَي بِچ ۾ ھيڪ موٽِي کڏ ھَي۔ اِيئي رَي ڪري نَڪو ٿون ۾ ڪو ايٿ آئي ݾگھَي ھانَ نَڪو ايٿ ݾون ڪو اوٿ جائي ݾگھَي۔‘ 27 اَمير مِنک ڪھيو ڪہ، ’ݾاچيلي ڏاڏا، ھُون ٿنَي مِنٿ ڪرون ھون ڪہ ٿي لعزر نَي پاڇو جگت ۾ مھارَي ٻاپ رَي گھري ميلو۔ 28 ڪيونڪہ مھارا پونچ ڀائي ھَي۔ او جائي اُوئون نَي ݾمجھاوَي ھانَ اِيئون باتون رِي گواھِي ڏَي، متان او ڀِي اِيئي ڏُکون رِي جگھا ۾ آوَي۔‘ 29 اڀراھيم اُوئي نَي ڪھيو ڪہ، ’اُوئون ڪڍي توريت شاستر ھانَ نبيون را شاستر تو ھَي۔ او اُوئون نَي پڙھَي ݾُڻَي ھانَ اُوئون تي بَي۔‘ 30 پَڇي اَمير مِنک ڪھيو ڪہ، ’نا ڏاڏا نا، جي ڪو مُوئوڙون ݾون اُوئون ڪڍي جاشَي، تو او توبھون ڪرشَي۔‘ 31 اڀراھيم اُوئي نَي ڪھيو ڪہ، ’جڏي او مُوسيٰ ھانَ نبيون رِي ڪونھي ݾُڻتا، تو پَڇي جي ڪُڻ مُوئوڙون ݾون جيتو ھووَي، تو او اُوئي رِي ڀِي ڪونھي منَي۔‘“