11
Ya pagdandan ni Pédro sa pagpangintu-u na manga Héntil
1 Na, ya manga apostolés aw manga mangintu-uway adti probinsiya na Judiya, dyengeg nilan na awun uman manga Héntil na nyangintu-u la sa tingeg na Tyumanem. * 2 Yanagaw pagliku' ni Pédro adti Jérusalim, pigsagda sakanan na eped na manga Judiyu na nyangintu-u, 3 law nilan, “Ananga' kaw madtu ni manga utaw na Héntil? Aw ananga' kaw kanilan magpasambuk kuman?”
4 Manang pigpalekat ni Pédro pigdandan adti kanilan ya kadég na nya-imo', long nan,
5 “Sagwa adtu pa aku ni lunsud na Joppé, talana ku nyanawagtawag adti Tyumanem, awun pigpakita' kanak na liwan na dakula' na abul na nya-ulad na pig-eketan ya upat ya tuktuk nan aw nyatonton lekat adti langit taman adti asdangan ku. 6 Pag-inunu ku sa unu ya awun ni seled na abul, kyinita' ku ya madég na punganan na mannanap aw ayep, dala ya manga magpanaw aw ya manga magpananap aw ya manga mannanap na maglupad, taman na malipa' adti uldin na manga Judiyu na dili' kanen. 7 Aw awun tingeg na dyengeg ku na miglong, ‘Kay Pédro, indeg kaw aw iyawa ya sambuk aw kana!’ 8 Aw tyumubag aku, ‘Dili' aku beg san magkan! Taman adun wala' pa ya syumeled adti baka' ku na malipa' na pigpigil na Uldin nami na manga Judiyu.’ 9 Manang tyumubag ya tingeg na lekat adti tas na langit, ‘Kun unu ya piglong da na Tyumanem na malinis, dili' da mu pagngalanan na malipa'.’ 10 Aw makatlu yeiy ka-imo', aw tigkas yan, nya-engat da ya dakula' na abul adti langit.
11 “Aw talana ku pig-inunu yeiy, awun nyaka-ibwang na tulu ya eseg adti balay na pigbantukan ku. Pigsugu' kunu silan lekat adti Césariya na un mangay kanak. 12 Aw miglong kanak ya Ispiritu na Tyumanem, ‘Dili' kaw magduwaduwa magad kanilan aw dili' mu silan pagkele͡an asuntu na beke' silan na Judiyu.’ Yanagaw nyagad aku kanilan, aw nyagad uman kanak ya enem ya eseg yeiy na inulug tadun na nyangintu-u. Aw lyumos kami adti balay na utaw na migsugu' kanilan. Aw pigpaseled kami nan 13 aw pigdandan nan ya kadég na nya-imo' kanan, na awun migpakita' kanan na anghil na nyindeg adti seled na balay nan, aw law na anghil kanan, ‘Pa-angay mu adti Joppé ya sambuk na utaw na si Simon na pigngalanan uman na Pédro. 14 Kay un nan paglongun kanmu kun unun mayu ya pagtagtun sa ginawa na wala' ya tyamanan, dala ya ka-epedanan mu.’ Yan kunu ya piglong na anghil kan Cornéliyo.
15 “Yanagaw, pigpalekat ku ya pag-ubat-ubat kanilan. Aw talana pa aku mig-ubat-ubat, dyumateng ya Ispiritu na Tyumanem adti kanilan, siling naten idtu muna. 16 Aw dun da ku ka-anenganengi ya piglong ni Jisus idtu muna, law nan, ‘Si Juan migba͡utismu kamayu sa tubig, manang dili' madugay ba͡utismuwan kamu sa Ispiritu na Tyumanem.’ 17 Yanagaw, ya manga utaw na Héntil, siling da silan kanaten, kay dun ni pagpangintu-u la nilan kan Jisus Kristu na pangulu tadun, pig-atag uman na Tyumanem kanilan ya Ispiritu nan. Aw kun maynan ya pig-imo' na Tyumanem, singalan aku na makatagen sa palpa nan?”
