6
Magtatabangay kitadun
1 Kay manga inulug ku, ila' aw awun inulug tadun na kyaliputan dun ni sala', madyaw pa kun kamu na piggagad da na Ispiritu na Tyumanem ya tumabang kanan aw paliku-un da mayu uman adti Tyumanem. Manang pakadyawa ya tingeg mayu kanan. Aw pagpakatadeng kamu pagaw kamu uman ya mabuyu na sala'. 2 Gayed ya kadég mayu pagtatabangay, pangkay unu ya manga puluglima na nyakapisān kamayu, kay dun da mayu tumana ya sugu' ni Kristu kamayu. 3 Kun awun utaw na matitapid aw dili' tumabang sa eped nan, na, piggawayan da nan baling ya kanan pagka-utawun.
4 Madyaw pa ya tag sambuksambuk kamayu tala-tala-en nan ya kanan imo-unun kun umba' sakanan magpalibantug aw ya dili'. Aw tigkas yan, kun madyaw ya imo-unun nan, magleya sakanan, aw dili' sakanan magpa-unawa sa manga eped nan. 5 Kay ya tag sambuksambuk na utaw un nan tubagen ya kadég na pig-imo' nan.
6 Aw ya manga utaw na pigpalna-uwan sa tingeg na Tyumanem, ya tag sambuksambuk kanilan magtabang galu sa magpalna-uway kanilan pada wala' ya kanan kapelek.
7 Dili' mayu pag-agadan ya kagalu-an na anenganeng mayu. Kay ya Tyumanem dili' kagalu-galu-an. Aw pangkay unu ya tanemen na utaw, yan uman ya un nan aniyen. 8 Kay ya utaw na dyumalug sa pagkaliman na pagka-utawun nan adti pag-imo' sa malatay, yan uman ya ma-ani nan ya kakalatan na pagka-utawun nan, aw agbel sakanan adti atulun kagaya kamoliyan na allaw. Manang ya utaw na dyumalug sa pagkaliman na Ispiritu na Tyumanem, yan ya ma-ani nan ya ginawa na wala' ya katigkasan. 9 Dili' tadun ilaban ya imo-unun na madyaw. Kay kun magpadeleg kitadun mag-imo' sa madyaw, un tadun aniyen ya kadyawan na Tyumanem dun ni allaw na pigpamalli' nan. 10 Yanagaw, dili' tadun kalingawan ya pagpakadyaw sa kadég na eped tadun na utaw, pangkay kinunu, aw labi la sa manga eped tadun na nyangintu-u la.
Ya katigkasan na pagsulat ni Pablo
11 Na, tengtengi mayu ya mangkabakla' na litra asini katigkasan na sulat ku ini. Aku la ya migsulat * kay kaliman ku makalabēt kamu sa un ku paglongun: 12 Ya manga utaw na gayed gyumelgel kamayu na magpatuli', kaliman nilan ya saya' silan na manga eped na Judiyu asuntu sa pagtuman nilan sa katanem yan. Aw nyallek silan pagaw pamulayaman na manga eped na Judiyu, aw yanagaw miglong silan na dili' maka-umba' ya pagpangintu-u na utaw sa pig-imo' ni Kristu adti krus pada dawaten na Tyumanem. 13 Manang magtallalingu silan kay maggelgel silan kamayu magpatuli' siling na pigsugu' na Uldin ni Moysis manang wala' nilan daluga ya kadég na sugu' dun ni Uldin. Yan olo' ya du-an nan na piggelgel kamu nilan magpatuli' kay kaliman nilan ya magpalibantug adti kanilan eped na manga Judiyu. 14 Manang aku, yan olo' ya pigpalibantug ku ya pagkamatay na kanaten matas na pangulu na si Jisus Kristu adti krus. Asuntu sa pagkalyu nan kanaten dun ni krus, wala' da aku kallang na pagkaliman na pagka-utawun ku, aw wala' da ya katundanan na mangkalatay magdumala kanak. 15 Pangkay migpatuli' kitadun aw wala', manang ya pagbagu na Ispiritu na Tyumanem sa anenganeng tadun, dun da olo' ya ma-untung tadun. 16 Pagsambukun galu na Tyumanem ya ginawa na kadég mayu, aw kallatan galu nan uman ya kadég mayu na dyumalug sa palna-u ku asini sulat, kay pigpamalli' da kamu na Tyumanem. 17 Lekat adun, wala' da galu ya utaw na magduwaduwa sa katundanan ku mag-ubat-ubat kamayu kan Kristu, kay beke' nilan ya kya-ulatan manang aku baling ya madég ya ulat asini lawas ku aw yan ya pangilala na pyamulayaman aku na manga utaw asuntu na allang aku ni Kristu.
18 Kay manga inulug ku na nyangintu-u, gayed aku nyanawagtawag adti Tyumanem na kalabetan mayu ya kadakula' na kallat ni Jisus Kristu ya kanaten matas na pangulu.
Yan galu ya ma-imo'.