4
1-2 Simpan na un da matay ya sambuk na mayaman aw dun ni pamalintugun nan nyatag sa dakula' na ayawanan nan adti ise' nan. Manang asuntu sa tagbi' pa ya ise' nan, wala' pa na ise' tagtuna ya ayawanan na ama nan. Yanagaw ya ise' siling na allang kay pagka͡agadan nan ya sugu' na eped na manga utaw na awun da katundanan kanan dala ya ayawanan taman na allaw na pigpamalli' da dadan na ama nan na un da kanan atag ya ayawanan. 3 Aw maynan uman ya pagpakabetang tadun asini muna sa wala' pa si Kristu paglekat kanaten, kay siling kitadun na allang kay kya͡agadan tadun ya pa-agi na wala' ya guna aw manga palna-u na galu' aw paggaway na manga busaw. 4 Manang pagdateng da na allaw na pigpamalli' da dadan na Tyumanem, pigsugu' nan ya kanan ise' na un magpaka͡utaw adti sambuk na ka͡ubayan na Judiyu aw yanagaw pigka͡agadan na ise' nan ya Uldin na pig-atag na Tyumanem kan Moysis, 5 pada maglekat sa kadég tadun na nyallang na Uldin na Judiyu. Aw dun da kitadun ka-imo' na Tyumanem mangayse' nan. 6 Aw asuntu na ise' da kitadun na Tyumanem, pigsugu' nan ya Ispiritu nan na un meya' adti ginawa tadun. Aw yan da uman ya Ispiritu na nyeya' adti ginawa na ise' nan na si Jisus aw yanagaw mabatug da tadun kangalanan ya Tyumanem, “Kay Ama.” 7 Yanagaw beke' da kitadun na allang manang manga ise' da na Tyumanem, aw un kitadun nan uman atagan na bagi' na pigpakang nan kanaten.
Ya kakaypengan ni Pablo sa manga utaw adti Galacia
8 Na, kamu na beke' na Judiyu, wala' mayu ka-ede-i asini muna ya tengteng Tyumanem, aw nyallang kamu baling na manga tyumanem mayu na galu'. 9 Manang adun da, kya-ede-an da mayu ya tengteng Tyumanem aw kyilala la kamu nan na ise' nan. Yanagaw, ananga' kaliman pa mayu lumiku' adti manga pa-agi na wala' ya guna aw manga palna-u na galu'? Kay dili' saba yan makapaluwa' kamayu lekat adti pagpa-emel-emel na Tyumanem! Unu ka', kaliman mayu ya magpa-allang uman? 10 Aw pangkay beke' kamu na Judiyu, manang dyengeg ku na pigbetang mayu adti anenganeng mayu ya matas na manga allaw aw umay na manga Judiyu pada katutukan galu ya Tyumanem kamayu. 11 Nyaypeng aku kamayu pagaw sapadan da mayu ya kadég na pigpalna-u ku kamayu. 12 Yanagaw, kay manga inulug ku, to-o aku nyanginayu' kamayu na pagsiling kamu kanake' aw dili' da kamu magpa-allang sa manga katanem na manga Judiyu aw manga palna-u nilan na galu'. Pangkay aku utaw na Judiyu, manang pagsilingen da ta kamu na beke' na Judiyu na wala' ya lābet na Uldin aw katanem na manga Judiyu.
Idtu muna na pag-ubat-ubat ku adti kamayu, wala' ya malat na bet mayu kanak. 13 Kya-anenganengan agya mayu ya tagna' ku adti sayid mayu, na awun kyagamakan na lawas ku, * aw talana aku mayu pig-ipat, nyakaselat aku kamayu miglong sa madyaw na ubat-ubat kan Kristu. 14 Aw pangkay awun kyagamakan na lawas ku, wala' aku mayu kele͡i, manang pigbasa͡an aku mayu siling na anghil na Tyumanem lekat adti tas na langit. Ya pagpamasa mayu kanak liwan na si Kristu Jisus ya pyamasa͡an mayu. 15 Idtu na manga allaw yan, madyaw to-o ya ginawa mayu kanak, aw kun mabatug mayu galu lugiten ya mata mayu aw atag kanak, yan galu ya un mayu imo-un asuntu sa kadakula' na kamayu ginawa kanak. Manang adun da, nya-uman ya ginawa mayu kanak, aw wala' ku ka-ede-i kun unu ya du-an nan. 16 Unu, pig-imo' da aku mayu po-on asuntu olo' sa pag-ubat-ubat ku kamayu sa palna-u na matinaw?
