2
Ya kallat na Tyumanem
1 Idtu na muna, asuntu sa manga sala' mayu aw paglakad mayu sa manga sugu' na Tyumanem, siling kamu adti anenganeng nan na utaw na nyatay da. 2 Kay yan baling ya pigdalug mayu idtu muna ya bet na manga utaw na wala' pangintu-u sa Tyumanem. Aw pigdalug mayu uman ya pangulu na manga ispiritu na nyeya' dun ni balintenga-an na yan ya migtalabahu dun ni anenganeng na manga utaw na gayed lyumakad sa manga sugu' na Tyumanem. 3 Aw maynan uman ya pigpan-imo' na kadég tadun idtu muna na pigdalug tadun ya pagkaliman na pagka-utawun tadun mag-imo' sa sala' aw gayed tadun pigtuman ya pagkaliman na kanaten lawas aw anenganeng. Aw yanagaw yan galu ya dyatengan tadun idtu muna ya pagpa-emel-emel na Tyumanem asuntu sa bet tadun na malatay siling na kadég na eped na utaw asini tas na lupa'. 4 Manang ya Tyumanem, to-o dakula' ya kallat nan. Aw asuntu na to-o kitadun nan pigginawa͡an, 5 pig-atagan kitadun nan na bagu na ginawa dun ni pagkasambuk tadun adti kan Kristu, pangkay siling kitadun idtu muna na utaw na nyatay da, asuntu na lyumakad sa manga sugu' na Tyumanem aw kya-eletan adti kanan. Manang adun, magi sa kallat nan, pigpaluwa' kamu lekat adti pagpa-emel-emel nan, siling kanami idtu muna. 6 Aw sa pagmataw na Tyumanem kan Kristu, nyaka-agad kitadun uman, aw dadan da kitadun na Tyumanem pigtagilanan na ingkudanan dun ni tampid nan adti tas na langit asuntu na nyakasambuk da kitadun kan Kristu Jisus. 7 Pig-imo' nan yeiy pada adun na allaw aw manga allaw na dumadateng pa, pakita' nan adti kadég ya kanan kallat na to-o madyaw na wala' ya maka-unawa, na yan ya kallat nan adti kadég tadun na nyakasambuk kan Kristu Jisus. 8 Asuntu saba sa kallat na Tyumanem, pigpaluwa' kamu nan magi sa pagpangintu-u mayu kan Kristu Jisus. Beke' na asuntu sa manga pigpan-imo' mayu, manang asuntu baling na yan ya pig-atag na Tyumanem na wala' ya bayad. 9 Ya pig-atag nan beke' saba na tandan kamayu asuntu sa pagtibagseg mayu mag-imo' sa madyaw, pagaw awun utaw na magpalibantug sa pigpan-imo' nan. 10 Kay ya Tyumanem saba ya mig-imo' kanaten bagu na manga utaw. Pig-imo' nan yeiy magi sa pagpasambuk nan kanaten adti kan Kristu Jisus, pada imo-un da tadun ya manga madyaw na imo-unun na pigtagilan dadan kanaten na Tyumanem.
