14
Si Pablo aw si Bérnabi adti Ikoniyo
1 Na, talana nilan adti Ikoniyo, syumeled silan adti sinagoga na manga Judiyu aw migpalna-u silan kasiling na gayed nilan pag-imo-un. Aw madég ya manga Judiyu aw Héntil na nyangintu-u la kan Jisus. 2 Manang awun eped na manga Judiyu na kyumele sa palna-u nilan, aw pigsutsutan nilan ya manga Héntil na wala' pangintu-u, pada kadamanan nilan ya manga bagu nyangintu-u kan Jisus. 3 Aw pangkay migsutsut ya manga Judiyu sa malat, manang madugay pa si Pablo aw si Bérnabi nyeya' dun ni lunsud yan aw pig-ubat-ubat nilan si Jisus na wala' ya kakallekan nilan. Aw awun manga mangkadyaw na pangilala na pigpa-imo' ni Jisus kanilan magi sa katulus nan, aw dun da nan matinawa ya pigpalna-u nilan sa kallat nan.
4 Na, nyatenga' ya anenganeng na manga utaw na nyeya' dun ni Ikoniyo. Awun manga utaw na tyumande' sa palna-u ni Pablo aw si Bérnabi, aw awun uman manga utaw na tyumande' sa manga Judiyu. 5 Aw ya manga utaw na wala' pangintu-u, wala' kadugay migsambuk silan dala ya manga Judiyu aw manga Héntil aw manga migdumala kanilan, aw byantakan nilan ya manga apostolés na un pakalaten aw badasan na babintu. 6 Manang pagka-ede' na manga apostolés sa palpa nilan, nyalaguy silan adti manga lunsud na Listra aw Dérbi dun ni banwa na Lica͡oniya aw palibed nan. 7 Aw dun da nilan pa-ede-an ya madyaw na ubat-ubat kan Jisus.
Si Pablo aw si Bérnabi adti Listra aw Dérbi
8 Na, dun ni Listra kyinita' nilan ya sambuk na eseg na gayed nyingkud kay kapig ya manga siki nan. Lekat saba adti pagka͡utaw nan, wala' sakanan pakapanaw. 9 Aw to-o nan pigpakanyegan ya palna-u ni Pablo. Aw pag-inunu ni Pablo kanan, kya-ede-an nan na dakula' ya pagpangintu-u nan na kaguli-an sakanan. 10 Yanagaw miglong si Pablo kanan sa mabagseg na tingeg, “Indeg kaw!” Aw tigkan mig-ugpasen ya eseg yan aw dayaw da nyakapanaw.
11 Pagkita' na manga utaw sa nya-imo' ni Pablo, mig-iyak-iyak silan dun ni kanilan tingeg na Lica͡oniya miglong, “Ini ya manga tyumanem na migtimbaluyan utaw na dyumateng asini kanaten!” 12 Aw pigngalanan nilan na kanilan manga tyumanem. Si Bérnabi, pigngalanan nilan na si Sé͡us, aw si Pablo pigngalanan nilan na si Hérmés kay si Pablo ya gayed maglong.*
13 Na, ya témplo ni Sé͡us awun ni luwa' na inalad na lunsud, aw dun panimba ya manga utaw na Lica͡oniya na magdugsu' kanan. Aw awun sambuk na magdadugsu-ay dun ni témplo, aw kaliman nan dugsu-an si Pablo aw si Bérnabi. Yanagaw migpa-angay sakanan sa duwa ya baka na pigkapun aw dayaw nilan pigbalyegan na bulak, aw pigdupput nilan adti suwangan na inalad na lunsud na un pagdugsu' kanilan na manga utaw.
