Ya Manga Pigpan-imo' na Manga Apostolés
na pigsulat ni Lukas
Ya Muna Pagpa-ede'
Singalan si Lukas?
Si Lukas, sambuk sakanan na doktor na syumambuk kan Pablo adti lunsud na Troas aw mig-iyeped kan Pablo aw si Silas aw si Timotiyo adti madég na panaw nilan. Na, si Lukas utaw na Héntil aw beke' na Judiyu. To-o sakanan matadeng sa tingeg na Grigo, aw matadeng uman magdalugdalug sa tultulanen. Asini sulat na Manga Pigpan-imo' na Manga Apostolés, pigngalanan ni Lukas ya kasiyaman tag lima ya manga utaw. Madég uman ya manga banwa na pigngalanan nan, dala ya katluwan tag duwa ya nasud, dala uman ya kalima͡an tag upat ya syudad aw siyam ya pulu'. Aw ya manga banwa yan alag tadun kita-en adti manga mapa asini liblu. Sistigus si Lukas sa madég na nya-imo' dun ni pigsulat nan, aw pigluduk nan uman ya manga kasampetanen na madég na utaw na nya-ede' sa manga eped na nyangka-imo'. Seled kunu na umay na 62 ya pagsulat ni Lukas.
Ya manga pigsulat ni Lukas
Duwa ya pigsulat ni Lukas na awun ni seled na Biblia tadun. Ya sambuk yan Ya Madyaw na Ubat-ubat kan Jisus, aw ya sambuk yan Ya Manga Pigpan-imo' na Manga Apostolés. Asini muna, alag yeiy pigsulat adti duwa ya libru na piglulun.*
Na, ya utaw na pigsulatan ni Lukas yan si Tyupilo, aw kaliman ni Lukas na ya sulat nan basa͡en uman na eped na manga Héntil adti kadakula' na banwa pada ka-ede-an nilan ya madyaw na ubat-ubat kan Kristu Jisus.
Ya Manga Pigpan-imo' na Manga Apostolés, yan ya kasampetanen sa kya-agiyan ni Pédro aw si Pablo aw manga eped na sugu-anen na Tyumanem, aw labi la ya manga pigpan-imo' na Ispiritu na Tyumanem aw ya katulus nan dun ni manga mangintu-uway.
Ya kasampetanen ini migpalekat adti Jérusalim dengan na pagka-engat ni Jisus adti tas na langit na umay gya na 30. Aw dun da taman ya kasampetanen sa panaw ni Pablo adti syudad na Roma aw ya pagtagad nan sa pag-usay kanan na Impirador na si Néro dun ni umay na 62.
Ya tultulanen ini, nya-utud-utud na makanem: /ip