Ya kasampetanen kan
Ruth
Ya Pagpa-ede' sa kasampetanen kan Ruth
Asini kasampetanen sa ka͡ubayan na pigngalanan na si Ruth, duwa ya banwa na pig-eya-an nan, ya banwa na Mo-ab aw banwa na Juda. Na, si Mo-ab, yan ya ise' ni Lot na migbuwadbuwad menda' nya-imo' nasud na Mo-ab--kita͡en mu adti Gén. 19:30-38. Aw ya banwa na Mo-ab apit adti silatan na banwa na Juda, aw kya-eletan silan na Dagat na Asin. Nyakadagub da adun adti nasud na Jordan ya banwa na pigngalanan asini muna na Mo-ab.
Ya banwa na Juda, yan ya pig-eya-an na sakup na buwadbuwad ni Juda. Dun ni seled na banwa na Juda ya tagbi' na lunsud na Bitléhém na pig-imo' na manga utaw adti tas na kabuludan. Adti baba' na lunsud awun madyaw na lupa' pagtaneman sa trigu, aw sibada, aw kawuy na olibo, aw pig-imo' nilan manga padasanan. Yan ya banwa piglebengan ni Jakub sa ka͡ubayan nan na si Rakél aw yan ya lunsud na kya͡utawan ni Dabid na nya-imo' hari' sa Isra-él, aw yan uman ya kya͡utawan ni Jisus na Misiyas. Ya kalapit na lunsud na Bitléhém adti syudad na Jérusalim manga walung ka kilomitro.
Ya kasampetanen ini nyakadengan sa pagdumala na manga man-usayay sa manga utaw na Isra-él. Wala' pa ya hari' nilan. Lekat na kasampetanen ini taman adun manga tulummalalan aw tulunggatus ya umay. Pigdalugdalug ya kasampetanen kan Ruth taman na nyaka-agi la ya paghari' ni Dabid. Pagkatigkas yan, pigsulat na manga utaw na Isra-él ya kasampetanen ini.
Ya manga utaw asini kasampetanen, yan si Élimelék, aw ka͡ubayan nan na si Na-omi, aw si Ruth, aw si Bo-as. Taga Mo-ab si Ruth. Ya katanem na manga utaw na Mo-ab, magpangintu-u silan sa manga sangkamulu' na tyumanem aw malat ya imo-unun nilan. Manang wala' ni Ruth daluga ya manga katanem na manga utaw na Mo-ab. Dyalug nan baling ya Tyumanem na manga Hibriyu, ya tengteng Tyumanem na pigngalanan na si Yahwéh. Yan ya kakawasan na ngalan ni Yahwéh: ya Tyumanem na Gayed Awun. Aw awun si Yahwéh adti sayid ni Na-omi aw si Ruth aw tyandanan nan silan na kadyawan.
Si Élimelék, aw si Na-omi, aw si Bo-as, alag silan buwadbuwad ni Juda. Dun ni seled na Uldin ni Yahwéh adti manga utaw na Isra-él: kun awun eseg na matay, ya sambuk na kadégan nan na to-o malapit ya pagkélug nilan, yan ya magtabang aw magdiyaga sa ka͡ubayan na nyabalu aw manga manélu. Manang kun wala' ya manélu, 1) yan ya makatagtun sa lupa' na utaw na nyatay da, pada dili' matagtun na utaw na beke' na kadégan nilan, 2) aw yan ya maninaw sa sambuk na kadégan nan na eseg na un mangugnan sa balu, manang kun wala' ya kita-en nan, yan da ya mangugnan sa balu pada dili' malagak ya buwadbuwad na utaw na nyatay da. Kita͡en mu uman adti Num. 27:5-11, aw Num. 36:6-9, aw Déut. 25:5-10.