13
1 Na, adti manga mangintu-uway na nyanimba dun ni Antiyokiya, awun manga utaw na pig-atagan na Tyumanem na katadeng mag-ubat-ubat sa tingeg nan: yeiy si Bérnabi, aw si Simyon na pigsagnay na Négro, aw si Lucio na taga Ciréné. Aw awun eped na manga utaw na pig-atagan na Tyumanem na katadeng mag-ubad sa kakawasan na tingeg nan: yeiy si Mana-in, aw si Saulo. Si Mana-in, migpan-itulin silan si Hérodés Antipas.
2 Sagwa ya kadég nilan nyanimba sa Tyumanem aw migpuwasa, piglongan silan na Ispiritu na Tyumanem, “Taniya mayu kanak si Bérnabi aw si Saulo kay awun tud ku kanilan aw atagan ku silan sa un nilan imo-un.”
3 Pagkatigkas nilan magpuwasa aw manawagtawag, pigbetang nilan ya kanilan manga palad adti tas na ulu ni Bérnabi aw si Saulo aw nyanawagtawag silan salut adti Tyumanem na pakadyawun nan ya duwa yeiy. Aw tigkas yan, pyapanaw da nilan.
Si Bérnabi aw si Pablo adti pulu' na Cipré
4-5 Na, asuntu na pigsugu' na Ispiritu na Tyumanem si Bérnabi aw si Saulo, nyanaw silan pasinan adti pantalan na Séléyuciya. Lekat dun, syumakay silan sa barko pasinan ni pulu' na Cipré. Aw nyagad kanilan si Juan na pigngalanan uman na Markos na un tumabang kanilan. Pagdateng da nilan adti pantalan na Salamina dun ni pulu' na Cipré, nyadtu silan ni manga sinagoga na un pa-ede' adti manga Judiyu ya madyaw na ubat-ubat kan Jisus.
6-8 Tigkas yan, lyegeb nilan ya pulu'. Pagdateng nilan adti lunsud na Papos, si Bérnabi aw si Saulo pigpatawag na gubirnador dun ni Cipré. Na, ya ngalan nan si Sérgiyo Pa͡ulo, aw sambuk sakanan na utaw na to-o brayit. Aw pagdengeg nan na nyakalagbas da silan adti banwa nan, kaliman nan magpakanyeg sa tingeg na Tyumanem. Manang dun ni tampid nan awun sambuk na pigsaligan nan na magpakabatug mag-imo' sa manga dadela͡en magi sa anitu nan. Ya ngalan nan si Bar Jisus, aw ya tengteng ngalan nan adti tingeg na manga Grigo: si Élimas.* Utaw sakanan na Judiyu, aw migtallalingu sakanan mag-ubat-ubatay na Tyumanem. Aw talana ni Bérnabi aw si Saulo mig-ubat-ubat adti asdangan ni Sérgiyo, gayed ni Élimas pig-ampangan ya palna-u nilan pada dili' galu mangintu-u si Sérgiyo. 9 Manang si Saulo na pigngalanan uman na Pablo na nyatmu' na katulus na Ispiritu na Tyumanem, pigtengtengan nan si Élimas, 10 aw long nan, “Ikaw, ise' na busaw! Po-on kaw na kadég na madyaw! Gayed mu piggawayan ya manga eped mu aw pig-akalan mu silan. Wala' ya katantanan na pag-imo' mu sa malatay kay gayed mu pagsayuwan na galu' ya tingeg na Tyumanem! 11 Na! Un da kaw pa-emel-emelen na Tyumanem. Lekat adun, dili' kaw kumita' seled na pilangallaw, aw pangkay kalalamdag na sega dili' mu kita-en.” Aw dun da dakepa na mangitngit ya mata nan aw wala' da sakanan kita'. Aw nyandamdam da sakanan aw gayed nyaninaw sa utaw na un mag-agak kanan. 12 Pagkita' na gubirnador sa nya-imo' dun, to-o sakanan nya-eneng-eneng sa katulus na Tyumanem aw nyangintu-u la kan Jisus na pigpalna-u ni Pablo aw si Bérnabi.
