Ya kasampetanen kan Jonas
Ya pagpa-ede' sa kasampetanen kan Jonas
Ya kasampetanen kan Jonas migpalekat adti banwa na Isra-él asini muna aw migpadeleg adti dakula' na syudad na Ninibé na pig-eya-an na hari' na banwa na Asiriya. Wala' da adun ya syudad na Ninibé manang ya banwa na Asiriya nyakadagub da adti nasud na Irak. Ya banwa na Tarsis asini muna, yan da ya nasud na Éspanya adun aw mawat to-o lekat adti Isra-él. Ya banwa na Tarsis apit adti sallepan na Isra-él aw ya syudad na Ninibé apit adti silatan.
Ya kasampetanen kan Jonas seled na paghari' na kadwa na Jirobo-am adti Isra-él, aw pig-ubatubat nan ya manga tingeg na Tyumanem. Kita͡en mu uman adti 2 Hadi' 14:25. Idtu na manga allaw yan, tabay pa na manga sundalu adti nasud na Asiriya manang to-o silan mangkéseg. Ya katanem na manga utaw dun ni Ninibé, nyangintu-u silan sa madég na sangkamulu' na tyumanem. Yanagaw dili' malin si Jonas madti banwa nilan.
Ya syudad na Ninibé pig-imo' ni Nimrod. (Basa͡en mu ya Gén. 10:8-12). Kya-ede-an tadun adti Nahum 2 aw 3 aw adti Soponyas 2:13-15 na to-o malat aw mangkabulut ya manga utaw dun ni Ninibé. Pagdateng na umay na 722 B.C., pig-agaw aw pigtaban na sambuk na hari' na Asiriya ya kadég na utaw na nyeya' di nasud na Isra-él aw pigpa-agad nan silan adti madég na mawat na banwa aw wala' da silan uli'. Manang pagdateng na umay na 612 B.C., pigkalat na manga utaw na Babilonya ya syudad na Ninibé dun ni Asiriya aw wala' da umana.
Adti Matiyu 12:39-42 aw Lukas 11:29-30 pig-ubat ni Jisus ya kyagamakan ni Jonas adti seled na buntit na dakula' na isda', aw pig-imo' nan pundinganan sa pagkamatay nan aw pagkataw nan lekat adti lebeng pagkatigkas na tulungallaw.
Ya seled na kasampetanen kan Jonas
Ya pagpalaguy ni Jonas sa sugu' na Tyumanem
Ya pagpanawagtawag ni Jonas
Ya panaw ni Jonas adti Ninibé
Ya kadaman ni Jonas aw kallat na Tyumanem