Ya pagkasambuk da tadun dun ni kan Kristu
11 Yanagaw asuntu seiy, anenganenga mayu ya pagpakabetang mayu idtu muna. Kamu na manga Héntil, pigsupla kamu na manga utaw na Judiyu kay wala' mayu daluga ya kanilan katanem na pagpatuli'. Kay yan baling ya pigsaligan nilan ya kanilan pagpatuli' pada maka-akup kunu adti kasakupan na Tyumanem. Manang ya pagpatuli' yan olo' ya pangilala dun ni lawas na utaw. 12 Anenganenga mayu uman na idtu muna wala' pa kamu pakasambuk adti kan Kristu kay wala' mayu ka-ede-i kun singalan sakanan. Aw wala' pa uman ya bagi' kamayu dun ni kasakupan na buwadbuwad ni Isra-él. Aw siling kamu na dumadayu kay wala' pa mayu ka-ede-i ya manga pakang na Tyumanem kanilan na dayaw mag-iganget.* Yanagaw sa pag-eya' mayu asini tas na lupa' idtu muna, wala' ya pag-iman mayu na paluwa-en kamu adti pagpa-emel-emel na Tyumanem kay wala' pa ya pagpangintu-u mayu kanan. 13 Manang adun, nyakasambuk da kamu kan Kristu. Pangkay idtu muna mawat pa kamu adti Tyumanem, manang adun da pigpalapit da kamu magi sa dugu' ni Kristu dun ni krus. 14 Kay si Kristu ya kanaten kalinaw. Pigsambuk da nan ya ginawa na kadég tadun na nyangintu-u kanan, pangkay kami na manga Judiyu aw kamu na manga Héntil. Aw magi sa pagkamatay nan dun ni krus, pig-agba' da nan ya nyaka-elet kanaten idtu muna na mig-imo' kanaten matalapo-on. 15 Pigpateneng da ni Kristu ya katundanan na kadég na manga sugu' dun ni uldin na pig-atag kan Moysis asini muna kay yan ya nyaka-elet. Pig-imo' nan yeiy pada ya kadég tadun na nyangintu-u kan Kristu, dala kami na manga Judiyu aw kamu na manga Héntil, ma-imo' nan bagu na kasakupan. Aw yanagaw nya-imo' ya kalinaw adti kadég tadun na nyangintu-u kanan. 16 Aw yan ya sambuk uman na du-an nan na pigpateneng ni Kristu ya katundanan na uldin, pada pag-iyuli-en nan uman adti Tyumanem ya tag sambuksambuk kanaten magi sa pagkamatay nan aw mabugtu' ya kalat na ginawa na manga utaw adti Tyumanem. Aw asuntu sa pig-imo' nan dun ni krus, dili' da matalapo-on ya manga Judiyu aw manga Héntil na nyangintu-u la kanan. Ya duwa silan idtu muna, nyakasambuk da adti kasakupan na palangad lawas nan. 17 Yan saba ya pigkadi ni Kristu pada paglongun ya madyaw na ubat-ubat sa kalinaw nan adti kamayu na manga Héntil na mawat sa Tyumanem idtu na muna, aw adti manga Judiyu na iman nilan kunu aw malapit silan adti Tyumanem pangkay wala' silan pangintu-u kan Kristu. 18 Aw adun, asuntu sa pig-imo' ni Kristu kanaten, ya kadég tadun na nyangintu-u kanan pangkay Judiyu aw pangkay Héntil alag kitadun makapalapit sa Ama magi sa Ispiritu na Tyumanem.
19 Yanagaw kamu na manga Héntil, beke' da kamu na dumadayu aw lumalaba', manang nyaka-akup da kamu dun ni kadakula' na kasakupan na manga utaw na Tyumanem aw awun da bagi' kamayu kay nyakaseled da kamu adti ka-epedanan na Tyumanem. 20 Ya kasakupan yeiy na manga mangintu-uway, kasiling na balay na pig-imo' na Tyumanem. Si Kristu Jisus, yan ya siling na tullukanan na to-o madyaw, aw ya manga apostolés aw manga mag-ubat-ubatay na Tyumanem, siling silan na manga aligi na masalig. 21 Aw ya kadég tadun na nyangintu-u kan Kristu, siling kitadun na manga tabla na dayaw mig-idapat dun ni balabag na nyakadapat dun ni aligi, aw yanagaw pig-isugpatsugpat pa ya balay menda' na ma-imo' kitadun témplo na pigtani la adti kan Kristu. 22 Aw kamu na manga Héntil, dun ni pagpakasambuk mayu kan Kristu, pigsugpat pa kamu uman dun ni balay yeiy na ma-imo' témplo na pig-eya-an da na Tyumanem magi sa Ispiritu nan. (Finished Round 1 responses to consultant 10/23/2010)