4
Ya kadaman ni Jonas aw kallat na Tyumanem
1 Manang to-o baling nyadaman si Jonas aw wala' pagleya sa pagselsel nilan. 2 Aw miggumudgumud si Jonas adti kan Yahwéh, law nan, “Enda', kay Yahwéh, yeiy ya piglong ku kanmu idtu muna na adtu pa aku ni kanak banwa. Aw yan ya du-an nan na nyalaguy aku aw syuminan adti Tarsis aw wala' dalug sa kanmu sugu', kay kya-ede-an ta kaw na ikaw ya Tyumanem na magkallat sa manga utaw aw magginawa kanilan aw dili' maksay magkadaman aw pagaw dili' mu palosun ya kanmu palpa sa pagkalat sa syudad. 3 Yanagaw, kay Yahwéh, kamanga la ya ginawa ku. Madyaw pa na matay aku, dili' da malim mataw.”
4 Aw tyumubag si Yahwéh, law nan, “Unu, madaman kaw ka' seiy?”
5 Aw lyumuwa' si Jonas sa syudad aw nyanaw apit adti silatan na syudad aw dun da ingkud. Aw mig-imo' sa tagbi' na talanding na un nan pasilungan. Aw nyingkud di landungan aw migtagad kun wan ya datengan na Ninibé.
6 Aw migpagiti' si Yahwéh na Tyumanem sa sambuk na balagen aw pigpatulin nan na un ni Jonas pasilungan. Aw piglala ya ginawa ni Jonas aw to-o migleya sa balagen yan.
7 Manang pagka͡allaw na pagsilat da na sega, migpadala ya Tyumanem sa sambuk ya lala na kyuman sa lawās na balagen, aw nyalanes ya balagen aw nyatay da.
8 Aw pagsaka na sega, migpatambel ya Tyumanem sa samet na to-o mapasu' lekat adti silatan. Aw kyapasu-an si Jonas na sega aw to-o migkalumay. To-o migti-is aw kaliman da nan matay. Aw miglong, “Madyaw pa ya nyatay da aku. Dili' da aku malim mataw.”
9 Aw nyusip da uman ya Tyumanem kan Jonas, “Ananga' kaw madaman sa tin sagbet yeiy?”
Aw tyumubag si Jonas, “E-e, tengteng ku yeiy kyadaman, aw kaliman da ku galu matay!”
10 Aw miglong si Yahwéh, “Pagkasambuk na gabi, ya sagbet yeiy nyataw, aw pagkasambuk uman na gabi nyatay da uman. Wala' mu tanema aw wala' mu patulina, manang to-o mu kadi' kyallatan ya tanem yeiy? 11 Kay Jonas, to-o pa matas ya kanak kallat sa dakula' to-o na syudad na Ninibé kay ya kadég na manga utaw na nyeya' dun ni syudad sanggatus aw kaluwan ka malalan silan, aw wala' pa ya labet na manga ayep nilan. Aw makalalat ya manga utaw dun, kay wala' nilan ka-ede-i kun unu ya madyaw aw unu ya malat na imo-unun4:11 wala' nilan ka-ede-i kun ayin ya kawala aw ayin ya kalintu. .”
Yan da ya kasampetanen kan Jonas.