17 Na, kya-ede-an da ku na awun manga utaw na migpalna-u kamayu na madyaw tumanen ya Uldin aw katanem na manga Judiyu, aw pigpakadyaw nilan ya bet nilan adti kamayu, aw yanagaw iman mayu kun nyaypeng silan sa pagpakabetang mayu. Manang wala' ya untung na palna-u nilan aw dili' madyaw ya tud nilan. Kay kaliman nilan talikudan mayu ya palna-u ku na un mayu silan dalugun. 18 Dili' malat kun dumalug kamu sa palna-u na sambuk na utaw, asal nan madyaw ya tud nan aw matulid ya palna-u nan kamayu, pangkay awun aku ni sayid mayu aw wala'. Manang yan ya pagkallekan ku ya tud na manga utaw na migpalna-u kamayu. 19 Siling kamu saba na tengteng manga ise' ku. Kay idtu muna, sa bagu pa kamu ma͡utaw dun ni pagpangintu-u mayu kan Kristu, dayaw ta kamu pig-ipat aw dayaw ta kamu pigpalna-uwan pada tumulin ya pagpangintu-u mayu. Aw kenne' pa ku ya migti-is asuntu kamayu siling na ka͡ubayan na pyetesan, taman na masalig ya pagpangintu-u mayu adti kan Kristu. 20 To-o aku kamayu nyaypeng, aw wala' ku ka-ede-i kun unun ku ya pagtabang sa pagpangintu-u mayu adti kawatan. Kaliman ku pakadyawun ya kanak tingeg, pagaw mabulut ya tingeg ku asini sulat yeiy. Madyaw pa galu kun awun aku ni tampid mayu aw magkasampetanen kitadun.
Ya pundinganan sa duwa ya ka͡ubayan: si Agar aw si Sara
21 Na, kya-ede-an ku na ya manga eped mayu malim dumalug sa katanem na manga Judiyu aw sa Uldin nilan, aw paglongun ta kamu madyaw kun anenganengen mayu ya pigsulat ni Moysis asini muna. 22 Kay pigsulat nan na awun duwa ya ise' ni Abraham na eseg. Ya sambuk apit adti allang nan na si Agar aw ya sambuk apit adti ka͡ubayan nan na si Sara na beke' na allang. 23 Ya pagka͡utaw na ise' nan adti allang nan siling olo' na katanem na utaw mag-ise'. * Manang ya pagka͡utaw na ise' nan adti tengteng ka͡ubayan nan, yan ya pagtuman da na Tyumanem sa pigpakang nan.
24 Na, ya duwa ya ka͡ubayan yeiy nya-imo' pundinganan sa duwa ya pakang na Tyumanem na dayaw mig-iganget. Ya sambuk, yan ya Uldin na pig-atag na Tyumanem adti manga utaw na Isra-él dun ni Buntud na Sinay, aw tyande' nilan na un nilan dalugun. Aw ya Uldin yan siling ni Agar na allang ni Abraham, kay siling na allang ya manga utaw na gayed dyumalug sa Uldin. 25 Aw adun, silan siling na manga Judiyu na nyeya' adti Jérusalim na dayaw dyumalug sa Uldin. Siling silan na allang na si Agar kay si Agar nya-imo' pundinganan sa Uldin na pig-atag na Tyumanem kan Moysis adti Buntud na Sinay asini muna dun ni banwa na Arabiya. 26 Manang kitadun wala' kallang na Uldin. Kay ya sambuk na pakang na Tyumanem yan ya asuntu sa kallat nan. Aw nyaka-akup da kitadun baling adti kasakupan na Tyumanem adti bagu na Jérusalim na awun ni tas na langit, asuntu sa pigpakang na Tyumanem kan Abraham. Aw nyatuman ya pakang nan dun ni kan Jisus na migpaluwa' kanaten. Aw yanagaw, si Sara nya-imo' tengteng tyugbulan tadun. 27 Kay yan ya pigpasulat na Tyumanem asini muna;
“Ikaw na ka͡ubayan na nyatikem ya anakanan mu, pagleya kaw.
Pangkay wala' kaw petesi, pakagana ya ginawa mu magkanta sa pagleya,
kay pangkay pig-ayawan da kaw na eseg mu, un kaw nan liku-an
aw magkadakula' pa ya buwadbuwad mu kay sa ka͡ubayan na awun eseg nan.” *
28 Na, kay manga inulug ku na nyangintu-u, nya-imo' kitadun ise' ni Abraham aw si Sara asuntu sa pigpakang na Tyumanem kanilan asini muna, siling ni Isa-ak na ise' nilan. 29 Kay si Isa-ak yan ya ise' na nya͡utaw asuntu sa pigpakang na Tyumanem manang pigpamulayaman sakanan ni Isma-él na yan ya nya͡utaw na katanem olo' na utaw mag-ise'. Aw maynan uman ya kadég tadun na pigbagu la na Ispiritu na Tyumanem adti ginawa tadun, kay pigpamulayaman uman kitadun na manga utaw na malim maggagad kanaten dumalug sa Uldin aw manga katanem na manga Judiyu. 30 Manang yeiy ya adti pigpasulat na Tyumanem asini muna: “Papanawa la ya allang ini na si Agar aw ise' nan. Kay dili' si Isma-él kabagi-an na ayawanan mu. Sayda olo' ni Isa-ak ya makatagtun!” * 31 Yanagaw, kay manga inulug ku, beke' kitadun na buwadbuwad na ka͡ubayan na allang, manang buwadbuwad baling kitadun na ka͡ubayan na beke' na allang.