Ruth 3

Ya pagpaninaw ni Na-omi sa pagsayu na eseg ni Ruth

¹ Sambuk na allaw miglong si Na-omi adti makeye' nan si Ruth, “Kay Kulé', wan ya ginawa mu? Adun na allaw paninawan ta kaw sa eseg na makadala kanmu. ² Kya-ede-an da mu ya amu na manga ka͡ubayan na eped mu dun ni pawa', yan si Bo-as na kadégan na eseg ku na mig-ilapit ya pagkélug nilan. Adun na gabi magpagiyek sakanan sa sibada nan adti giyekanan. ³ Yanagaw, agad ya sugu' ku kanmu na katanem nami asini Juda. Dayaw kaw pagsugbu aw pagmanimbo' kaw. Sutun mu ya kadégkadég mu na to-o manenggeya, aw tubang kaw adti giyekanan sa sibada. Manang dili' pa kaw kanan magpakita'. Tagadan pa mu na makatigkas si Bo-as kuman aw abus da inem. ⁴ Pagkulang da nan, katanawi kun ayin apit kulang aw pag-maya-maya' kaw pagpalapit kanan aw beka-a ya abul dun ni siki nan, aw kulang kaw di tuwadan nan. Aw un si Bo-as maglong kanmu kun unu ya imo-un mu.”

⁵ Aw tyumubag si Ruth, law nan, “Agaden ku ya kadég na sugu' mu kanak.”

⁶ Yanagaw tyumubang si Ruth adti giyekanan sa sibada aw pig-agad nan ya kadég na pyamene' na ugangan nan kanan.

⁷ Na, pagkatigkas ni Bo-as kuman aw abus da inem, madyaw ya ginawa nan aw un da makatulug. Yanagaw kyumulang adti pitadtu na migtimundu' na sibada. Aw wala' kadugay migmaya-maya' si Ruth migpalapit aw pigbeka' nan ya abul adti siki ni Bo-as, aw kyumulang di tuwadan nan. ⁸ Pagkatenga-tenga' na gabi, kyumega' si Bo-as aw migmata, aw pagtanaw nan to-o nyabelengbeleng kun ananga' awun ka͡ubayan kyumulang dun.

⁹ Aw nyusip si Bo-as, “Singalan kaw, kay Dé'?”

Aw tyumubag ya ka͡ubayan, law nan, “Aku si Ruth na sugu-anen mu. Akupi aku beg na abul mu kay yan ya pangilala na ikaw ya utaw na makakamang kanak aw makatagtun sa lupa' na ugangan ku na eseg kay ikaw ya sambuk na kadégan nan na mig-ilapit ya pagkélug mayu.”

¹⁰ Aw miglong si Bo-as, “Pakadyawun kaw galu ni Yahwéh, kay Kulé'. Madyaw ya bet mu sa ugangan mu na ka͡ubayan aw matas pa uman ya kadyaw na bet mu adti kadégan mu adun kay wala' kaw paninaw sa eped na eseg pangkay makabatug na utaw aw tagitu' na utaw. ¹¹ Dili' kaw magkallek, kay Kulé'. Un ku imo-un ya pigsekat mu kay ya kadég na utaw asini lunsud nya-ede' na madyaw ya pagdala mu sa pagkaka͡ubayan mu. ¹² Aw matinaw uman ya piglong mu na aku ya sambuk na kadégan nan na malapit. Manang awun pa sambuk na kadégan nami na muna magbaya', kay to-o pa mig-ilapit ya pagkélug nilan ya ugangan mu na eseg. ¹³ Kulang da kaw asini adun na gabi. Kunallaw un ku balawbalawun ya utaw yan aw ka-ede-an da tadun kun malim sakanan kumamang kanmu aw tagtunun uman ya lupa' na ugangan mu na eseg, manang kun dili' malim, migsapa' aku adti asdangan ni Yahwéh na aku ya kumamang kanmu. Na, kulang da kaw asini taman na maselem.” Yan ya piglong ni Bo-as.

¹⁴ Yanagaw kyumulang si Ruth adti tuwadan ni Bo-as. Aw migbangun na to-o pa maselem na dili' pa pagkilala͡en ya utaw. Aw miglong si Bo-as adti anenganeng nan, “Asuntu na madyaw ya pagdala nan sa kanan pagkaka͡ubayan, na, dili' galu ka-ede-an na kyumulang asini giyekanan.”

¹⁵ Pagkatigkas ni Ruth magbangun, miglong si Bo-as, “Dimilan kanak ya tatulung mu aw beka-a.” Pigbetangan ni Bo-as ya tatulung ni Ruth na duwangka be-en ya sibada, aw migsuway silan. Tyumukud si Bo-as adti lunsud. ¹⁶ Aw lyumiku' si Ruth adti tampid na ugangan nan si Na-omi. Aw miglong si Na-omi kanan, “Na, manu ya pyamene' ku kanmu, kay Kulé'?”

Aw pig-ubatan ni Ruth si Na-omi sa kadég na pig-imo' ni Bo-as kanan.

¹⁷ Aw miglong pa uman si Ruth, law nan, “Pig-atagan aku nan uman na kadakula' na sibada ini kay dili' nan kaliman na muli' aku adi tampid mu na wala' ya dala͡en ku.”

¹⁸ Law ni Na-omi kan Ruth, “Pagtagad pa kaw adun na allaw, kay Kulé', kay kya-ede-an ku na dili' matingen ya ginawa ni Bo-as kun dili' nan matigkas ya balaw adun na allaw yeiy.”