15
Ya sangkamulu' na palna-u na dyumateng adti Antiyokiya
1 Na, awun manga eseg lekat adti Judiya na dyumateng adti Antiyokiya sakup na probinsiya na Sirya. Judiyu silan na nyangintu-u la kan Jisus. Aw migpalekat silan migpalna-u sa manga mangintu-uway dun. Miglong silan, “Dili' kamu dawaten na Tyumanem kantaw tumanen mayu ya Uldin na pig-atag nan kan Moysis asini muna aw una kamu magpatuli'.”
2 Manang gayed si Pablo aw si Bérnabi migbilingbiling adti kanilan taman na nya-imo' ya dakula' na ayil. Yanagaw migbaya' ya manga mangintu-uway dun ni Antiyokiya na padala nilan adti Jérusalim si Pablo aw si Bérnabi aw manga eped na inulug na taga Antiyokiya na un magkita' silan ya eped na manga apostolés aw manga magdumala sa mangintu-uway, pada balawbalawan nilan kun kanyan palna-u ya un dalugun. 3 Aw pigpapanaw nilan. Aw sa pag-agi ni Pablo aw si Bérnabi adti manga banwa na Ponisiya aw Samariya, gayed nilan pigdandan ya pagpangintu-u na madég na manga Héntil adti eped na manga banwa. Aw ya kadég na dyumengeg alag silan migleya.
Ya dakula' na katipun adti Jérusalim
4 Pagdateng da ni Pablo aw manga eped nan adti Jérusalim, pigdawat silan na manga mangintu-uway dun, dala ya manga migdumala kanilan aw ya manga apostolés. Aw pigdandan nilan ya kadég na pigpan-imo' na Tyumanem magi kanilan. 5 Manang awun manga Judiyu na kenne' pa na pagka Parisiyo nilan pangkay nyangintu-u la silan kan Jisus, aw nyindeg silan adti asdangan na manga utaw aw miglong, “Kay manga inulug, pangkay ya eped na nyangintu-u la beke' na Judiyu, manang dili' galu malagak ya katanem tadun na magpatuli'! Aw palna-uwan tadun uman silan na tumanen nilan ya Uldin na pig-atag na Tyumanem kan Moysis.”
6 Yanagaw migkatipun da ya kadég na manga apostolés aw manga magdumala sa manga mangintu-uway na un nilan anenganengen kun unu ya madyaw nilan imo-un. 7 Aw madugay nilan pigbalawbalawan.
Aw tigkas yan, nyindeg si Pédro adti asdangan nilan aw law nan, “Kay manga inulug ku, kya-ede-an da mayu na idtu muna pigpamalli' aku na Tyumanem lekat adti kanaten pada magi kanak pa-ede-en ya manga Héntil sa madyaw na ubat-ubat kan Jisus pada mangintu-u silan. 8 Aw ya Tyumanem yan ya nyaka-ede' kun unu ya awun ni anenganeng na manga utaw. Aw pigpakita' da nan na pigdawat nan ya manga utaw na Héntil na nyangintu-u kan Jisus, kay pig-atag da na Tyumanem kanilan ya kanan Ispiritu kasiling na pag-atag nan kanaten. 9 Kay wala' ya Tyumanem pagkibang kanaten aw wala' uman pagkibang kanilan, manang siling na pig-imo' nan kanaten, piglinisan da nan uman ya kanilan anenganeng asuntu sa pagpangintu-u nilan kan Jisus.
10 “Yanagaw, ananga' mayu tanda-en ya Tyumanem sa paglong mayu na dili' nan dawaten ya manga Héntil kun dili' nilan dalugun ya katanem tadun? Kun wala' kabatug na tyugbulan tadun asini muna ya pagtuman sa uldin aw dili' tadun uman mabatug, na, ananga' tadun legesen ya manga Héntil na dumalug sa katanem tadun? 11 Kay manga inulug ku, dili' mayu pagkalingawan ya kallat ni Jisus na pangulu tadun, na yeiy olo' ya du-an na nyangintu-u la kitadun aw pigpaluwa' lekat adti pagpa-emel-emel nan. Aw maynan uman ya kallat nan adti manga Héntil na nyangintu-u kanan.”
