5
Ya manga utaw na dun ni kalalamdag
1 Yanagaw, asuntu na manga mangayse' da kamu na pigginawa͡an na Tyumanem, silingan mayu ya kanan bet. 2 Aw gayed mayu ginawayi ya manga eped mayu, kasiling ni Kristu. Kay pigginawa͡an nan kitadun aw yanagaw pig-atag nan ya kanan pagka-utawun. Aw ya pagkamatay nan, palangad dugsu' na to-o manimbo' adti Tyumanem.
3 Aw asuntu na mangayse' da kamu na Tyumanem, dili' da kamu mag-imo' sa malatay siling na magkasala-enen aw ya kadég na malipa' aw ya pagkaybeg sa pangkay unu ya kamayu pagkaliman, aw dili' da uman pagkasampetan dun ni kamayu ya maynan. Kay dili' yeiy umba' adti kamayu na nya-imo' manga utaw na Tyumanem. 4 Aw maynan uman, dili' da kamu maglong sa tingeg na malipa' na makamulamula, aw manga kasampetanen na wala' ya guna aw malat na gagelalay. Kay dili' yeiy umba' adti kamayu. Yan baling ya madyaw mayu imo-un ya pagpasalamat sa Tyumanem. 5 Kay kya-ede-an da mayu saba ya ini: Pangkay singalan utawa ya magkasala-enen aw mag-imo' sa malipa', wala' ya bagi' kanan dun ni kasakupan na pighari-an ni Kristu aw Tyumanem na Ama nan. Aw maynan uman ya utaw na magkaybeg sa pangkay unu ya pagkaliman nan, kay yeiy baling ya nya-imo' palangad manga tyumanem nan. 6 Dili' kamu magpadaladala sa manga utaw na miglong sa wala' ya untung aw sa tingeg na pigdali-an na galu', kay asuntu sa kadég yeiy un saba dumateng ya pagpa-emel-emel na Tyumanem adti manga utaw na gayed lyumakad sa manga sugu' nan. 7 Yanagaw dili' kamu magpa-iyeped kanilan. 8 Pangkay idtu muna mangitngit pa ya anenganeng mayu, manang adun kya-ilawan da ya anenganeng mayu kay nyakasambuk da kamu kan Kristu. Yanagaw, daluga pa mayu ya bet na umba' sa mangayse' na Tyumanem na kya-ilawan da. 9 Kay kun awun ni kamayu ya kalalamdag, kita-en dun ni kamayu ya imo-unun na madyaw aw matulid aw matinaw, kasiling na kawuy na kya-ilawan na sega na to-o nyamunga. 10 Aw asuntu na manga mangayse' da kamu na Tyumanem na kya-ilawan da, tibagsegi na dayaw mayu ka-ede-an kun unu ya makatutuk kanan. 11 Dili' kamu magpasambuk sa imo-unun na wala' ya guna siling na pigpan-imo' na manga utaw dun ni mangitngit. Manang pagsagda͡an mayu baling ya manga mangintu-uway na mig-imo' sa maynan, aw ilawi mayu ya manga imo-unun nilan dun ni mangitngit. 12 Kay ya manga imo-unun nilan na tagu-tagu', yeiy ya makamulamula sa kadég tadun pangkay olo' balawbalawan. 13 Manang sa pagpaka-ilaw da na kalalamdag na Tyumanem sa kadég na manga imo-unun nilan na tagu-tagu', mabatug da kita-en ya manga sala' nilan. 14 Aw ya utaw na nyakasala', makaliku' da adti kalalamdag aw ma-imo' kalalamdag adti manga eped. Maynan saba ya piglong idtu muna:
“Ikaw na nyakatulug, pagmata la
aw pagbangun da kaw lekat adti nyangkamatay,
aw si Kristu na kalalamdag, yan ya mag-ilaw kanmu.”
15 Yanagaw magpakatadeng kamu sa kamayu bet. Dili' mayu pagsilingan ya manga utaw na wala' dalug sa pagkaliman na Tyumanem, manang yan baling ya silingan mayu ya manga utaw na dyumalug sa pagkaliman nan. 16 Dili' mayu pagsapadan ya selat mayu kada allaw, kay madég ya malat adun na manga allaw yeiy.* 17 Yanagaw dili' kamu magsiling sa manga utaw na wala' ya katadeng magdala sa pag-eya' nilan. Manang tibagsegi mayu na dayaw mayu ka-ede-an kun unu ya pagkaliman ni Kristu.
