16
Ya pagkataw ni Jisus
1 Pagsallep da na sega na Allaw na Paglagdeng, * si Maria Magdal�na, aw si Maria na ina ni Santiago, aw si Salom�, nyayad silan sa manimbo' na lana na un asag adti lawas ni Jisus kay yan ya katanem na manga Judiyu.
2 Paglegtak da na sega sa allaw na Linggo, migpasinan silan adti lebeng ni Jisus. 3 Na, sagwa dun pa silan ni dalan, mig-usip-usipay silan, law nilan, �Singan ya un maglilid kanaten sa batu lekat adti baka' na lebeng?� 4 Manang pag-inunu nilan lekat adti mawatawat, kyinita' nilan na piglilid da adti kilid ya dakula' na batu. 5 Pagseled nilan adti lebeng, kyumita' silan sa bata' na syumut sa to-o maputi' na kad�gkad�g na nyingkud apit adti kalintu na ilib. Aw ya manga ka?ubayan to-o kyumega'. 6 Manang miglong ya bata' kanilan, �Dili' kamu magkallek! Kya-ede-an ku na pyaninaw mayu si Jisus na taga Nasarit na pigkalabuwan adti krus. Wala' da sakanan asini. Nyataw da! Inunuwa mayu ya kyakulangan nan iyan. 7 Na, panaw da kamu! Ubati mayu ya manga umagakan nan, labi la si P�dro, na nyuna la si Jisus adti Galiliya aw dun da mayu kita-a siling na pig-ubat nan kamayu idtu muna.� 8 Aw lyumuwa' silan lekat adti lebeng aw to-o silan nyalaguy kay migteneb silan aw nya-enneng-enneng. Aw wala' nilan ubat-ubatan ya kyinita' nilan adti eped na utaw kay to-o silan nyallek. *
Ya pagpakita' ni Jisus adti manga umagakan nan
9 [Na, pagkataw da ni Jisus na to-o maselem na tagna' na allaw na simana, una migpakita' kan Maria Magdal�na na yan ya pig-alilinan nan sa pitu ya busaw idtu muna. 10 Pagkita' da ni Maria kan Jisus, nyanaw sakanan aw kyadtuwan nan ya manga umagakan ni Jisus kay kenne' pa nilan migpanmatay, aw pig-ubat-ubat nan kanilan na kyinita' nan si Jisus. 11 Manang pagdengeg nilan na nyataw da si Jisus aw kyinita' nan, wala' nilan pangintu-uwi ya piglong nan.
12 Pagkatigkas yan, migpakita' si Jisus adti duwa ya umagakan nan sagwa nyanaw silan adti luwa' na syudad, manang wala' nilan maksay kilala?a kay nyabagu la ya kanan lawas. 13 Manang pagka-ede' da nilan na yan si Jisus, lyumiku' silan adti J�rusalim, aw pigdandan nilan adti manga eped nilan ya kyinita' nilan. Manang ya eped na umagakan kenne' pa na wala' silan pangintu-u.
14 Aw wala' kadugay, migpakita' si Jisus adti sampulu' tag gesa' ya umagakan nan sagwa kyuman silan. Pigsagda nan silan asuntu sa kategel nilan aw katagbi' na pagpangintu-u nilan pangkay pig-ubatan da na manga utaw na kyumita' kanan na nyataw. 15 Katigkas yan, miglong si Jisus kanilan, �Legeba mayu ya kad�g na banwa asini tas na lupa', aw pa-ede-an mayu ya Madyaw na Ubat-ubat kanak adti kad�g na utaw. 16 Aw kun singalan ya mangintu-u kanak aw magpaba?utismu, dawaten nan ya ginawa na wala' ya katigkasan, manang kun singalan ya dili' mangintu-u kanak, ukuman sakanan na Tyumanem aw pa-emel-emelen nan asuntu sa manga sala' nan. 17 Aw maka-agad ya manga pangilala y�iy sa manga utaw na mangintu-u kanak: Dun ni katulus na kanak ngalan, maka-alilin silan sa manga busaw, aw makapaglong silan sa tingeg na wala' pa nilan lemena paglongan. 18 Aw pangkay kun awun ka-awidan nilan na ulud aw pangkay kun maka-inem silan sa makababaleng, manang wala' ya malat na dumateng kanilan. Aw kun awidan nilan ya manga kyedelan, dayaw silan kaguli-an.�
Ya pag-uli' ni Jisus adti tas na langit
19 Pagkatigkas da ni Jisus maglong sa manga umagakan nan, nya-engat sakanan adti tas na langit, aw nyingkud adti kalintu na Tyumanem. 20 Aw nyanaw ya manga umagakan nan, aw lyegeb nilan ya kad�g na banwa aw pigpa-ede' nilan ya Madyaw na Ubat-ubat kan Jisus. Aw pangkay ayin silan panaw, kenne' na katulus ni Jisus dun ni kanilan aw yan ya tyumabang kanilan, aw ya manga pangilala na pigpa-imo' nan kanilan, yan ya migmatinaw sa ubat-ubat nilan.]