14 Manang pagka-ede' da ni Pablo aw si Bérnabi na un da silan dugsu-an na manga utaw, pigkésé' nilan ya kanilan sa-ul kay yan ya pangilala na wala' silan katutuki sa pigpan-imo' na manga utaw. Aw migkagallat silan adti tenga' na katipun na manga utaw aw migsagda silan, long nilan,
15 “Ya-i mayu pag-imo-a san! Beke' kami na tyumanem mayu! Utaw kami olo' kasiling mayu! Nyadi kami na un magpa-ede' kamayu sa madyaw na ubat-ubat kan Jisus pada dili' da mayu dalugun ya manga tyumanem mayu na galu' na wala' ya guna, manang yan baling ya daluga mayu ya tengteng Tyumanem na mig-imo' sa langit aw lupa' aw dagat aw ya kadég na manga tagbanwa nilan. 16 Asini muna aw taman adun, pigpabaya-an na Tyumanem ya manga tyugbulan na kadég na manga utaw na un mag-imo' sa pangkay unu ya kaliman nilan imo-un. 17 Manang madég ya manga puliba lekat adti kanan pada kilala͡en sakanan na manga utaw, kay pigpakita' nan ya kanan pagka Tyumanem magi sa madég na pigpan-imo' nan na madyaw: Pig-atagan kamu nan na ulan, aw pigpatulin nan ya manga tanem mayu pada madég ya bunga, aw pigsambat nan ya kakanenen mayu pada magleya kamu.”
18 Yanagaw madég ya piglong ni Pablo aw si Bérnabi, aw tantanan nilan gelgelen ya manga utaw kyatagenan nilan aw wala' da silan pagdugsu'.
19 Manang awun dyumateng adti Listra na manga Judiyu lekat adti Antiyokiya sakup na Pisidiya aw lekat uman adti Ikoniyo. Aw piggagad nilan ya madég na manga utaw, aw yan ya syampetan nan, pigbadasan nilan si Pablo na babintu. Aw pigguyud nilan adti luwa' na lunsud, kay iman nilan aw nyatay da sakanan. 20 Manang pigpanabangan si Pablo na manga bagu mangintu-uway kan Kristu, aw migbangun da sakanan aw lyumiku' adti seled na lunsud. Pagkasalut na allaw, nyagad da kan Bérnabi syuminan adti Dérbi.
Ya pagliku' ni Pablo aw si Bérnabi adti Antiyokiya sakup na Sirya
21 Pagdateng da ni Pablo aw si Bérnabi adti lunsud na Dérbi, pigpa-ede' nilan ya madyaw na ubat-ubat, aw madég ya utaw na nya-imo' mangintu-uway kan Jisus. Pagkatigkas yan, pigliku-an nilan ya kanilan pig-agiyan idtu muna adti Listra aw Ikoniyo aw Antiyokiya sakup na Pisidiya. 22 Aw adti tag sambuksambuk na banwa na dyatengan nilan, pigpakabagseg nilan ya pagpangintu-u na manga utaw na syumalig da kan Jisus. Aw pigdasig nilan, law nilan, “Pagpadeleg kamu sa pagpangintu-u mayu pangkay unu ya un dumateng, kay un saba dumateng ya madég na manga kalugan. Aw madyaw da yan, kay yan saba ya un ka-agiyan na kadég na nyakaseled adti kasakupan na Tyumanem.” 23 Aw adti tag sambuksambuk na simbahan, nyamalli' silan sa manga utaw na un maggagad sa mangintu-uway. Aw nyanawagtawag silan adti Tyumanem na migpuwasa, aw pig-atag nilan adti kan Jisus ya manga bagu na pigpamalli', kay si Jisus ya kanilan pigsaligan.
24 Pagkatigkas yan, nyagi silan adti Pisidiya aw dyumateng da adti lunsud na Pérga dun ni probinsiya na Pampiliya. 25 Aw pagkatigkas nilan mag-ubat-ubat sa tingeg na Tyumanem dun ni Pérga, nyanaw da silan adti pantalan na Ataliya adti dulug na dagat. 26 Aw syumakay silan sa barko syuminan ni Antiyokiya adti probinsiya na Sirya. Kay ya Antiyokiya yan ya piglekatan nilan idtu muna aw dun silan idtu muna panawagtawagi na mangintu-uway adti Tyumanem pada tabangan nan sa pagpanaw nilan. Aw yanagaw, pagkatigkas da na imo-unun na pigtaligu na Tyumanem kanilan, pigliku-an nilan ya Antiyokiya.
27 Pagdateng da nilan dun, pigpantipun nilan ya kadég na manga mangintu-uway, aw pigdandan nilan ya kadég na pigpan-imo' na Tyumanem magi kanilan aw ya tabang nan kanilan pada mangintu-u ya manga utaw na Héntil sa madyaw na ubat-ubat kan Jisus. 28 Aw madugay si Pablo aw si Bérnabi nyeya' adti sayid na manga mangintu-uway kan Jisus dun ni Antiyokiya.