Ruth 2

Ya Pagkakilala͡ay ni Ruth aw si Bo-as

¹ Na, kya-ede-an ni Na-omi na awun kadégan na eseg nan na si Élimelék. Ya sambuk kanilan si Bo-as na makabatug aw dengganen.

² Sambuk na allaw, si Ruth na taga Mo-ab miglong kan Na-omi, “Kay Ina', pakadtuwa aku beg adti manga pawa' pagaw kallatan aku nilan aw papamulut nilan kanak ya nyangkasama' na kya-ayawan na man-aniyay.”

Miglong si Na-omi, “Madyaw uman, kay Kulé'.”

³ Yanagaw nyindeg si Ruth aw nyadti pawa' aw syumukli' nyamulut sa nyangkataktak na manga man-aniyay. Aw ya pawa' na kyapamulutan nan, yan ya pawa' ni Bo-as na kadégan na ugangan nan na si Élimelék.

⁴ Wala' kadugay, nyaka-ibwang si Bo-as adti pawa' nan lekat adti Bitléhém aw miglong adti man-aniyay nan sa sibada, “Pakatanawan kamu galu ni Yahwéh.”

Aw tyumubag silan, “Pakadyawun kaw uman ni Yahwéh.”

⁵ Aw pig-usip ni Bo-as ya sugu-anen nan na migdumala kanilan, law nan, “Kay Léw, singalan ya kadégan na ka͡ubayan iyan?”

⁶ Aw tyumubag na sugu-anen, law nan, “Yan ya ka͡ubayan na taga Mo-ab na nyagad kan Na-omi sa pag-uli' nan asini banwa tadun. ⁷ Kakayna maselem miglong kanak ya ka͡ubayan iyan, law nan, ‘Malim aku galu beg mamulut sa sibada na pagka-ayawan na man-aniyay’. Yanagaw nyagad da nyamulut lekat pa na kakayna maselem aw baya' maglagdeng dun ni layag.”

⁸ Tigkas yan, pyamene-an ni Bo-as si Ruth, law nan, “Kay Dé', pakanyegi aku. Asini la kaw gayed pamulut adti tampid na manga sugu-anen ku na ka͡ubayan. Dili' da kaw magpamulut adti pawa' na eped. ⁹ Katanawi kun ayin pag-ani ya manga sugu-anen ku na eseg aw agad kaw sa manga sugu-anen ku na ka͡ubayan mamulut sa sibada. Piglongan da ku ya manga magtalabahuway ku na bata' da na dili' kaw nilan pagpatenengen. Kun talaynemen kaw, inem kaw sa tubig adti sibulan na pigsaluk na manga magtalabahuway ku na bata'.”

¹⁰ Aw nyaniklud si Ruth aw dyumukduk menda' dyumedet ya bayu' nan adti lupa' aw miglong kan Bo-as, “Ananga' to-o kaw madyaw kanak? Ananga' aku mu kallatan? Beke' aku na utaw asini, lekat aku beg sa kanak adti mawat na banwa.”

¹¹ Aw miglong si Bo-as, “Dyengeg ku ya kadyaw mu sa ugangan mu lekat pa na pagkamatay na eseg mu. Dyengeg ku uman na pig-ayawan mu ya kanmu mangkatikadeng aw ya kanmu banwa aw syumambuk kaw mig-eya' asini tampid na manga utaw na wala' mu kilala͡a. ¹² Kallatan kaw galu ni Yahwéh sa kadyaw na pig-imo' mu. Aw tandanan kaw galu ni Yahwéh na Tyumanem na Isra-él na pigpalaguyan mu aw migtameng kanmu.”

¹³ Miglong uman si Ruth, “Magpadeleg galu ya kadyaw mu kanak, kay Amu, kay pig-atagan aku mu na kagan na ginawa magi di kadyaw na tingeg mu pangkay dili' aku siling na sambuk na kanmu sugu-anen.”

¹⁴ Na, pagdateng na udas na pagkan, pigtawag ni Bo-as si Ruth, law nan, “Kan da kaw adi. Kamanga ya pan ini aw elema di suka'.”

Yanagaw nyingkud si Ruth adti tampid na man-aniyay aw pig-atagan ni Bo-as na sibada na pigsallag. Kyuman si Ruth aw to-o nyabiyag aw wala' nan kabus ya kakan nan. ¹⁵ Katigkas yan, lyumiku' si Ruth nyamulut sa sibada, aw pigpalna-uwan ni Bo-as ya manga magtalabahuway na salugbata', law nan, “Pabaya-i la mayu mamulut sa sibada na abus da mayu aniya, aw pangkay dili' nan dalugun ya kanaten katanem sa pag-ani, dili' mayu paglongun. ¹⁶ Aw ulugi mayu sakanan na sibada lekat adti pig-ani mayu na yan ya pulutun nan. Aw ya-i mayu pagsagda͡an!”

¹⁷ Na, asuntu na kadyaw nilan kanan, nyamulut si Ruth sa sibada sangallaw lekat na maselem menda' gabi aw piggiyek nan ya sibada adti bantal na giyekanan aw sangka be-en ya nyalamaw nan. ¹⁸ Dyala nan ya sibada aw nyuli' adti lunsud. Pigpakita' nan sa ugangan nan na si Na-omi ya sibada aw pig-atag nan uman kanan ya kakan na nyasama'.

¹⁹ Miglong si Na-omi kan Ruth, “Tay, kay Kulé', sa kadakula' na kyapamulutan mu! Kan yan pawa' ya kyadtuwan mu? Pakadyawun galu beg ni Yahwéh ya utaw na nyallat kanmu.”

Aw pig-ubatan ni Ruth ya ugangan nan sa pawa' na kyapamulutan nan, law nan, “Ya tagtun sa pawa' na pigpamulutan ku sa sibada ini, si Bo-as.”

²⁰ Aw miglong si Na-omi, “Pakadyawun galu ni Yahwéh ya utaw yan si Bo-as. Si Yahwéh dili' makalingaw sa manga pakang nan sa kadég na utaw, pangkay sa nyangkamatay da.” Aw miglong pa uman si Na-omi, law nan, “Si Bo-as, yan ya kadégan na eseg ku na malapit ya pagkélug nilan, yanagaw yan ya sambuk na utaw na makatagtun sa lupa' na eseg ku.”

²¹ Aw tyumubag si Ruth, law nan, “Pyamene-an aku nan na magad aku sa manga sugu-anen nan taman di matigkas ya pag-ani nan.”

²² Aw miglong si Na-omi adti makeye' nan, “Madyaw, kay Kulé', imo-a ya piglong nan. Agad kaw sa manga sugu-anen nan na ka͡ubayan. Kay kun adtu kaw i pawa' na eped na utaw pagaw pakalaten kaw nilan.”

²³ Yanagaw gayed si Ruth nyagad sa manga sugu-anen ni Bo-as na ka͡ubayan aw nyamulut taman di allaw na nyatigkas ya manga pag-ani sa sibada aw trigu. Aw nyeya' adti tampid na ugangan nan.