Si Pablo aw si Bérnabi adti Pisidiya
13 Na, pagkatigkas da na tud ni Pablo aw manga eped nan adti pulu' na Cipré, syumakay silan sa barko lekat adti Papos pasinan ni probinsiya na Pampiliya. Pagdateng nilan adti lunsud na Pérga, pig-ayawan silan ni Juan Markos aw nyuli' da sakanan adti Jérusalim. 14 Manang migpadeleg pa si Pablo aw si Bérnabi nyanaw lekat adti Pérga aw dyateng nilan ya lunsud na Antiyokiya na awun ni banwa na Pisidiya.
Pagdateng da na Allaw na Paglagdeng, * syumeled silan adti sinagoga aw nyingkud dun ni sayid na manga utaw. 15 Aw pigbasa dun ni asdangan nilan ya Uldin na pig-atag na Tyumanem kan Moysis. Aw byasa uman ya pigsulat na manga propita na manga Judiyu. Tigkas yan, ya manga magdadumala͡ay sa sinagoga migsugu' sa utaw adti tampid ni Pablo aw si Bérnabi, long nilan, “Kay manga inulug, kun awun palna-u mayu kanami na lekat adti Tyumanem, ubatan da mayu kanami.”
16 Yanagaw nyindeg si Pablo dun ni asdangan nilan aw migpulingen pada matinep ya manga utaw. Aw migpalekat mag-ubat-ubat kanilan, long nan, “Kamu na manga buwadbuwad ni Isra-él aw kamu uman na beke' na Judiyu na nyanimba sa Tyumanem, pakanyegi mayu ya un ku paglongun. 17 Ya Tyumanem na pigsimba na buwadbuwad ni Isra-él, dadan da nan pigpamalli' ya manga tyugbulan tadun asini pa muna pada ma-imo' kanan manga utaw. Seled na pag-eya' nilan adti banwa na Ihiptu, migkadég silan aw pigtabangan nan silan. Tigkas yan, pigpakita' nan kanilan ya kanan katulus dun ni pag-allad nan kanilan lekat adti banwa yan. 18 Aw seled na kapatan ya umay talana silan miglegeblegeb adti kaligbinan, tyagenan na Tyumanem ya kadaman nan sa manga sala' nilan. 19 Aw paglagbas da nilan adti banwa na Kana-an, pigkalat nan ya pitu ya nasud dun ni seled na Kana-an dala ya manga utaw na nyan-eya' dun, pada tagtunun na kanan manga utaw ya banwa yan na dadan da nan pigpakang adti manga tyugbulan tadun. 20 Na, lekat adti pagdateng nilan adti Ihiptu taman na nyatagtun nilan ya banwa na Kana-an, upatenggatus aw kalima͡an ya umay.
“Aw pagkatigkas yan, nyamalli' ya Tyumanem sa manga mag-usayay kanilan na gayed migsayusayu migdumala, taman na manga allaw ni Samwél na propita. 21 Aw tigkas yan, migsekat silan adti Tyumanem na atagan silan na hari'. Yanagaw pigpamalli' nan kanilan si Sa-ul na ise' ni Kis na eseg lekat adti buwadbuwad ni Bénjamin, aw yan ya migdumala sa manga utaw na Isra-él seled na kapatan ya umay. 22 Manang pig-alilinan sakanan na Tyumanem aw yan ya pigsayu nan si Dabid na un magdumala kanilan. Aw pigsaya' sakanan na Tyumanem, long nan, ‘Si Dabid na ise' ni Jéssi na eseg, yan ya utaw na to-o nyakatutuk kanak, aw un nan tumanen ya kadég na pagkaliman ku.’
23 “Aw lekat adti kanan buwadbuwad pig-atagan na Tyumanem ya manga utaw na Isra-él na Magpaluwa-ay, kasiling na dadan da nan pigpakang asini muna. Aw si Jisus saba ya Magpaluwa-ay. 24 Manang sa wala' pa dateng si Jisus, si Juan pa ya nyuna mig-ubat-ubat adti kadég na buwadbuwad ni Isra-él na ayawan nilan ya kanilan manga sala' aw magselsel aw magpaba͡utismu silan. 25 Aw sa agpet da ni Juan matigkas ya imo-unun nan, miglong sakanan adti madég na utaw, law nan, ‘Iman mayu aw aku ya magpaluwa-ay na pigpadala na Tyumanem, manang beke' ku saba! Un dumateng ya sambuk na matas pa kanak aw dili' aku kanan makatumbuk, pangkay sa pag-ubad sa eket na sandal nan.’
