5
1 Asuntu na pigpaluwa' da kitadun ni Kristu lekat adti pagka͡allang tadun, nyakaluwa' da kitadun uman lekat adti katundanan na Uldin. Yanagaw, dili' da kamu magpa-allang uman sa Uldin aw katanem na manga Judiyu.
2 Betangan mayu adti anenganeng mayu ya kanak piglong. Aku si Pablo ya miglong adti kamayu na kun magpatuli' kamu kay iman mayu na dun da kamu dawata na Tyumanem, wala' da kadi' ya guna na pig-imo' ni Kristu kamayu adti krus! 3 Salutun pa ku uman ya piglong da ku kamayu asini sulat. Pangkay magpatuli' pa ya sambuk na utaw kay ya kaliman nan galu dawaten na Tyumanem, manang dili' sakanan dawaten kantaw ubusun nan tumanen ya kadakula' na Uldin na Tyumanem aw dili' makasala' pangkay sambuk. 4 Aw kun yan ya pigtibagsegan mayu pigbetang adti ginawa mayu ya pagdalug sa Uldin pada un kamu galu dawaten na Tyumanem, kya-eletan da kamu baling dun ni kan Kristu kay tyalikudan da mayu ya kallat na Tyumanem. 5 Manang ya kadég tadun na piggagad na Ispiritu na Tyumanem, dakula' ya kanaten imanen talana tadun tyagadan ya pagkalingeb sa kadég na pigpakang na Tyumanem kanaten, kay pigdawat da kitadun na Tyumanem siling na wala' ya sala', magi sa pagpangintu-u tadun kan Kristu. 6 Kay kun nyakasambuk da kitadun kan Kristu Jisus, wala' da ya labet kun magpatuli' kitadun aw dili'. Yan olo' ya dakula' na ma-untung tadun, ya pagpangintu-u tadun kan Kristu, aw ka-ede-an na utaw ya pagpangintu-u tadun kun dakula' ya ginawa tadun sa Tyumanem aw sa eped na manga utaw.
7 Idtu na muna, madyaw to-o ya pagdalug mayu sa tengteng palna-u kan Kristu, manang singalan ka' ya migpasuway kamayu? Ananga' wala' da kamu pangintu-u sa palna-u na matinaw? 8 Beke' saba na Tyumanem ya migpasuway kamayu, kay ya Tyumanem, yan ya nyamalli' kamayu na ma-imo' tengteng manga ise' nan. 9 Ya palna-u na galu' siling na sangkulut ya patulinay na pigseled adti libukuk na harina, aw dili' madugay tumulin ya kadakula' na libukuk. Maynan uman ya palna-u na galu'. 10 Manang asuntu na nyakasambuk da kamu kan Kristu, kya-ede-an da ku na un kamu lumiku' adti pigpalna-u ku kamayu idtu muna aw dili' da kamu dumalug sa sangkamulu' na palna-u. Manang ya utaw na migpalna-u kamayu sa galu', migpabelengbeleng olo' sa anenganeng mayu, aw un sakanan agaw ukuman na Tyumanem aw pa-emel-emelen nan.
11 Kay manga inulug ku, yan ya pigtanemtanem kanak na manga utaw na mig-ubat-ubat pa aku kunu na awun ma-untung sa pagpatuli' siling na katanem na manga Judiyu. Manang kun matinaw ya piglong nilan, ananga' aku gayed pigpamulayaman na manga Judiyu? Manang yan ya du-an nan na pigpamulayaman aku nilan, kay pig-ubat-ubat ku na dawaten na Tyumanem ya manga utaw asuntu olo' sa pig-imo' ni Kristu adti krus. 12 Aw ya manga utaw na migpabelengbeleng sa anenganeng mayu magi sa pigpalna-u nilan na galu' na dakula' kunu ya untung na pagpatuli', madyaw pa baling kun talinan nilan ya kanilan pagka-utawun!
