12
Ya pagpadakep ni Hérodés kan Santiago aw kan Pédro
1 Na, dun ni manga allaw yan, ya hari' na si Hérodés Agrippa migpalekat sa pagpamulayam nan sa manga mangintu-uway kan Jisus. 2 Migsugu' sakanan na pa-utudan sa ulu si Santiago na inulug ni Juan. 3 Aw pagka-ede' da ni Hérodés na kyatutukan ya manga Judiyu asuntu sa pagpapatay nan kan Santiago, pigpadakep nan uman si Pédro dengan na Pista na Pan na Wala' Patulina. 4 Pagpadakep da nan kan Pédro, pigpakalabusu nan aw pigpatunggu' nan sa sampulu' tag enem ya sundalu na tag upat-upat. Kay yan ya palpa ni Hérodés na pagkatigkas da na pista, ukuman da nan si Pédro adti asdangan na madég na manga Judiyu pada mulamula͡en sakanan, aw tigkas yan, papatay nan.
5 Manang talana ni Pédro adti seled na kalabusuwanan, madég ya manga mangintu-uway na nyatibulluk ya anenganeng nilan nyanawagtawag kanan adti Tyumanem.
6 Yan na gabi na tyumagad silan sa allaw na pag-ukum kan Pédro, nyakatulug sakanan dun ni elet na duwa ya sundalu, aw dayaw pigpusasan na duwa ya sangkali'. Aw gayed uman pigtunggu-an na manga sundalu ya tatakep na kalabusuwanan.
7 Aw tigkan awun migpakita' kan Pédro na anghil na Tyumanem aw migkalalamdag to-o ya seled na tambi' na pigkulangan nan. Aw pigkablit na anghil ya kilid ni Pédro aw pigpukaw nan, long nan, “Na! Pagbangun da kaw!”
Aw nyangkataktak da ya manga sangkali' na piggapus kanan. 8 Aw miglong ya anghil kanan, “Pangelen kaw aw pagsandal kaw.” Aw dyalug ni Pédro ya pamene' kanan. Aw miglong uman ya anghil, “Pagkulimut kaw sa kayab mu aw dalug kaw kanak!” 9 Aw dyumalug si Pédro sa anghil syuminan ni luwa' na kalabusuwanan, manang wala' nan ka-ede-i na matinaw kadi' ya nya-imo' kanan. Iman nan aw tagaynep olo'. 10 Lyabayan nilan ya tagna' na sundalu na migtunggu' adti tatakep na kalabusuwanan aw tigkas yan uman nilan lyabayan ya kadwa, aw dyumateng silan adti dakula' na tatakep na alag putaw. Aw dayaw kya-uwangan ya tatakep na wala' ya mig-uwang, aw nyakaluwa' da silan pasinan adti syudad. Pagpakalabay da nilan sa kadwa na dalan, nyalanas da ya anghil lekat adti tampid nan.
11 Pagkalanas da na anghil, dun da ni Pédro ka-ede-i na beke' kadi' na tagaynep ya nya-imo' kanan. Miglong ya anenganeng nan, “Matinaw saba ya nya-imo' kanak. Wettay! Pigsugu' na Tyumanem ya kanan anghil na un magpaluwa' kanak lekat adti un pagamak kanak ni Hérodés aw manga utaw na Judiyu.”
12 Pagka-ede' da nan seiy, syuminan sakanan adti balay ni Maria na ina ni Juan Markos. Yan ya balay na pigkatipunan na madég na manga mangintu-uway pada manawagtawag adti Tyumanem. 13 Pagtuktuk nan sa tatakep na inalad na balay, nyadtu ya sambuk na sugu-anen na si Roda, aw nyusip kanan, “Singalan ya awun yangadi?”
14 Aw tyumubag si Pédro, “Aku ya ini!” Kyilala ni Roda ya tingeg nan, manang pigtagali baling aw wala' nan ka-uwangi ya tatakep, kay to-o sakanan migleya. Aw nyaksay dyumalagan adti manga mangintu-uway na un mag-ubat na awun si Pédro adti luwa' na tatakep.
15 Miglong silan kanan, “Pagduwa͡an aw wala' kaw pagkameneng, kay Dé'!” Manang gyumelgel si Roda miglong kanilan na matinaw saba ya pig-ubat nan. Aw miglong silan, “Yan gya ya anghil na migtameng kanan.”
16 Manang migpadeleg si Pédro migtuktuk sa tatakep. Aw pag-uwang da nilan, awun saba kadi' si Pédro dun ni luwa'. Aw to-o silan nya-eneng-eneng.
17 Manang migpulingen si Pédro pada matinep silan. Tigkas yan, pigdandan nan kanilan ya pagpaluwa' kanan na Tyumanem lekat adti kalabusuwanan aw law nan kanilan, “Paglongan mayu yeiy adti kan Santiago * aw eped na manga inulug tadun.” Pagkatigkas yan, nyindeg si Pédro syuminan adti sambuk na banwa.
18 Pagkamaselem da, migpangkawayit ya manga sundalu na migtunggu' adti kalabusuwanan, kay wala' nilan ka-ede-i kun ayin da si Pédro pasinan. 19 Aw migsugu' si Hérodés na paninawun si Pédro, manang wala' nilan kita-a. Yanagaw pigpanbastigal nan ya manga sundalu na migtunggu', aw pigsugu' nan na alag silan patayen.
Ya kyagamakan ni Hérodés Agrippa
Pagkatigkas yan, nyindeg si Hérodés lekat adti Judiya, aw nyanaw pasinan adti syudad na Césariya aw dun pag-eya'. 20 Na, to-o nan kyadamanan ya manga utaw na nyeya' adti manga lunsud na Tiro aw Sidon. Yanagaw migsambuk ya anenganeng nilan kun unu ya pa-agi na magkadyaw ya ginawa ni Hérodés kanilan. Kay ya banwa na pigtakmagan nan, yan uman ya lyekatan na kanilan pagkanen. Yanagaw, pigsugu' nilan ya kanilan manga talaglawung na un magkagun kanilan. Aw pig-una nilan pig-ubaybay si Blasto na yan ya tengteng pagsaligan ni Herodés adti seled na palasiyo. Kay si Blasto galu ya un magpa-ede' kan Hérodés sa tud nilan.
21 Na, pagdateng da na allaw na un magpakita' si Hérodés adti manga utaw, syumut sakanan sa to-o manenggeya na kadégkadég na pagkahari' nan, aw nyingkud adti trono aw miglong adti kadég na manga utaw na migkatipun dun ni asdangan nan. 22 Aw mig-iyak-iyak silan, long nilan, “Ku…! Sa kadyaw na utaw iyan! Beke' na kana utaw ya piglong nan, manang sambuk sakanan saba na tyumanem!” 23 Aw asuntu na wala' si Hérodés pagsagda kanilan aw wala' nan padeyenan ya tengteng Tyumanem, pigbigla' sakanan na anghil na Tyumanem pigkelegan aw pig-ulud ya lawas nan aw wala' kadugay nyatay.
24 Yanagaw, to-o la nyabekkal ya madyaw na ubat-ubat kan Jisus aw migkadég ya manga utaw na nyangintu-u kanan.
Ya Pagbekkal na Manga taga Antiyokiya sa Madyaw na Ubat-ubat adti Manga Héntil
Ya pagpamalli' aw pagsugu' kan Bérnabi aw si Saulo
25 Na, si Bérnabi aw si Saulo, lyumiku' silan adti Antiyokiya kay nyabatug da ya kanilan tud adti Jérusalim. Aw pigpa-agad nilan si Juan na pigngalanan uman na Markos.