Ya Manga Pigpan-imo' na Manga Apostolés
na pigsulat ni Lukas
| Ya imo-unun | Kapitulu aw birsikulu | Ya manga umay |
| Ya Pagpalekat na Pagkatipun na Manga Mangintu-uway | 1:1-5:42 | A.D. 30-31 |
| Ya Pagkadég na Manga Mangintu-uway na Manga Judiyu | 6:1-9:31 | A.D. 32-35 |
| Ya Manga Pigpan-imo' ni Pédro aw ya Pagpangintu-u la na Manga Héntil | 9:32-12:25 | A.D. 38-44 |
| Ya Pagbekkal na manga taga Antiyokiya sa Madyaw na Ubat-ubat adti Manga Héntil | 12:25-15:35 | A.D. 46-49 /50 |
| Ya manga panaw ni Pablo adti Asia, aw Macédonya, aw Akaya | 15:36-19:20 | A.D. 50-55 |
| Ya manga panaw ni Pablo adti Jérusalim aw adti syudad na Roma | 19:21-28:31 | A.D. 55-62 |
1
Ya Pagpalekat na Pagkatipun na Manga Mangintu-uway
Ya pagka-engat ni Jisus adti tas na langit
1 Kay Tyupilo:
Dun ni tagna' na liblu na pigsulat ku idtu muna, pigpa-ede' ku ya kadég na pigpan-imo' ni Jisus aw ya kadég na pigpalna-u nan, lekat adti pagpalekat na imo-unun nan 2-3 taman na allaw na nya-engat da sakanan adti tas na langit.
Na, pagkatigkas na pagti-is nan dun ni pagkamatay, nyataw sakanan aw migpakita' adti manga apostolés na dadan da nan pigpamalli'. Seled na kapatan ya allaw, pigmatinaw nan na nyataw sakanan lekat adti nyangkamatay, aw gayed nan pigpalna-u kanilan ya paghari' na Tyumanem, aw pigpamene-an nan silan magi sa katulus na Ispiritu na Tyumanem kun unu ya un nilan imo-un. * 4-5 Sa kenne' pa ni Jisus adti tampid nilan, piglongan nan silan, law nan, “Idtu muna na utaw pa si Juan, * migba͡utismu sakanan kamayu sa tubig, manang dili' madugay ba͡utismuwan kamu sa Ispiritu na Tyumanem. Yanagaw dili' pa kamu mag-indeg asini Jérusalim manang tagadi mayu baling ya pigpakang dadan na Ama ku, na yan ya pigpakang nan na un atag kamayu ya Ispiritu na Tyumanem, siling na piglong ku kamayu idtu muna.”
6 Pagkatipun da uman nilan, nyusip silan kan Jisus, law nilan, “Unu la, kay Magpalna-uway, paluwa-en da mu adun ya sakup na Isra-él aw ikaw da ya maghari'?”
7 Aw tyumubag si Jisus, “Wala' tumbayan kamayu ya pagka-ede' kun kinunu ya paghari' na Tyumanem asini tas na lupa', kay ya Ama ku yan da ya magbaya' sa kadég. 8 Manang dun ni allaw na pagdateng na Ispiritu na Tyumanem adti kadég mayu, matagtun da mayu ya katulus na Tyumanem. Yanagaw pagmatinawun aku mayu asini Jérusalim, aw adti kadakula' na probinsiya na Judiya aw banwa na Samariya, aw pangkay adti kadakula' na banwa.”
9 Pagkatigkas ni Jisus maglong kanilan, nya-engat sakanan talana nilan tyandawan, aw nyakaselep sakanan adti labun. 10 Sa kenne' pa nilan lyumangad adti langit, bigla' nyindeg dun ni sayid nilan ya duwa ya anghil na syumut sa kadégkadég na alag maputi'. 11 Aw law nilan, “Kay manga taga Galiliya, ananga' kenne' pa mayu mig-indeg-indeg asini aw lyumangad adti langit? Si Jisus yeiy nya-engat lekat adti kamayu pasinan adti tas na langit, aw dumateng ya allaw na lumiku' sakanan, aw maynini uman ya pagliku' nan.”