26 “Na, kay manga kadégan ku na buwadbuwad ni Abraham aw kamu uman na beke' na Judiyu na nyanimba sa Tyumanem, pigpa-ede' da kanaten na Tyumanem na awun da pa-agi na un kitadun paluwa-en lekat adti pagpa-emel-emel nan. 27 Manang ya manga Judiyu na nyeya' adti Jérusalim aw ya manga migdumala kanilan, wala' nilan kilala͡a na si Jisus yan ya pigpadala na Tyumanem. Aw wala' nilan kalabeti na si Jisus ya pigsulat na manga propita asini muna, pangkay gayed nilan pigbasa ya pigsulat na manga propita kada simana dun ni Allaw na Paglagdeng. Aw pangkay wala' nilan ka-ede-i manang nyatuman da nilan ya kadég na pigsulat kanan asini muna na manga propita, kay silan ya mig-ukum aw migpapatay kan Jisus. 28 Aw pangkay kya-ede-an nilan na wala' ya sala' na nya-imo' nan na umba' sakanan patayen, manang pigsekat nilan baling adti kan Pilato na patayen sakanan. 29 Aw sa nyatuman da nilan ya kadég na pigsulat dadan na manga propita, awun da uman manga utaw na migkamang sa lawas nan lekat adti krus aw pigbetang nilan adti ilib na palangad lebenganan. 30 Manang pigmataw sakanan na Tyumanem lekat adti pagkamatay, 31 aw seled na madég na allaw, migpakita' sakanan adti manga umagakan nan na nyagad kanan idtu muna lekat adti Galiliya taman adti Jérusalim. Aw silan da ya migmatinaw adti kanaten na manga utaw na Isra-él sa kadég na nya-imo' idtu muna.
32 “Aw yan ya tud nami adun na pa-ede' nami kamayu ya madyaw na ubat-ubat sa pakang na Tyumanem adti manga tyugbulan tadun 33 na pigtuman da nan kanaten na buwadbuwad nilan, kay pigmataw nan si Jisus adun na manga allaw tadun. Aw yanagaw nyatuman uman ya pigsulat asini muna dun ni kadwa na Salmo, long na Tyumanem,
‘Ikaw ya ise' ku na eseg.
Adun na allaw yeiy un ku pa-ede' na aku ya ama mu.’*
34 “Aw yan uman ya pigpasulat asini muna na Tyumanem, na un nan matawun si Jisus lekat adti pagkamatay aw dili' da salut matay, long nan,
‘Un ku atag adti kamayu ya kanak kadyawan
na dadan da ku pigpakang adti kan Dabid.’*
35 “Yanagaw si Jisus, yan ya migtuman sa pigpakang na Tyumanem kay pigsulat sakanan ni Dabid, law nan,
‘Ya Sugu-anen mu na un mu padala,
dili' mu tumbay na malandak ya lawas nan adti lebeng.’
36 “Na, si Dabid, pagkatigkas da nan imo-un ya kaliman na Tyumanem kanan, nyatay da sakanan aw piglebeng adti tampid na mangkatikadeng nan, aw nyalandak ya lawas nan. 37 Manang si Jisus, wala' kalandak ya kanan lawas, kay pigmataw na Tyumanem lekat adti pagkamatay.
38 “Yanagaw, kay manga kadégan ku, pada ka-ede-an da mayu adun na allaw yeiy kun unu ya tengteng matinaw, paglongun ta kamu na magi sa pigpan-imo' ni Jisus mabatug lanasen ya manga sala' tadun, 39 aw magi kan Jisus, ya taman na utaw na syumalig kanan un dawaten na Tyumanem. Manang wala' saba ya un nan dawaten asuntu na talamanen nilan tumanen ya Uldin na pig-atag nan kan Moysis. Yanagaw paluwa-en kamu lekat adti pagpa-emel-emel na Tyumanem asuntu olo' sa pagpangintu-u mayu kan Jisus. 40 Yanagaw, magpakatadeng kamu, pagaw dumateng kamayu ya manga un kagamakan na pigsulat na manga propita asini muna, law na Tyumanem,
41 ‘Pagpakanyeg kamu, manga utaw na dili' malim mangintu-u na gayed migpansi-odoy-odoy,
kay kumega' kamu sa un ku imo-un.
