Jonas 1

Ya kasampetanen kan Jonas

Ya pagpalaguy ni Jonas sa sugu' na Tyumanem

¹ Si Yahwéh ya Tyumanem na Gayed Awun migpa-ede' sa tingeg nan adti kan Jonas na ise' ni Amitay. Sambuk na allaw migsugu' si Yahwéh kanan, law nan, ² “Kadtu kaw ni banwa apit adti silatan taman dun ni dakula' na syudad na Ninibé aw ubat-ubati silan na un ku silan kalaten kay ya kanilan mangkalatay na imo-unun alag ku kyinita'.”

³ Aw nyindeg si Jonas manang nyalaguy baling syuminan adti eped na banwa di sallepan, adti banwa na Tarsis, kay kaliman nan palaguyan nan si Yahwéh. Nyadti syudad na Joppa aw kyumita' sa barko na un da madti Tarsis. Yanagaw nyayad sa piliti nan aw nyagad sa magtalabahuway sa barko sumakay suminan adti Tarsis, kay kaliman nan magpa-awat sa sugu' ni Yahwéh.

⁴ Aw nyanaw ya barko syuminan adti Tarsis, manang dun da silan ni tenga-tenga' na dagat, pigpakelegan silan ni Yahwéh na dakula' na bagyu'. Tyumambel ya mabandes na samet aw matas to-o ya baled aw sama' nan un da magkalat ya barko na syakayan nilan. ⁵ Aw ya manga utaw na magtalabahuway dun ni barko, to-o silan nyallek aw migtatawag ya tag sambuksambuk adti kanilan manga tyumanem aw pigpan-agbel nilan ya manga lulan adti dagat, kay kaliman nilan magkagan ya barko. Manang si Jonas to-o baling nyakatulug adti dalem na pantaw dun ni barko. ⁶ Manang kyumita' kanan ya kapitan na barko aw miglong, “Tay, kay Léw! Wan da yan da pagpakatuluga? Un da kitadun baling matay! Pagbangun kaw aw pagsekat kaw kanaten sa tabang adti kanmu Tyumanem pagaw kallatan nan kitadun.”

⁷ Aw dun ni pantaw na barko migpanbalawbalaw ya manga magtalabahuway, law nilan, “Mag-ublut-ublut kitadun kun singalan ya inindegan sa pamulayam na dyumateng kanaten.” Aw mig-ublut-ublut silan aw si Jonas ya kya-ublutan. ⁸ Aw nyusip silan kanan, “Ubatan kanami adun, walan ya pig-imo' mu na du-an kitadun pamulayaman? Singalan kaw? Ayin ya banwa na lyekatan mu aw wan ya kanmu katugbul?”

⁹ Aw tyumubag si Jonas, “Aku ya sambuk na utaw na Hibriyu. Pigdeyen ku si Yahwéh na mig-eya' adti tas na langit. Yan ya Tyumanem na mig-imo' sa dagat aw lupa' na magdang.”

¹⁰ Pag-ubat ni Jonas kanilan sa pagpalaguy nan lekat adti sugu' na Tyumanem, to-o silan nyallek. Aw miglong silan, “Tay, kay Léw, sa kalat na pig-imo' mu!” ¹¹ Talana nilan migbalawbalaw, to-o pa baling migkabandes ya bagyu' aw law nilan, “Unu ya imo-un nami kanmu mata' tumangke' ya bagyu' ini?”

¹² Tyumubag si Jonas, “Sagupuwa aku mayu aw agbelan aku mayu adti dagat mata' tumangke' ya mabandes na bagyu' ini, kay kya-ede-an ku na aku ya du-an na bagyu' yeiy.”

¹³ Manang pigpakabagseg nilan ya pagbugsay sa barko na madala galu aw dumateng adti ligad na dagat, manang dili' nilan mabatug, kay to-o la baling migkabandes ya bagyu'. ¹⁴ Yanagaw nyanawagtawag silan adti Tyumanem ni Jonas na si Yahwéh, law nilan, “Dili' galu kami tumbay matay sa sala' na utaw ini. Aw dili' mu kami pagpasala-en kay kya-ede-an nami na ya pamulayam yeiy kanmu pagbaya'.”

¹⁵ Yanagaw pigsagupu nilan si Jonas aw pig-agbel nilan adti tas na dagat aw nyaksay tyumangke' ya samet aw baled na dagat. ¹⁶ Aw ya manga magtalabahuway dun ni barko nyallek to-o kan Yahwéh. Yanagaw migdugsu' silan adti kanan aw mig-imo' sa pakang na un da silan dumalug sa sugu' nan.

¹⁷ Aw migsugu' si Yahwéh sa sambuk na dakula' na isda' aw piglamun nan si Jonas. Aw ya kadugay ni Jonas adti seled na buntit na isda' tulungallaw aw tulunggabi.