Ya Sulat ni Apostol Pablo
adti Manga Taga Galacia
Ya Pagpa-ede'
Si Pablo yan ya migsulat adti manga utaw na nyangintu-u dun ni probinsiya na Galacia. Pigsulatan nan silan dun ni manga allaw na migpalna-u si Pablo aw si Bérnabi sa manga mangintu-uway na awun ni syudad na Antiyokiya (mabasa ta adti Buhat 14:26-28, na yan ya Manga Pigpan-imo' na Manga Apostolés).
Yan ya du-an nan na migsulat si Pablo adti manga taga Galacia kay kaliman nan sayuwan ya palna-u na galu' na eped na utaw. Kay madég ya manga utaw dun na bagu pa nyangintu-u kan Kristu asuntu sa palna-u ni Pablo aw si Bérnabi idtu na tagna' na pagpanaw nilan adti manga syudad na Pisidiyan Antiyokiya, aw Ikoniyo, aw Listra, aw Dérbi. Manang sa wala' pa si Pablo liku' adti tampid nilan, awun eped na manga utaw na Judiyu na pigdali-an nilan na galu' ya palna-u ni Pablo idtu muna. Yanagaw to-o nyadaman si Pablo kanilan, aw asini sulat ini, pigdegdeg nan ya manga mangintu-uway dun ni Galacia na kele͡an nilan ya palna-u na galu'.
Aw ya palna-u ni Pablo asini sulat ini, palna-u saba adti kadég na utaw na nyangintu-u. Kay yan ya pigpalna-u nan na beke' da kitadun na allang na Uldin na manga Judiyu, pangkay Judiyu kitadun aw beke' na Judiyu. Kun awun utaw na maglong na dawaten na Tyumanem ya manga utaw asuntu sa imo-unun nilan na madyaw, yan ya palna-u na galu'. Kay piglong ni Pablo asini sulat nan ini na asuntu olo' sa kallat na Tyumanem aw pig-imo' na ise' nan na si Jisus adti krus, dawaten na Tyumanem ya utaw na nyangintu-u kanan.