Ya pagpamalli' na manga apostolés sa pagsayu kan Judas
12 Na, ya kadég yeiy nya-imo' adti buntud na pigngalanan na Olibo adti dipag na syudad na Jérusalim. Aw tigkas yan, lyumiku' ya manga apostolés adti Jérusalim, aw ya kawat na pigpanawan nilan sang ka kilomitro. * 13 Aw syumeled silan adti bantukanan aw nyanik adti kadwa na kansad na gibalayan. Aw migkatipun silan si Pédro, aw si Juan, aw si Santiago, aw si Andrés, aw si Pilipé, aw si Tomas, aw si Baltolomi, aw si Matiyo, aw si Santiago na ise' ni Alpiyo, aw si Simon na nyakasakup dadan adti partido na manga Zéloti, * aw si Judas na ise' ni Santiago. 14 Aw migsambuk ya anenganeng nilan aw gayed nyatibulluk nyanawagtawag adti Tyumanem. Aw dun uman ya manga umagakan ni Jisus na ka͡ubayan, aw si Maria na ina nan, aw ya manga mangud ni Jisus na eseg.
15 Sambuk na allaw yan, migkatipun ya manga sanggatus aw kaluwa͡an ya manga mangintu-uway kan Jisus. Aw nyindeg si Pédro aw miglong dun ni kadég nilan, law nan,
16-17 “Kay manga inulug ku, asini muna pigsulat dadan ni Dabid magi sa katulus na Ispiritu na Tyumanem ya un ka-agiyan ni Judas, aw ya pigsulat nan nyatuman da adun na bagu. Si Judas, yan ya sambuk na eped nami na pigpamalli' ni Jisus na un mag-imo' sa manga imo-unun na Tyumanem, manang pigtultulan nan baling ya manga utaw na migdakep kan Jisus.” 18 Na, yeiy ya nya-imo' kan Judas: Ya tandan kanan sa sala' na pig-imo' nan, pigbayad nan sa lupa'. Aw adti lupa' na pigbayadan nan, dun sakanan tuyu'. Nyolug lekat adti kawuy na pigtuyu-an nan aw nyakadakdak adti lupa' aw nyutu' ya buntit nan aw lyumuwa' da ya tinay nan. 19 Pagdengeg da na manga utaw na nyeya' adti Jérusalim sa kyagamakan ni Judas, pigngalanan nilan ya lupa' yan na Akéldama. Ya kakawasan nan: Ya lupa' na pigbayadan na dugu'.
20 Migpadeleg pa si Pédro miglong,
“yeiy ya pigsulat asini muna dun ni Salmo:
‘Pabaya-an da na kadég na manga utaw ya kanan eya-anan.
Aw wala' da ya un pa-eya-en dun ni lupa' yan.’ *
Aw pigsulat da uman,
‘Madyaw awun sumayu sa katundanan nan.’ ”*
21-22 Law uman ni Pédro,
“Yanagaw madyaw kun awun sambuk uman na eseg na un ma-imo' apostol eped nami aw magmatinaw sa pagkataw ni Jisus na kanaten pangulu lekat adti pagkamatay. Aw ya umba' pamalli-en, yan ya sambuk na utaw na nyaka-iyeped kanami aw nyakataligpunu' lekat adti allaw na pagba͡utismu ni Juan kan Jisus taman na allaw na nya-engat si Jisus adti tas na langit.”
23 Yanagaw pigbetang nilan ya ngalan na duwa ya eseg na pamalli-enen. Ya sambuk, yan si José na pigngalanan uman na si Bar Sabbas. Ya sagnay nan, si Justo. Aw ya sambuk na eseg, yan si Matiyas. 24 Tigkas yan, nyanawagtawag silan, law nilan, “Kay Jisus na pangulu na awun ni tas na langit: Kya-ede-an mu ya anenganeng na kadég na utaw. Pa-ede-a kami beg kun singan kanilan duwa ya pigpamalli' da mu 25 na ma-imo' apostol na un sumayu kan Judas. Kay pig-ayawan ni Judas ya katundanan nan aw adtu la ni malat na dyatengan nan.”
26 Aw tigkas yan, mig-ublut-ublut silan, aw kan Matiyas ngalan ya kya-ublutan, aw nya-imo' sakanan apostol eped na sampulu' tagesya'.