Épéso 6

Ya palna-u sa manga mangayse'

¹ Kamu na manga mangayse', pagka͡agadan mayu ya kamayu mangkatikadeng, kay yeiy ya umba' imo-un na makatutuk kan Kristu. ² “Basa͡an mu ya kanmu ama aw ina.” Yeiy saba ya muna sugu' na Tyumanem na kya-epedan na pakang. Kay law nan uman: ³ “Kun basa͡an mu silan, magkadyaw ya kanmu pag-eya' aw pakalawigen ya ginawa mu asini tas na lupa'.”

⁴ Aw kamu uman na manga ama, pakadyawa mayu ya pagdala sa kamayu manga mangayse'. Aw dili' mayu pagpasobla͡an ya pagpitul kanilan taman na kalatan kamu nilan na ginawa, manang dun ni pagpatulin mayu kanilan, palna-uwan mayu baling silan na dalugun nilan ya palna-u na lekat adti kan Kristu.

Ya palna-u sa manga sugu-anen aw manga allang

⁵ Aw kamu na manga allang aw sugu-anen, ka͡agadi mayu ya manga amu mayu na asini tas na lupa'. Pagbasa͡an mayu silan aw pagkallekan. Tibulluka mayu ya pagtuman sa sugu' nilan kay kun pig-imo' mayu yeiy, pigbasa͡an mayu si Kristu. ⁶ Dili' kamu olo' magkaseb sa udas na bantayan kamu na amu mayu pada saya' kamu nan. Manang betangan adti ginawa mayu baling ya imo-unun na makatutuk kanan, liwan na si Kristu ya tengteng na amu na pigtalabahuwan mayu. Kay kun imo-un mayu yeiy, imo-un da mayu uman ya kaliman na Tyumanem. ⁷ Yanagaw, pakadyawa mayu ya imo-unun mayu na magān ya ginawa aw to-o kamu kasaligan, liwan na si Kristu ya amu mayu aw beke' olo' na utaw. ⁸ Kay kya-ede-an da mayu na kun pig-imo' na pangkay singalan ya madyaw na imo-unun, un sakanan makadawat adti kan Kristu sa tandan na umba' sa imo-unun nan. Wala' ya pigkibang nan pangkay allang aw sugu-anen aw pangkay beke'. ⁹ Aw kamu na manga tagtun aw amu, pakadyawa mayu ya pagdala sa kamayu manga allang aw sugu-anen, aw dili' da mayu silan pag-alleken. Kay kya-ede-an da mayu na si Kristu na awun ni tas na langit, yan alag ya tengteng tagtun sa kamayu allang aw sugu-anen mayu aw tagtun uman kamayu. Aw wala' ya pigkibang ni Kristu.

Ya kadég na manga pagkana' na manga mangintu-uway

¹⁰ Sa dili' pa ku tigkasen ya sulat ini, awun pa paglongun ku kamayu: Asuntu na nyakasambuk da kitadun kan Kristu, gayed kamu pagpakabagseg magi sa dakula' na katulus na Tyumanem kay yan ya lyekatan sa kabagseg. ¹¹ Siling saba na sundalu na syumut sa pagkana' nan pada tumanam, suta mayu uman ya kadég na pagkana' na pig-atag kanaten na Tyumanem pada mabatug mayu sagangen ya kapandayan na busaw. ¹² Kay beke' na tin utaw ya eped tadun migsukub, manang yan baling ya pigsukub tadun ya manga busaw na dili' pagkita-en aw ya manga kasakupan nilan aw manga mangkalangkaw dun ni kanilan, aw pangkay ya kadég na migdumala dun ni banwa na mangitngit aw ya kadég na malatay dun ni balintenga-an. ¹³ Yeiy ya du-an nan na dala͡en mayu ya kadég na pagkana' na pig-atag kamayu na Tyumanem siling na sundalu pada dili' kamu nilan magana-gana' kun dumateng ya allaw na malatay. Kun imo-un mayu ya kadég yeiy, pangkay dakula' ya tanam manang kenne' pa mayu mindeg. ¹⁴ Yanagaw indeg kamu aw saganga ya manga kapandayan na busaw kay pigtagilan da mayu ya pagkana' mayu siling na sundalu na migtagilan sa tanam: Una kamu pangelen sa katinawan na Tyumanem. Aw silingi mayu ya bet na Tyumanem na wala' ya sala', liwan uman na sundalu na syumut da sa pagtampeng sa aba nan. ¹⁵ Aw suta mayu ya palangad sapatus na yan ya pagpaka-ede' mayu sa madyaw na ubat-ubat sa kalinaw na Tyumanem, liwan na sundalu na syumut sa sapatus na to-o masalig pada dili' malinas ya siki nan dun ni pagtanam. ¹⁶ Aw tagilana ya kalasag na yan ya pagpangintu-u mayu kan Kristu pada mabatug kapatayan ya atulun na awun ni tuktuk na papana' na busaw, liwan na sundalu na migtagilan sa kalasag nan kun awun da tanam. ¹⁷ Aw sa agpet da magtanam, maksay mayu kamanga ya un pagsangkub sa ulu, na yan ya pagpaka-ede' mayu na pigtamengan da kamu asuntu na pigpaluwa' da ni Kristu. Aw tagnusa ya kampilan na pig-atag kamayu na Ispiritu na yan ya tingeg na Tyumanem. ¹⁸ Aw gayed kamu panawagtawag adti Tyumanem magi sa katulus na Ispiritu nan aw pagsekat kamu sa tabang nan. Aw pag-inap kamu aw to-o kamu pagkaseb panawagtawag aw pagsekat sa tabang nan adti kadég na manga utaw na Tyumanem, ¹⁹ labi la beg kanak. Panawagtawagi aku adti Tyumanem na atag nan kanak ya manga tingeg na umba' ku paglongun adti manga Héntil. Aw pagsekat kamu uman na wala' ya kakallekan ku maglong sa palpa na Tyumanem na pigtagu' asini muna na yan ya pagsambuk na manga Judiyu aw manga Héntil adti bagu na kasakupan na manga mangintu-uway. ²⁰ Yeiy saba ya du-an nan na nyakalabusu aku. Aw yanagaw panawagtawagi aku adti Tyumanem na dili' aku mallek maglong, kay pigsugu' aku nan.

Ya katigkasan na pigsulat

²¹ Na, kaliman ku na ka-ede-an mayu ya pagpakabetang ku asini Roma aw kun unu ya manga pigpan-imo' ku idi, aw un dandanen ni Tikiko adti kamayu ya kadég. Inulug tadun sakanan na pigginawa͡an, aw eped nami na to-o kasaligan na migtabang kanak sa imo-unun dun ni kan Kristu. ²² Aw yeiy ya du-an nan na pigpakawun ku sakanan dun ni kamayu, aw yan ya magdandan kamayu kun unu ya pagpakabetang nami idi aw pakabagsegen nan ya ginawa mayu.

²³ Kay manga inulug nami, gayed awun ni kamayu ya kalinaw ni Kristu eped na kamayu paggaginawa͡ay aw pagpangintu-u, na alag yeiy lyumekat adti Tyumanem na Ama aw si Jisus Kristu na kanaten pangulu. ²⁴ Aw ya kadyawan na Tyumanem awun gayed ni kadég mayu na mig-iganget ya kadakula' na ginawa mayu kan Jisus Kristu na kanaten pangulu.