Jonas 3

Ya Pagkadtu ni Jonas adti Ninibé

¹ Na, yeiy ya kadwa na piglong ni Yahwéh kan Jonas, law nan, ² “Kadtu kaw ni dakula' to-o na syudad na Ninibé aw ubat-ubati ya manga utaw sa kanak tingeg, kay kyinita' ku ya imo-unun nilan na mangkalatay.” ³ Aw nyanaw si Jonas adti Ninibé pagtuman sa sugu' ni Yahwéh.

Na, ya Ninibé dakula' to-o na syudad. Kun legeben mu, tulungallaw panawun. ⁴ Pagseled ni Jonas adti syudad, sangallaw nan migpanawpanaw, aw tigkas yan, migpalekat mig-ubat-ubat sa tingeg na Tyumanem, law nan, “Un da na Tyumanem kalaten ya syudad ini! Olo' dakman kapatan ya allaw na pagtagad nan.”

⁵ Yanagaw nyangintu-u ya manga utaw dun ni Ninibé sa tingeg na Tyumanen. Pangkay makabatug silan aw tagitu', alag silan syumut sa kayab na saku' kay yan ya pangilala sa kanilan pagselsel. Aw migpalekat silan migpuwasa.

⁶ Pagdengeg na hari' sa ubat-ubat yan, nyindeg adti kanan ingkudanan na katundanan aw pigluwas nan ya sa-ul na pagkahari' nan aw syumut sa kayab na saku aw nyingkud adti tas na lupa' na pigtimundu' na abu kay yan ya pangilala na pagselsel nan. ⁷ Aw nyamene' ya hari' sa manga pigsaligan nan na mag-ubat-ubat adti kadég na manga utaw na dili' pa silan kuman aw minem, aw dili' pa uman silan magpa-inem aw magpakan sa manga ayep nilan. ⁸ Law nan, “Sumut da ya kadég na utaw sa kayab na saku mata' kita͡en na Tyumanem ya kanaten ginawa na migselsel da, aw pangkay ya manga ayep pasutan uman na kayab na saku. Aw panawagtawag kamu adti Tyumanem aw magsekat sa tabang nan. Talikudan aw ayawi mayu ya imo-unun mayu na mangkalatay. ⁹ Singan ya nya-ede' sa anenganeng na Tyumanem? Pagaw ma-alin ya kanan anenganeng sa dakula' na kadaman nan, aw dili' da kitadun mangkamatay.”

¹⁰ Aw pagkita' na Tyumanem na pigtalikudan nilan ya kadég na imo-unun na mangkalatay, yanagaw pig-uman nan ya kanan palpa aw wala' nan palosa ya pagkalat sa syudad yan.