Ruth 4

Ya Pagbalaw ni Bo-as sa lupa' ni Élimelék

¹ Pagdateng ni Bo-as adti lunsud, nyingkud adti suwangan na inalad na pagkatipunan na mangkatikadeng na lunsud. Aw wala' kadugay, lyumabay ya sambuk na kadégan na pig-ubat da ni Bo-as kan Ruth, na yan ya muna magbaya' sa pagtagtun sa lupa' ni Élimelék.

Migtawag si Bo-as, law nan, “Kay Léw, apit pa kaw. Magbalawbalaw kita.”

Aw nyapit ya utaw yan aw nyingkud di tampid ni Bo-as. ² Aw pigtawag uman ni Bo-as ya sampulu' ya manga mangkatikadeng di lunsud na tumambung sa balaw nilan. Aw nyingkud ya manga mangkatikadeng dun ni tampid nilan.

³ Miglong si Bo-as sa utaw yan na kadégan nilan, law nan, “Si Na-omi nyuli' da lekat adti banwa na Mo-ab aw ya kaliman nan alinen ya katagtunan sa lupa' na kadégan ta na si Élimelék. ⁴ Yanagaw, madyaw ubatan ta kaw kay ikaw ya kadégan nan na muna magbaya' sa pagtagtun sa lupa'. Kun malim kaw, tagtuna la ya lupa' ni Élimelék asini asdangan na mangkatikadeng aw kadég na manga utaw. Manang kun dili' kaw malim tumagtun sa lupa' yan, paglonga aku, kay aku ya kadwa na kadégan na malapit kanan.”

Miglong ya utaw yan, “Aku ya tumagtun.”

⁵ Miglong si Bo-as, “Na, kun ikaw ya tumagtun sa lupa' ni Élimelék lekat kan Na-omi, kamangen da mu uman ya ka͡ubayan na balu na taga Mo-ab. Kay maynan ya pag-agi na dili' ma-alin lekat adti ngalan na kamangayse-anan nan ya lupa'.”

⁶ Aw tyumubag ya utaw yan, law nan, “Kun maynan, dili' ku mabatug tagtunun. Kun imo-un ku yan pagaw baling magkalat ya kanak pag-eya'. Yanagaw atag da ku kanmu adun ya pagbaya' sa lupa' yan.”

⁷ Na, idtu na allaw yan awun katanem na manga utaw adti Isra-él na kun alinen na sambuk na utaw ya pagbaya' nan adti eped, luwasen nan ya sandal nan aw atag nan adti utaw na pig-alinan nan sa pagbaya' na yan ya palangad buku na pagpakang nilan.

⁸ Yanagaw miglong ya utaw yan kan Bo-as, “Ikaw da ya tumagtun sa lupa'.” Pigluwas nan ya sandal nan aw dyimil nan kan Bo-as.

⁹ Pagkatigkas yan, miglong si Bo-as adti manga mangkatikadeng aw adti manga utaw na migkatipun, law nan, “Kadég mayu alag nyaka-ede' na adun na allaw nyatagtun da ku adti kan Na-omi ya kadég na ka-unan ni Élimelék aw ka-unan uman na duwa ya ise' nan na eseg si Kilyon aw si Malon. ¹⁰ Aw un ku uman kamangen si Ruth na taga Mo-ab na balu ni Malon, aw imo-un ku kanak ka͡ubayan pada magbuwadbuwad kami aw dili' ma-alin lekat adti buwadbuwad ni Élimelék ya ayawanan nilan aw dili' kalingawan na kadégan nilan ya ngalan nan dun ni kanan banwa. Aw kamu ya nyakabantay adun na allaw ini.”

¹¹ Aw miglong ya mangkatikadeng aw ya manga utaw dun ni suwangan na lunsud, law nilan, “Kami ya kastigus sa pig-imo' mayu adun. Pakadyawun galu ni Yahwéh ya ka͡ubayan na un dumateng adti balay mu aw silingen nan galu ni Rakél aw si Liya na pig-indegan na kadég na utaw adti Isra-él. To-o pa kaw galu magkabatug asini banwa na Iprata aw ma-imo' dengganen asini Bitléhém. ¹² Atagan kaw galu ni Yahwéh na madég na buwadbuwad adti ka͡ubayan yan, magkasiling galu na buwadbuwad na matikadeng tadun si Parés na ise' ni Juda adti kan Tamar.”

¹³ Yanagaw pigkamang ni Bo-as si Ruth aw pig-imo' nan ka͡ubayan nan. Pig-ipidan da nan aw pigpakadyaw silan ni Yahwéh aw nyabdes si Ruth aw mig-ise' sa eseg.

¹⁴ Aw miglong kan Na-omi ya manga ka͡ubayan dun ni lunsud, law nilan, “Deyen si Yahwéh na wala' kaw nan pabaya-i. Mig-atag kanmu adun na allaw ini sa utaw na un magtameng kanmu aw magdiyaga kanmu. Ma-imo' yan galu dengganen asini banwa na Isra-él. ¹⁵ Ya ise' ini matag kanmu galu sa bagu na anenganeng aw magdiyaga kanmu kun buyag da kaw. Kay yan ya mig-ise' kanan ya makeye' mu na to-o gyuminawa kanmu. Aw pangkay pagaw pitu ya ise' mu na eseg, manang matas pa ya kadyaw ni Ruth kanmu.”

¹⁶ Aw pigsipit ni Na-omi ya ise' aw pigdiyaga͡an nan siling na tengteng na umpu nan.

¹⁷ Aw miglong ya manga ka͡ubayan na sumbalay ni Na-omi, law nilan, “Awun da beg ise' ni Na-omi na eseg.” Aw pigngalanan nilan ya ise' na si Obid. Aw si Obid yan ya ama ni Jéssi, aw si Jéssi yan ya ama ni Dabid na un ma-imo' hari' na Isra-él.

¹⁸ Aw yeiy ya tultulanen sa buwadbuwad ni Parés. Si Parés, yan ya ama ni Hisron. ¹⁹ Aw si Hisron, yan ya ama ni Ram. Aw si Ram, yan ya ama ni Amminadab. ²⁰ Aw si Amminadab, yan ya ama ni Na-asyon. Aw si Na-asyon, yan ya ama ni Salmon. ²¹ Aw si Salmon, yan ya ama ni Bo-as. Aw si Bo-as, yan ya ama ni Obid. ²² Aw si Obid, yan ya ama ni Jéssi. Aw si Jéssi yan ya ama ni Dabid.

Yeiy ya katigkasan na kasampetanen ini.