Ya kasampetanen kan
Ruth
1
Si Na-omi aw si Ruth
1 Asini na muna na migdumala pa ya manga mag-usayay sa banwa na Isra-él, dyumateng ya dakula' na getem. Aw nyindeg ya sambuk na utaw adti lunsud na Bitléhém na sakup na Juda. Migpa-agad sa ka͡ubayan nan aw ya duwa ya mangayse' nan na eseg aw nyadtu silan ni banwa na Mo-ab. 2 Ya ngalan na utaw yan na si Élimelék aw si Na-omi ya ka͡ubayan nan. Aw ya mangayse' nan si Malon aw si Kilyon. Alag silan buwadbuwad ni Iprata na taga lunsud na Bitléhém dun ni Juda. Nyanaw silan adti banwa na Mo-ab aw mig-eya' silan dun.
3 Na, wala' kadugay nyatay si Élimelék aw dakman si Na-omi yan ya nyasama' aw ya duwa ya mangayse' nan na eseg. 4 Aw ya mangayse' nan nyangugnan sa manga ka͡ubayan dun ni banwa na Mo-ab. Ya sambuk nyangugnan kan Orpa aw ya sambuk nyangugnan kan Ruth. Wala' pa katigkas ya sampulung ka͡umay na pag-eya' nilan adti banwa na Mo-ab, 5 nyatay alag si Malon aw si Kilyon. Aw dakman si Na-omi yan ya nyasama'. Wala' da ya eseg nan aw ya duwa ya mangayse' nan. Nyabus da silan nyatay.
6 Dun ni Mo-ab, dyengeg ni Na-omi ya manga utaw adti Juda na pigpaka͡adyaw silan ni Yahwéh na Tyumanem na Gayed Awun, aw pig-atagan nan silan na dakula' na ani. Aw nyanigpes si Na-omi sa pag-uli' nan adti banwa na Isra-él. 7 Aw pig-indegan nan ya banwa na pigdayuwan nan aw nyagad kanan ya duwa ya makeye' nan. Nyanaw silan syuminan adti Juda.
8 Dun pa silan ni dalan, miglong si Na-omi kanilan, “Uli' da kamu adti banwa na mangkatikadeng mayu aw dili' da kamu mag-agad kanak. Kallatan kamu galu ni Yahwéh sa kadyaw mayu kanak aw sa eseg mayu na nyangkamatay da. 9 Kallatan kamu galu ni Yahwéh aw makapangugnan kamu uman aw magkadyaw ya pag-eya' mayu.”
Aw pig-alekan nan silan aw migpansugaw ya manga makeye' nan, 10 aw law nilan kanan, “Dili' kami beg makaluwat kanmu, kay Ina'. Magad kami kanmu adti banwa na manga kadégan mu.”
11 Manang miglong uman si Na-omi, “Uli' da kamu, kay Kulé'. Walan ya un mayu kanak agaden? Dili' da aku maka-ise' na ma-imo' eseg mayu. 12 Yanagaw uli' kamu adti banwa mayu kay unud ya ginawa ku aw dili' da aku makapangugnan. Pangkay awun pa eseg ku aw mag-ise' pa aku sa eseg kagaya na gabi, unun mayu yan? 13 Makatagad kamu ka' na tumulin silan? Unu, katagenan mayu ka' ya ginawa mayu na dili' mangugnan sa eped? Dili' ma-imo' yan, kay Kulé'. Nyallat aku kamayu sa pagkamatay na eseg mayu manang to-o pa dakula' ya kanak pagkalat na ginawa lekat adti kan Yahwéh.” 14 Aw migsasugaway uman silan, aw pagkatigkas yan, pig-alekan ni Orpa ya ugangan nan aw nyuli' si Orpa adti kanan banwa na Mo-ab.
Manang si Ruth wala' kalim luwat sa ugangan nan. 15 Yanagaw miglong si Na-omi kan Ruth, “Na, ya luway mu nyuli' da adti kanan kadégan aw adti kanan manga tyumanem na pigpangintu-uwan nan. Ikaw uman, uli' da kaw sa kanmu.”
16 Manang law ni Ruth,
“Ya-i aku beg paglegesa na lumuwat aku kanmu
aw ya-i aku pagpa-uli-a.
Pangkay ayin kaw kadtu, magad aku kanmu.
Kun ayin kaw pag-eya', adtu aku uman pag-eya'.
Ya kanmu kadégan un ku imo-un uman kanak kadégan.
Aw ya kanmu Tyumanem un ku imo-un uman kanak Tyumanem.
17 Pangkay ayin kaw kamatay, adtu aku uman kamatay aw adtu aku uman lebengan.
Pakalaten aku galu to-o ni Yahwéh kun pabaya-an ta kaw talana na wala' pa kita kamatay.”
18 Pagkita' ni Na-omi na dili' makaluwat si Ruth kanan, wala' da nan legesa muli'. 19 Yanagaw migpadeleg silan nyanaw menda' dyumateng silan adti lunsud na Bitléhém.
Pagdateng nilan dun, to-o nyaleba ya kadég na manga utaw. Aw migbalawbalaw ya manga ka͡ubayan, law nilan, “Enda', si Na-omi ya ini?”
20 Manang miglong si Na-omi kanilan,
“Dili' da aku mayu pagtawagen ni Na-omi.
Aku la si Mara*,
kay pigpamulayaman aku na Tyumanem na To-o Matulus.
21 Pag-indeg ku asini banwa tadun,
madég ya pametang ku.
Manang pagpa-uli' kanak ni Yahwéh,
wala' da ya dyala ku, pangkay sambuk.
Yan ya du-an na dili' da aku mayu pagtawagen na Migleya,
kay to-o malat ya pagpakabetang ku
kay pigpabaya-an aku na Tyumanem na To-o Matulus.”
22 Yan ya pag-uli' ni Na-omi lekat adti banwa na Mo-ab, duwa silan ya makeye' nan na si Ruth na taga Mo-ab. Dyumateng silan adti Bitléhém sa pagpalekat na pag-ani sa sibada*.