Aw matay kamu saba kay awun pakita' ku kamayu.
Aw pangkay kita-en mayu manang dili' kamu mangintu-u,
pangkay kun awun mag-ubat-ubat kamayu sa kakawasan.’* ”
42 Pagluwa' da ni Pablo aw si Bérnabi lekat adti sinagoga, nyanginayu' ya manga utaw kanilan na sugpatan nilan ya palna-u salut na Allaw na Paglagdeng. 43 Aw sagwa ya manga utaw migpansuway lekat adti katipun, madég ya utaw na nyagad kanilan, dala ya manga Judiyu aw manga Héntil na dyumalug da sa manga katanem na manga Judiyu. Aw pigdasig silan ni Pablo aw si Bérnabi na magpadeleg silan mangintu-u sa kadég na dyengeg nilan sa kallat na Tyumanem.
44 Pagkasalut na Allaw na Paglagdeng, nyabus da galu migkatipun adti sinagoga ya manga utaw na nyeya' dun ni lunsud pada magpakanyeg sa palna-u kan Kristu na lekat adti tingeg na Tyumanem. 45 Manang dun ni manga utaw na Judiyu, awun eped kanilan na wala' pangintu-u. Aw pagkita' nilan sa madég na manga utaw na migkatipun dun, to-o silan nyinga'. Yanagaw pigsala' nilan ya palna-u ni Pablo aw pig-odoy-odoy nilan sakanan.
46 Manang migkabulut si Pablo aw si Bérnabi miglong kanilan, “Pigbetang da na Tyumanem adti ginawa nami na kamu na manga Judiyu ya muna pa-ede-en sa palna-u kan Kristu na lekat adti tingeg na Tyumanem. Manang asuntu na kyataka͡an mayu yeiy, na, pigpakita' da mayu na dili' kamu umba' atagan na ginawa na wala' ya tyamanan. Yanagaw ayawan ta kamu adun aw un da kami madti manga utaw na beke' na Judiyu. 47 Kay yan ya sugu' kanami na Tyumanem, law nan,
‘Pigpamalli' da ta kamu
na un mayu ka-ilawan ya anenganeng na manga Héntil,
pada ka-ede-an na kadég na utaw asini tas na lupa'
ya pa-agi na mabatug silan paluwa-en aw dili' pa-emel-emelen asuntu sa manga sala' nilan.’ ”*
48 Aw pagdengeg na manga Héntil sa piglong ni Pablo, to-o silan migleya sa palna-u nan sa tingeg na Tyumanem. Aw nyangintu-u la ya taman na pigpamalli' da dadan na Tyumanem na un makatagtun sa ginawa na wala' ya tyamanan.
49 Aw nyabekkal da ya palna-u kan Kristu Jisus na lekat adti tingeg na Tyumanem, dun ni kadakula' na palibed na Antiyokiya, sakup na Pisidiya. 50 Manang ya manga Judiyu na kyumele sa palna-u ni Pablo aw si Bérnabi, pigsutsutan nilan ya manga mangkalangkaw dun ni lunsud, dala ya manga ka͡ubayan na mangkadengeg na nyatibulluk uman adti Tyumanem. Ya syampetan nan, pyamulayaman si Pablo aw si Bérnabi aw pig-alilinan lekat adti lunsud.
51 Yanagaw, pigtaptap nilan ya alikabuk dun ni siki nilan kay yan ya pangilala na ukuman na Tyumanem ya manga utaw na pig-indegan nilan. Aw nyanaw da silan aw dyumateng adti lunsud na Ikoniyo. 52 Manang ya manga bagu na nyangintu-u na pig-ayawan nilan adti Antiyokiya, migpadeleg silan migleya aw nyatmu' silan na Ispiritu na Tyumanem.