4
Ya pagsambuk na kadég na nyangintu-u kan Kristu
1 Yanagaw, aku na nyakalabusu pa asuntu na pigpalna-u ku si Kristu, dasigen ku ya kadég mayu na silingan mayu gayed ya bet na maka-umba' sa manga utaw na pigtawag da na Tyumanem. 2 Aw maynini ya bet na silingan mayu: Dili' kamu magpatastas sa kamayu pagka-utawun manang magpadalem kamu baling, aw dayaw mayu uman pakadyawa ya eped mayu. Tageni mayu ya kamayu kadaman, aw magtati-isay ya tag sambuksambuk kamayu asuntu sa paggaginawa͡ay mayu. 3 Aw to-o mayu tibagsegi na awun kalinaw dun ni kadég mayu pada ma-ilagket ya pag-isambuk mayu sa ginawa na pig-atag kamayu na Ispiritu na Tyumanem. 4 Sambuk da olo' ya lawas na yan ya kadakula' na kasakupan na manga mangintu-uway. Aw sambuk da ya Ispiritu na Tyumanem na nyeya' dun ni tag sambuksambuk kanaten. Aw sambuk da ya pig-iman tadun asuntu na pigtawag da kitadun na Tyumanem. 5 Aw sambuk da olo' ya matas na pangulu, aw sambuk da ya pyangintu-uwan, aw sambuk olo' ya kakawasan na pagba͡utismu kanaten na yan ya pagpaka-agad tadun sa pagkamatay aw pagkataw ni Kristu. 6 Sambuk da olo' ya Tyumanem aw yan saba ya Ama na kadég tadun. Aw yan ya migdumala sa kadég tadun aw migtalabahu magi sa kadég tadun na manga mangintu-uway, aw nyeya' sakanan saba adti seled na tag sambuksambuk kanaten.
Ya manga pigpan-atag na Tyumanem pada pakasaligen ya manga mangintu-uway
7 Pangkay sambuk da ya lawas na kadég tadun na mangintu-uway, manang pig-atagan da ya tag sambuksambuk kanaten na katadeng asuntu sa pagpangintu-u tadun, pada mabatug ya imo-unun na Tyumanem na pigtaligu kanaten, aw si Kristu ya migbaya' kun unu ya atag nan na umba' sa tag sambuksambuk kanaten. 8 Siling na pigpasulat asini muna:
“Pagka-engat da nan adti tas, madég to-o ya nyataban nan,
aw mig-atag sakanan sa manga bagi' adti manga utaw.”*
9 Na, unu ya kakawasan na pagka-engat nan? Ya kakawasan yeiy, nyanog una si Kristu asini lupa'. 10 Aw yan ya nyanog, aw yan uman ya nya-engat adti tas na langit pada matmu' ya kadakula' na banwa na pagdumala nan. 11 Aw ini ya pig-atag nan kanaten na manga mangintu-uway: Ya eped nya-imo' manga apostolés, aw ya manga eped nya-imo' mag-ubat-ubatay na Tyumanem, aw ya manga eped nya-imo' magbabekkalay sa madyaw na ubat-ubat kan Kristu, aw ya manga eped nya-imo' magdadiyaga͡ay sa kasakupan na manga nyangintu-u aw magpalna-uway kanilan. 12 Pig-atag nan yeiy pada tagilanen ya manga utaw na Tyumanem na mabatug nilan ya manga imo-unun nan aw pakasaligen ya kasakupan na manga mangintu-uway na yan ya palangad lawas ni Kristu, 13 menda' na dumateng da ya kadég tadun adti pagsambuk sa ginawa dun ni pagpangintu-u tadun kan Kristu, aw menda' na to-o tadun ka-ede-an ya Ise' na Tyumanem aw to-o ma-unud ya pagpangintu-u tadun, aw menda' na maka-unawa ya bet na kadég tadun sa kadyaw na bet ni Kristu, 14 pada dili' kitadun masiling sa anenganeng na tagbi' na mangayse' na maksay magka-agad-agad sa pangkay unu ya paglongun kanilan aw molas gawayan. Yanagaw dili' kitadun magpadaladala sa pangkay unu ya palna-u na galu' na dumateng. Aw dili' kitadun pagka-akalan na manga kapandayan na manga utaw na nyabaluk ya anenganeng na magpasuway kanaten lekat adti matinaw na palna-u. 15 Dili' kitadun magpangintu-u sa manga sangkamulu' na palna-u na maynan, manang dalugun tadun baling ya matinaw dun ni kanaten pag-eya', aw paglongun tadun uman adti manga eped ya matinaw na palna-u asuntu sa dakula' na ginawa tadun kanilan, pada tumulin pa galu kitadun taman na kasilingan da tadun ya bet ni Kristu na yan ya ulu na kadég tadun na palangad lawas nan. 16 Aw dayaw pa nan pigpaligena' ya kadég tadun dun ni kasakupan nan aw dayaw pa nan uman pig-isugpatsugpat ya kadég tadun, aw mig-atag sakanan sa imo-unun na umba' sa tag sambuksambuk kanaten. Aw kun pigtalabahu na tag sambuksambuk kanaten ya pigtaligu kanaten ni Kristu, tumulin pa ya kadakula' na kasakupan na manga mangintu-uway aw magkabagseg pa uman ya palangad lawas nan asuntu sa paggaginawa͡ay tadun.
