Ya Sulat ni Apostol Pablo adti manga mangintu-uway dun ni syudad na Épéso
Ya Muna Pagpa-ede'
1
1 Kay manga inulug dun ni syudad na Épéso * na nyangintu-u la kan Kristu Jisus aw nya-imo' kana Tyumanem manga utaw:
Aku si Pablo ya migsulat adti kamayu. Nya-imo' aku apostol ni Kristu Jisus magi sa pagbaya' na Tyumanem.
2 Padatengen galu kamayu ya kadyawan aw kalinaw na lyumekat adti Tyumanem ya Ama tadun aw adti kan Jisus Kristu na pangulu tadun.
Ya palpa na Tyumanem na to-o madyaw
3 To-o naten deyen ya Tyumanem na yan ya Ama na pangulu tadun na si Jisus Kristu. * Kay ya Tyumanem, yan ya mig-atag da kanaten sa kadég na kadyawan na Ispiritu nan dun ni pagkasambuk tadun adti kan Kristu. 4 Asini muna, pangkay sa wala' pa na Tyumanem imo-a ya langit aw kadakula' na banwa, dadan da kitadun nan pigpamalli' na un sumambuk kan Kristu. Kay yan ya kaliman nan na wala' ya imo-unun tadun na malipa' aw wala' ya un pagsāla' kanaten dun ni pag-indeg tadun adti asdangan nan, aw gayed tadun uman pagginawa͡an ya manga eped tadun. 5 Dadan da kitadun nan pigtani na un ma-imo' kanan manga mangayse' na makasambuk kanan magi sa pig-imo' ni Jisus Kristu, kay yeiy alag ya nyakatutuk sa Tyumanem aw yeiy ya pigbaya-an nan. 6 Asuntu sa dadan da na Tyumanem pigpalpa asini muna, naten deyen ya dengeg nan sa kadyawan na pig-atag nan kanaten na un kitadun sumambuk sa Ise' nan na to-o nan pigginawa͡an.
7 Aw pangkay piglakadan tadun ya manga sugu' na Tyumanem, manang magi sa pagkamatay na Ise' nan dun ni krus, piglekat da kitadun na dugu' nan aw piglanas da ya kadég na manga sala' tadun. Wala' ya maka-unawa sa kadakula' na kallat na Tyumanem 8 na lyumapiya adti kadég tadun. Aw asuntu sa kallat nan, pig-atag nan uman kanaten na tabedtabed makalabet kitadun sa kadég na pa-agi nan aw maka-ede' kitadun kun unu ya madyaw imo-un. 9 Aw pigbukasan da nan kanaten ya pigtagu' nan asini muna na pigpalpa nan. Aw to-o sakanan kyatutukan sa palpa nan na un nan imo-un magi kan Kristu. 10 Aw dun ni palpa nan, awun allaw na pigpamalli' nan dadan, aw pagdateng kagaya na allaw yan, un nan pagsambukun aw paligena-en salut ya kadég na awun ni dalem na langit aw asini tas na lupa', aw ya kadég yeiy alag si Kristu ya un magdumala.
11 Aw dun ni pagkasambuk tadun kan Kristu, nya-imo' kitadun uman bagi' adti kana Tyumanem. Dadan kitadun nan pigpamalli' na un ma-imo' kanan manga utaw. Kay lekat pa asini muna alag nan pigtapidtapid ya kanan talabahu pada malingeb ya kadég na pigbaya-an nan aw pigpalpa nan. 12 Pig-imo' nan alag yeiy pada deyen tadun ya dengeg na Tyumanem sa kadyaw nan. Kami na manga Judiyu taman na nyangintu-u kan Kristu, kami ya nyaka-una na bagi' adti kana Tyumanem. 13 Aw kamu uman, sa pagdengeg da mayu sa tengteng na matinaw na yan ya madyaw na ubat-ubat na si Kristu ya makapaluwa' kamayu, dayaw mayu pyangintu-uwan. Aw sa pagkasambuk mayu kan Kristu, pigbetang na Tyumanem dun ni seled mayu ya kanan Ispiritu na pigpakang nan idtu muna, aw yeiy ya pangilala na nya-imo' da kamu uman kanan manga utaw. 14 Aw ya Ispiritu na Tyumanem, yan ya palangad eket na kadég na pigpakang na Tyumanem kanaten. Aw ya kadég na pigpakang nan kanaten, yan saba ya un tadun tagtunun dun ni allaw na malingeb nan ya paglekat sa kadég tadun na kanan manga utaw.
Ya pigsekat ni Pablo adti Tyumanem sa manga mangintu-uway
15 Aw asuntu sa kadég yeiy, yanagaw lekat na allaw na dyengeg ku ya pagpangintu-u mayu kan Kristu na pangulu tadun aw ya paggaginawa͡ay na kadég mayu na manga utaw na Tyumanem, 16 yeiy ya du-an nan na wala' teneng ya pagpasalamat ku adti Tyumanem asuntu kamayu. Aw gayed ta kamu pyanawagtawagan adti 17 Tyumanem na yan ya Ama na kanaten pangulu na si Jisus Kristu, aw yan saba ya umba' deyen. * Migsekat aku adti kanan na magi sa Ispiritu nan atagan kamu na katadeng na lyumekat adti kanan aw bukasan adti kamayu ya kana Tyumanem aw ya palpa nan, pada to-o pa mayu ka-ede-an ya Tyumanem. 18 Aw asuntu saba na kya-ilawan da na Tyumanem ya anenganeng mayu, alag yeiy ya pigsekat ku adti kanan pada ka-ede-an mayu ya tulu yeiy: Ka-ede-an mayu kun unu ya un mayu imanen asuntu na pigtawag kamu na Tyumanem aw nya-imo' mangayse' nan. Ka-ede-an mayu uman ya alaga' na bagi' nan na to-o madyaw, aw kamu na kana Tyumanem utaw, kamu saba ya bagi' nan. 19 Aw ka-ede-an mayu uman ya kadakula' na katulus nan na wala' ya maka-unawa, kay yeiy ya makatabang kanaten na nyangintu-u. Aw pigpakita' nan ya pagtalabahu na kanan katulus 20 dun ni pagmataw nan kan Kristu lekat adti nyangkamatay aw dun ni pagpa-ingkud nan kan Kristu adti kalintu nan adti ingkudanan na pagdumala nan adti tas na langit. 21 Aw ya pagdumala ni Kristu matas pa kay sa kadég na migdumala adti balintenga-an aw asini tas na lupa', dala ya manga pagkita-en aw dili' pagkita-en, aw pangkay ya manga mangkalangkaw na manga anghil aw manga busaw. Yanagaw ya katundanan na pig-atag na Tyumanem kanan matas pa saba kay sa kadég na manga migdumala pangkay adun na allaw aw pangkay pa sa un dumateng. 22 Aw alag yeiy pigbetang na Tyumanem adti salad na siki ni Kristu. Aw si Kristu pig-atag nan adti kadakula' na kasakupan na manga mangintu-uway na yan ya kanilan ulu, 23 aw silan ya palangad lawas nan. Aw pig-atmu' na Tyumanem si Kristu sa kadakula' na katulus nan aw pagka Tyumanem nan, aw pig-atmu' pa uman ni Kristu na kanan katulus ya kadakula' na kasakupan na manga mangintu-uway.