13 Na, kay manga inulug ku, pangkay pigpamalli' da kamu na Tyumanem aw nyakaluwa' da lekat adti katundanan na Uldin, manang dili' mayu pag-imanen na pigtumbay pa na Tyumanem kamayu ya pagdalug sa pagkaliman na pagka-utawun mayu adti pag-imo' sa malatay. Yan ya madyaw pa baling na gayed kamu magtatabangay asuntu sa paggaginawa͡ay mayu. 14 Pangkay madég ya sugu' na Tyumanem dun ni Uldin nan, manang ya kadég na sugu' nyatibuk asini sambuk: Ginawayi ya eped mu na utaw siling na kanmu pagka-utawun. * 15 Manang kun dili' kamu maggaginawa͡ay aw gayed kamu baling magtatugbukay sa ayil aw magpakalatay, na, pakatadeng kamu pagaw masiling kamu na manga idu' na migpambabanga-ay menda' mabus silan mangkamatay.
Ya bunga na Ispiritu na Tyumanem aw ya pagkaliman na pagka-utawun tadun
16 Ini ya palna-u ku kamayu: Pagpagagad kamu sa Ispiritu na Tyumanem dun ni kadég na pigpan-imo' mayu. Kay kun gagaden kamu nan, dili' da mayu tumanen ya pagkaliman na pagka-utawun mayu mag-imo' sa malatay. 17 Gayed nyatu ya pagkaliman na pagka-utawun tadun adti pagkaliman na Ispiritu na Tyumanem, aw ya Ispiritu tyumanam sa pagkaliman na pagka-utawun tadun. Aw silan ya gayed migtanam adti seled na anenganeng tadun aw yanagaw malug ya pag-imo' sa madyaw pangkay yan ya kaliman tadun imo-un ya kana Tyumanem. 18 Manang kun piggagad da kamu na Ispiritu na Tyumanem, nyakaluwa' da kamu adti katundanan na Uldin.
19 Pagdalug na manga utaw sa pagkaliman na kanilan pagka-utawun, yan ya syampetan nan na pig-imo' nilan ya manga imo-unun na malatay siling na maynini: Miglakadenen silan aw gayed malipa' ya anenganeng nilan. Aw migpan-imo' silan sa makamulamula sa kanilan lawas. 20 Mig-imo' silan sa manga inutaw na un nilan simba͡en na yan ya palangad kanilan tyumanem. Nyagagad silan na tulus na busaw na un mag-imo' sa malatay adti kanilan eped. Gayed nilan pigkalatan na ginawa ya eped na utaw, aw migpan-ayil silan, aw migpatastasay silan. Aw matikadaman silan, aw matitapid, aw mati-atu sa eped na utaw, aw matikibangay silan sa eped, aw yan olo' ya ubaybayen nilan ya magtande' kanilan. 21 Aw migpan-inga-inga-ay silan. Mati-inemay silan aw migpan-iyeped silan dyumalug sa imo-unun na malatay. Aw madég pa uman ya imo-unun nilan na malat. Aw salutun ku ya piglong ku kamayu idtu muna: Ya manga utaw na mig-imo' sa maynini, dili' silan maka-akup adti kasakupan na Tyumanem adti tas na langit.
22 Manang kun piggagad da kitadun na Ispiritu na Tyumanem, yeiy da ya bunga adti ginawa tadun: Pagginawa͡an tadun ya Tyumanem aw ya eped na utaw. Magleya kitadun pangkay unu ya dumateng. Wala' ya kakallekan adti ginawa tadun aw pigsambuk na Tyumanem ya anenganeng na kadég tadun. Aw to-o tadun pagtagenan ya kanaten kadaman adti eped pangkay ya kalim tadun magmalit. Kyallatan tadun ya eped magi sa kanimbet tadun aw pagpasinsiya͡an tadun ya utaw na mag-imo' kanaten sa malatay. Mangkadyaw ya bet tadun adti anenganeng na Tyumanem aw adti anenganeng na manga utaw. Kasaligan kitadun aw maseb. 23 Pakadyawun tadun ya eped na utaw. Aw makatagen kitadun sa pagkaliman na pagka-utawun tadun. Kun imo-un tadun ya kadég yeiy, wala' ya uldin na kalakadan tadun. 24 Ya manga utaw na nyakasambuk da kan Kristu Jisus, pigkalabu da nilan adti kanan krus ya pagkaliman na pagka-utawun nilan aw dun silan paka-agad adti pagkamatay nan. 25 Aw asuntu na pigbagu la na Ispiritu na Tyumanem ya anenganeng tadun, madyaw ka͡agadan da tadun ya pagdumala nan sa pagka-utawun tadun. 26 Dili' kitadun magpatastas, aw dili' kitadun magpanugbuk sa ayil, aw dili' kitadun mag-inga-inga-ay.