18 Pagdengeg da na manga mangintu-uway dun ni Jérusalim sa pigdandan ni Pédro, wala' da silan pagdiklamu kanan. To-o nilan baling pigdeyen ya Tyumanem, aw long nilan, “Yan kadi'! Pangkay manga utaw na Héntil, pig-atag da kanilan uman na Tyumanem ya pagtagtun sa ginawa na wala' ya tyamanan, taman na magselsel sa sala' nilan.”
Ya manga bagu na nyangintu-u adti syudad na Antiyokiya
19 Na, lekat adti allaw na pagpatay kan Éstéban, migtagisun nyamalaguy ya manga mangintu-uway lekat adti Judiya asuntu sa pagpamulayam kanilan, aw awun kanilan na dyumateng adti banwa na Ponisiya, aw ya eped adti pulu' na Cipré, aw ya eped adti syudad na Antiyokiya. Aw pigpa-ede' nilan ya madyaw na ubat-ubat kan Jisus adti manga Judiyu olo'. 20 Manang adti Antiyokiya, awun dyumateng na manga mangintu-uway na taga pulu' na Cipré aw taga banwa na Ciréné, aw pigpa-ede' nilan uman adti manga Héntil ya pangulu na si Jisus. 21 Aw awun ni kanilan ya katulus na Tyumanem, aw yanagaw madég to-o ya manga Héntil na nyagagad aw nyangintu-u la kan Jisus.
22 Na, ya manga mangintu-uway adti Jérusalim, pagdengeg nilan sa manga Héntil na bagu nyangintu-u adti Antiyokiya, pigsugu' nilan si Bérnabi adti kanilan. 23 Pagdateng nan dun ni sayid nilan, kyinita' nan na kyallatan da na Tyumanem ya manga Héntil aw to-o sakanan migleya. Aw pigdasig nan ya kadég nilan na un silan magpadeleg adti pagpangintu-u nilan kan Jisus pangkay unu ya un dumateng kanilan. 24 Kay madyaw ya bet ni Bérnabi aw nyatmu' sakanan na Ispiritu na Tyumanem aw masalig da ya pagpangintu-u nan kan Jisus. Aw asuntu sa palna-u nan, to-o kyadugangan ya kadég na manga utaw na nyangintu-u uman kan Jisus.
25 Yanagaw nyadtu si Bérnabi adti syudad na Tarso aw pyaninaw nan si Saulo. 26 Pagkita' da nan kan Saulo, pigpa-agad nan adti Antiyokiya. Aw seled na sangka͡umay migsambuk silan sa manga mangintu-uway dun, aw pigtulada-an ni Saulo aw si Bérnabi ya to-o madég na utaw na bagu nyangintu-u kan Jisus. Aw dun ni Antiyokiya, yan ya tagna' na pigngalanan na Kristuhanen ya manga utaw na nyangintu-u kan Kristu.
27 Na, dun ni manga allaw yan, awun manga utaw na lekat adti Jérusalim na dyumateng adti Antiyokiya, aw matadeng silan magpa-ede' kun unu ya un dumateng. 28 Ya sambuk kanilan pigngalanan na si Agabo. Aw pagkatipun da na manga mangintu-uway, nyindeg si Agabo adti asdangan nilan aw migpa-ede' kanilan magi sa katulus na Ispiritu na Tyumanem na un dumateng ya bayil adti kadakula' na banwa. Na, nyatuman ya piglong nan adti manga umay na migdumala si Cla͡udiyo na impirador sa kasakupan na Roma. 29 Yanagaw, pigbetang na manga mangintu-uway adti anenganeng nilan ya pagtabang sa manga inulug na nyangintu-u na nyeya' adti Judiya, taman na mabatug na tag sambuksambuk kanilan atag. 30 Aw mig-amut-amut silan, aw pigpadala nilan kan Bérnabi aw si Saulo ya kadakula' na pig-amut nilan na un atag adti manga magdumala sa manga mangintu-uway adti Jérusalim.