Jonas 2

Ya Pagpanawagtawag ni Jonas

¹ Talana adtu pa si Jonas ni buntit na isda', migtawag kan Yahwéh na kanan Tyumanem, law nan,

² “Migpakilalat aku kanmu, kay Yahwéh, lekat adti kanak kyagamakan

aw tyumubag kaw kanak.

Migpakilalat aku kanmu lekat adti kaludukan na nyangkamatay

aw dyengeg mu ya panawagtawag ku.

³ Pig-agbel aku mu adti tenga-tenga' na dagat

aw nyalened aku adti kalaleman.

Kyatabunan aku na tubig na dagat

aw mangkabakla' na baled nyangkalulun adti tas ku.

⁴ Iman ku aw pigpabaya-an da aku mu

manang pig-iman ku na kita-en pa ku uman ya kanmu Témplo.

⁵ Tyabul aku na tubig

aw un da aku malemes.

Ya kalalem na dagat tyumabul kanak

aw nyaputus ya ulu ku na sagbet na dagat.

⁶ Nyatelled aku

aw nyaliglig adti salad na kabuludan.

Iman ku aw kyaliputan da aku adti kyaludukan na nyangkamatay na dili' da ka-uwangan,

manang ikaw, kay Yahwéh, ya syumakmit kanak

aw pigmataw aku mu, kay Yahwéh na Tyumanem ku.

⁷ Na, byati' ku na un da mapalos ya kanak ginawa

manang nyaka-anenganeng aku kanmu, kay Yahwéh,

aw dyengeg mu dun ni kanmu Témplo ya panawagtawag ku.

⁸ Na, silan na syumalig sa kanilan manga anitu na inutaw pig-ayawan nilan ya tengteng na pagsalig nilan kan Yahwéh na Tyumanem na Gayed Awun.

⁹ Manang adi kanak, magdalangan aku sa pagdeyen kanmu na yan ya palangad dugsu' ku kanmu kay un ku tumanen ya kanak pakang.

Si Yahwéh, yan olo' ya magpakapaluwa'!”

Yan da ya pagtawag ni Jonas adti Tyumanem dun ni buntit na isda'.

¹⁰ Aw pigsugu' na Tyumanem ya isda' na lupaden si Jonas adti dulug na dagat aw nyagad ya isda'.