18 Aw dili' kamu mag-inem sa bino menda' na to-o kamu magkalangulangu pagaw ma-imo' kamu sagda͡enen. Manang pa-atmu-an mayu baling ya kamayu pagka-utawun magi sa Ispiritu na Tyumanem. 19 Gayed kamu mag-ubat-ubatay ya tag sambuksambuk kamayu sa manga Salmo aw manga eped na tingeg na Tyumanem na pig-imo' da manga kanta. Aw magdeyen kamu kan Kristu magi sa manga pag-ubaten aw pagdalangan na alag yeiy nyatibulluk ya anenganeng mayu sa pagdeyen kanan. 20 Aw gayed kamu uman magpasalamat adti Tyumanem na Ama magi sa ngalan ni Jisus Kristu na pangulu tadun asuntu sa kadég na kadyawan nan adi kanaten, 21 aw gayed kamu magbabasa͡ay ya tag sambuksambuk kamayu asuntu na kyallekan mayu si Kristu.
Ya palna-u sa manga ka͡ubayan
22 Kamu na manga ka͡ubayan, pagbasa͡an mayu ya kamayu manga eseg siling na pagpamasa mayu kan Kristu. 23 Kay ya eseg, yan ya palangad ulu na ka͡ubayan nan masiling ni Kristu ya palangad ulu na kadég na manga mangintu-uway kay yan ya kanan lawas. Aw si Kristu uman ya magpaluwa-ay kanilan. 24 Aw ya pagpamasa na kadég na manga mangintu-uway kan Kristu, maynan uman ya pagpamasa na manga ka͡ubayan sa eseg nilan.
Ya palna-u sa manga eseg
25 Kamu na manga eseg, ginawayi mayu ya kamayu manga ka͡ubayan kasiling na pagginawa ni Kristu sa manga mangintu-uway. Aw asuntu na pigginawa͡an kitadun nan, pigtumbay nan ya kanan pagka-utawun na ma-imo' dugsu' dun ni pagkamatay nan, 26 pada taniyen nan ya kadég tadun na un ma-imo' kanan manga utaw na piglinisan da nan sa manga sala' tadun magi sa piglong nan. 27 Aw yan ya du-an nan na piglinisan da kitadun ni Kristu, pada mabatug kitadun nan pa-indegen dun ni asdangan nan, siling na dalaga na pig-atag adti kanan tawas dun ni allaw na pagsaluwun da silan. To-o sakanan manenggeya, aw ya kadégkadég nan wala' ya taping aw wala' kapiku-piku'. Siling maynan ya kadég tadun na nyangintu-u kan Kristu na pigtani la nan idtu na muna pada malinis kitadun aw wala' ya un pagsāla' kanaten dun ni allaw na pa-indegen kitadun nan dun ni kanan asdangan. 28 Yanagaw, maynan uman kamu na manga eseg. To-o mayu ginawayi ya kamayu manga ka͡ubayan masiling na pagginawa mayu sa kamayu pagka-utawun. Ya kapangugnanay, sambuk da kamu, aw yanagaw kun pigginawa͡an mu ya kanmu ka͡ubayan, pigginawa͡an mu uman ya kanmu pagka-utawun. 29 Kay wala' saba ya utaw na magpakalat sa pagka-utawun nan. Yan baling ya pig-imo' nan na dayaw ipaten kay pigginawa͡an nan ya kanan lawas. Aw maynan uman si Kristu kanaten na manga mangintu-uway kanan, 30 kay ya tag sambuksambuk kanaten sakup saba dun ni lawas ni Kristu, aw lekat kitadun adti kanan unud aw kanan pesa'. * 31 Pigpasulat saba na Tyumanem asini muna, “Yeiy ya du-an nan na indegan na eseg ya ama nan aw ina nan, aw pa-egketen da silan ya ka͡ubayan nan, aw ya duwa silan ma-imo' sambuk da.”* 32 Ya pundinganan yeiy, malalem ya kakawasan na nyatagu' asini muna manang pigbukasan da, na yan ya pagsambuk ni Kristu aw kasakupan nan na manga mangintu-uway. 33 Manang salutun ku uman ya kanak palna-u na ya tag sambuksambuk na eseg, ginawayi ya ka͡ubayan mu siling na pagginawa mu sa kanmu pagka-utawun. Aw basa͡an na ka͡ubayan ya kanan eseg.