Épéso 3

Ya pigtagu' asini muna na pigbukasan da adun

¹ Aw asuntu na kadég yeiy idtu na pigsulat da ku, yanagaw aku si Pablo nyanawagtawag kamayu adti Tyumanem, pangkay nyakalabusu pa aku asuntu na pigpalna-u ku si Kristu Jisus adti kamayu na manga Héntil. ² Pigdengeg da gya mayu idtu muna na pigtaliguwan aku na Tyumanem sa pagpalna-u adti kamayu sa kallat nan. ³ Kay pigpa-ede' nan kanak ya palpa nan na pigtagu' asini muna na yan ya pigsulat da ku asini sulat ini. ⁴ Aw sa pagbasa mayu sa pigsulat ku ini, ka-ede-an mayu na to-o ku kyalabetan kun unu ya palpa na Tyumanem na pigtagu' asini muna na ma-imo' magi kan Kristu. ⁵ Asini muna sa wala' pa si Kristu dateng, wala' pa yeiy na Tyumanem bukasi adti manga utaw. Manang adun, pigpa-ede' da nan magi sa Ispiritu nan adti kanan manga apostolés aw manga mag-ubat-ubatay na Tyumanem. ⁶ Aw ini la ya kanan palpa na pigbukasan da: Kamu na manga Héntil taman na nyangintu-u la sa madyaw na ubat-ubat kan Kristu Jisus, pig-atagan da uman kamu na Tyumanem na madég na kadyawan nan siling na pig-atag nan kanami na manga Judiyu. Nyaka-akup da kamu uman dun ni bagu na kasakupan nan, aw un kamu atagan na manga pigpakang na Tyumanem kay nyakasambuk da kamu kan Kristu Jisus.

Ya imo-unun ni Pablo adti tampid na manga Héntil

⁷ Na, pig-imo' aku na Tyumanem sugu-anen nan asuntu sa kallat na pig-atag nan kanak. Aw asuntu na migtalabahu la ya kanan katulus asini kanaken, mabatug ku ya pagpalna-u sa madyaw na ubat-ubat kan Kristu, ⁸ pangkay aku ya madalem pa kay sa kadég na kana Tyumanem manga utaw. Manang pig-atagan aku kadi' na Tyumanem sa kadyawan nan dun ni pagtaligu nan kanak sa pagpa-ede' adti manga Héntil sa kadakula' na kadyawan ni Kristu na wala' ya maka-unawa. ⁹ Ya Tyumanem na mig-imo' sa kadég, yan ya migtaligu kanak na ka-ilawan ya anenganeng na kadég na utaw pada ka-ede-an nilan kun unun ya pagtuman sa palpa nan na pigtagu' nan asini kadengan na muna. ¹⁰ Aw pig-imo' aku nan uman sugu-anen nan pada mabatug ya pagpa-ede' sa kalalem na katadeng na Tyumanem adti kadég na manga anghil aw manga busaw, aw ya manga kasakupan nilan aw manga mangkalangkaw nilan na awun ni balintenga-an. Aw ya pagpa-ede' seiy magi saba sa bagu na kasakupan na manga mangintu-uway. ¹¹ Kay yeiy ya pigpalpa nan asini muna sa wala' pa nan imo-a ya kadég, aw pigtuman nan yeiy magi kan Kristu Jisus na kanaten pangulu. ¹² Aw asuntu na nyakasambuk da kitadun kanan, dili' kitadun mallek aw magkabekenbeken magpalapit adti Tyumanem aw maglong kanan kun unu ya awun ni anenganeng tadun. Mabatug da yeiy asuntu na nyangintu-u la kitadun kan Kristu. ¹³ Yanagaw, asuntu sa kadég yeiy, sekaten ku adti kamayu na dili' mayu pakalumayen ya ginawa mayu pangkay nyakalabusu pa aku asuntu sa pagpalna-u ku kamayu, kay dun kamu baling ka-untungi.

Ya pagpanawagtawag ni Pablo adti Tyumanem sa manga mangintu-uway

¹⁴ Aw sa pag-anenganeng ku sa palpa yeiy na Tyumanem, lyumuhud aku migsimba aw nyanawagtawag adti asdangan na Ama tadun ¹⁵ na yan ya lyekatan na kadég na kasakupan asini tas na lupa' aw adti balintenga-an aw adtu uman ni tas na langit. ¹⁶ Aw asuntu sa kadakula' na kadyaw na pagka Tyumanem nan, nyanginayu' aku kanan na atagan kamu na katulus nan na un kamu pakabagsegen magi sa tabang na Ispiritu nan na nyeya' dun ni ginawa mayu. ¹⁷ Aw migsekat aku uman na gayed meya' si Kristu dun ni ginawa mayu asuntu sa pagpangintu-u mayu aw pagsalig mayu kanan. Aw asuntu na lekat adti Tyumanem ya paggaginawa͡ay mayu, siling da kamu na kawuy na to-o tyumelled ya dalid, aw siling da kamu uman na aligi na balay na to-o masalig ya kyatullukan nan. ^18-19 Yanagaw yan uman ya pigsekat ku na mabatug mayu kalabetan ya ginawa ni Kristu kanaten, kun sangunu ya kadakula' aw ya kalalem na ginawa nan na wala' ya maka-unawa, aw kalabetan uman na kadég na manga utaw na Tyumanem. Aw pigsekat ku uman adti Tyumanem na atmu-un ya kadég mayu na mangintu-uway na kanan bet aw ya kadyaw nan aw ya katulus nan taman na maka-unawa kamu sa bet nan.

²⁰ Deyen tadun ya Tyumanem! Kay magi sa katulus na kanan Ispiritu na migtalabahu dun ni seled tadun, mabatug nan imo-un ya to-o pa dakula' kay sa kadég na pigsekat tadun aw ya kadakula' na pig-anenganeng tadun. ²¹ Aw ya Tyumanem yan ya deyen na kadakula' na kasakupan na manga mangintu-uway, pangkay adun na allaw aw pangkay pa sa dumadateng. Aw naten deyen ya Tyumanem na wala' ya tyamanan asuntu sa kadég na pig-imo' ni Kristu Jisus kanaten na nyangintu-u la. Yeiy saba ya matinaw. (Finished Round 1 responses to consultant 10/23/2010) (NOTE FOR REVISION: Saman suggests change ˈdakula' in verse 20 to ˈmadyaw’)