Ya bagu na pagka-utawun dun ni kan Kristu
17 Yanagaw yeiy ya du-an nan na paglongun ta kamu dun ni ngalan na kanaten pangulu na dili' da mayu pagsilingan ya bet na manga eped na Héntil na kenne' pa migpan-imo' sa malatay. Dili' maka͡apet ya anenganeng nilan sa kadyaw na bet na Tyumanem. 18 Gayed kyangitngitan ya kanilan anenganeng. Kya-eletan silan adti Tyumanem aw yanagaw wala' silan pakatagtun sa ginawa na wala' ya tyamanan kay wala' nilan ka-ede-i kun unu ya matinaw, kay pigkele͡an da nilan ya Tyumanem. Aw alag yeiy pig-imo' nilan asuntu na mangkategel ya anenganeng nilan. 19 Pigpangkebbelan da saba ya kanilan anenganeng na manga pigpan-imo' nilan na malatay. Aw yanagaw pig-atag nilan ya kanilan lawas adti kadég na imo-unun na makamulamula aw wala' ya katantanan na pagpaninaw nilan sa imo-unun na malipa'.
20 Manang kamu, beke' na maynan ya kyasilingan mayu sa pagpangintu-u mayu kan Kristu. 21 Kya-ede-an da ku na dyengeg da mayu sakanan, aw pigpalna-uwan kamu pada to-o mayu sakanan ka-ede-an aw silingan mayu ya bet nan, kay dun ni kan Jisus ya tengteng matinaw. 22 Yanagaw, luwasa mayu ya dadan na pagka-utawun mayu, dala ya pagkaliman na kamayu lawas, kay yeiy ya gayed miggaway kamayu aw yeiy uman ya lyekatan na madég na malatay na makapagkalat pa kamayu. 23 Aw pabaguwan mayu baling sa Ispiritu ya anenganeng mayu. 24 Aw suta la mayu ya bagu na pagka-utawun na pig-imo' na Tyumanem siling na kanan pagka-utawun na alag malinis na wala' ya sala', kay yan ya lyekatan na kadég na matinaw.
25 Yanagaw asuntu na pigluwas da mayu ya dadan na bet, dili' da kamu maglong sa galu', manang yan baling ya paglongun mayu adti manga eped mayu ya tengteng na matinaw. Kay ya tag sambuksambuk kanaten alag nyaka-akup adti kasakupan ni Kristu. 26 Ila' aw awun kadaman mayu, magpakatadeng kamu pagaw makasala' kamu baling. Maksay kamu pag-iyuli' na dili' pa sumallep ya sega, 27 aw dili' mayu pagtumbay na makaselat ya busaw.
28 Ya matakaw, dili' da sakanan galu magtakawunun, manang magtibagseg sakanan baling magtalabahu aw makatabang pa uman sa manga eped na wala' ya pagkamangan.
29 Dili' kamu maglong sa tingeg na makapagkalat sa eped na utaw aw pangkay unu ya tingeg na wala' ya guna. Pakadyawa mayu ya paglong sa tingeg na awun untung na un makatabang kanilan, pada tumulin pa ya kanilan pagpangintu-u aw pakabagsegen ya ginawa na kadég na magpakanyeg kamayu. 30 Aw dili' mayu pagpakalaten ya ginawa na Ispiritu na Tyumanem, kay ya Ispiritu, yan ya palangad eket na pigbetang na Tyumanem adti seled tadun menda' sa allaw na lekaten kitadun nan.
31 Dili' mayu pag-elledan na ginawa ya pangkay singalan. Aw dili' kamu maksay magsulu adti kanilan, aw dili' kamu magkagagad na kamayu kadaman, aw dili' kamu magpamuligsa-ay. Aw dili' kamu magtanemtanemay sa malat na tingeg adti eped na utaw. Alag mayu yeiy kamanga adti kamayu ya kadég na punganan na malatay, siling na suksuk na pig-iggwitan. 32 Aw pakadyawa ya manga eped mayu, aw pagkakallatay kamu, aw magpasinsiya͡ay kamu ya tag sambuksambuk kamayu, siling na pagkallat na Tyumanem kamayu magi kan Kristu.