Ya Sulat ni Apostol Pablo adti manga mangintu-uway dun ni syudad na Épéso
Ya Muna Pagpa-ede'
Singan ya migsulat?
Kya-ede-an da tadun na si Pablo ya migsulat seiy, kay pigbetang nan ya kanan ngalan adti tas na kapitulu 1 aw kapitulu 3, aw ya palna-u nan yeiy salay mig-unawa sa palna-u nan adti eped na manga pigsulat nan. Ya sulat ini, pig-imo' ni Pablo dun ni umay na 60 aw 61 talana pa nan nyakalabusu adti syudad na Roma. Migtagad pa sakanan sa pag-usay kanan adti asdangan na Impirador na si Néro. Aw si Tikiko ya dyumala sa sulat ini aw dyumala uman sa eped na manga sulat ni Pablo adti kan Pilimon aw adti manga mangintu-uway na awun ni Kolossas.
Singalan alag ya pigsulatan ni Pablo?
Ya syudad na Épéso, yan ya ulu na probinsiya na Asia, aw dun si Pablo pag-eya' seled na tulungka͡umay aw migpalna-u sa manga bagu na mangintu-uway. Adti palibed na Épéso, madég ya manga lunsud aw kabalayan na awun manga mangintu-uway na migkatipun nyanimba dun ni kanilan manga lunsud, dala ya manga lunsud na Simirna, aw Pérgamo, aw Tiyatira, aw Sardiya, aw Piladélpiya, aw Laodiciya. Yanagaw sa pagsulat ni Pablo sa sulat ini, kyaliman nan gya na basa͡en na kadég na manga mangintu-uway na nyeya' dun ni kadakula' na probinsiya na Asia.
Ya manga palna-u asini sulat, to-o pigpakanyegan na manga utaw aw pigbetang adti ginawa nilan. Aw yanagaw, pangkay wala' da si Pablo manang kenne' pigkopiya na manga eped na utaw. Aw asuntu na madég ya utaw na migkopiya sa sulat nan, awun manga tingeg na wala' pag-unawa adti tag sambuksambuk na pagsulat, manang mig-unawa la saba ya kakawasan.
Wan ya manga puntu na sulat ini?
Ya manga utaw na pigsulatan ni Pablo asini sulat ini, manga utaw na Héntil na bagu nyangintu-u kan Kristu. Yanagaw to-o nan pigbangal ya madég na palna-u:
Ya sambuk na pigpalna-u nan, yan ya pagpamalli' kanaten na Tyumanem, aw ya pag-atag nan kanaten sa kadyawan nan, dala ya kanan Ispiritu na pigbetang nan dun ni seled tadun na yan ya pangilala na nya-imo' da kitadun manga utaw nan.
Aw yan ya sambuk uman na pigpa-ede' nan, na pigbukasan da na Tyumanem ya palpa nan na pigtagu' asini muna. Kay dun ni pagkamatay ni Kristu adti krus, pigsambuk na Tyumanem adti bagu na kasakupan ya manga Judiyu aw manga Héntil na nyangintu-u la kan Kristu. Aw pigdasig ni Pablo ya kadég tadun na manga mangintu-uway na dili' kalaten ya pagsambuk na ginawa na nyatagtun da tadun.
Pigpalna-uwan pa ni Pablo ya manga eseg aw manga ka͡ubayan sa kanilan kapangugnanay. Aw pigpalna-u nan adti kadég na manga mangintu-uway ya manga pig-atag kanaten na Tyumanem pada mabatug tadun sagangen ya manga kapandayan na busaw aw pada pakasaligen ya pag-isambuk na kadég na manga mangintu-uway.