12 Pagkatigkas ni Pédro maglong, nyatinep ya kadég na utaw na migkatipun. Aw pigpakanyegan nilan uman si Bérnabi aw si Pablo sa pagdandan nilan sa kadég na pigpan-imo' na Tyumanem magi kanilan dun ni pagpanaw nilan adti manga utaw na Héntil, dala ya manga mangkadyaw na pangilala aw imo-unun na nyabatug olo' na katulus na Tyumanem.
13 Pagkatigkas nilan magdandan, miglong si Santiago, “Kay manga inulug ku, pakanyegi mayu ya un ku paglongun. 14 Abus da si Simon Pédro paglong kanaten sa tagna' na Tyumanem migpakita' sa kallat nan adti manga Héntil, na awun manga pigpamalli' nan lekat adti kanilan na un ma-imo' kanan manga utaw. 15 Aw ya piglong ni Pédro mig-unawa saba sa piglong na Tyumanem na pigsulat na manga propita asini muna, law nan,
16 ‘Pagkatigkas yan, un aku lumiku' dun ni moli na allaw,
aw umanen ku salut ya kasakupan ni Hari' Dabid na migkalat da,
aw dayaw ku pantipunun ya nyangkabélét
aw un pa ku pa-indegen ya bagu.
17 yeiy ya un ku imo-un pada paninawun aku na manga utaw na Héntil taman na dadan da ku pigpamalli'
na un ma-imo' kanak utaw.*
18 Aw yeiy ya piglong na Tyumanem na dadan da nan pigpa-ede' lekat pa adti kadengan na muna.’
19 “Yanagaw ini ya anenganeng ku. Dili' tadun pakalugun ya manga Héntil na malim mangintu-u sa Tyumanem. 20 Naten baling silan sulatan, aw yeiy olo' ya paglongun tadun kanilan na dili' nilan pagkanen ya unud na pig-atag da dun ni dugsu' adti manga tyumanem na galu'. Aw dili' silan uman magkasala-enen. Aw dili' silan kuman sa dugu' na ayep, aw dili' silan kuman sa unud na ayep na wala' luwa' ya dugu' nan. 21 “Kya-ede-an da na kadég na manga utaw na Judiyu ya manga sugu' yeiy na lekat adti Uldin na pig-atag na Tyumanem kan Moysis. Kay lekat asini pa muna, kada simana dun ni Allaw na Paglagdeng, ya Uldin pigpa-ede' adti kadég na manga lunsud, aw kenne' pa adun pigbasa adti manga sinagoga tadun.”*
Ya sulat na manga apostolés adti manga Héntil na nyangintu-u la
22 Aw tigkas yan, dayaw mig-anenganeng ya manga apostolés aw manga magdadumala͡ay aw ya kadég na manga mangintu-uway sa kadakula' na dyengeg nilan, aw pig-unawa͡an na ginawa nilan na mamalli' sa manga eseg lekat adti kanilan na un magad kan Pablo aw kan Bérnabi adti Antiyokiya. Aw yan ya manga eseg na pigsugu' nilan si Judas na pigngalanan uman na Bar Sabbas, aw si Silas, na alag silan pigsaya' na manga eped nilan na mangintu-uway. 23 Aw yeiy ya sulat na pigpadala na manga utaw dun ni katipun:
“Kay manga inulug na kanami pigginawa͡an,
“Kami na manga apostolés aw manga magdadumala͡ay sa mangintu-uway asini Jérusalim, migpadala kami sa sulat adti kamayu na Héntil na nyangintu-u la dun ni Antiyokiya aw adti kadakula' na probinsiya na Sirya aw Ciliciya. Na, pakadyawun kamu galu na Tyumanem.
24 “Dyengeg nami na awun manga eseg na nyadti kamayu lekat asini Jérusalim na migsagunut sa anenganeng mayu sa sangkamulu' na palna-u nilan. Manang pada ka-ede-an mayu, wala' nami silan sugu-a adti kamayu, aw wala' nami silan atagi na katundanan na un nilan palna-u ya maynan. 25-27 Yanagaw migpatawag kami sa dakula' na katipun aw pigbalawbalawan nami ya palna-u na manga utaw yan, aw alag kami migsambuk sa anenganeng kun unu ya madyaw imo-un. Aw nyamalli' kami sa manga eseg na lekat adti kanami na un sugu-un adti kamayu eped ni Pablo aw si Bérnabi na pigginawa͡an tadun. Aw yan ya nyapamalli' nami si Judas aw si Silas. Alag silan migpān sa kanilan pagka-utawun pangkay adti kalatayan pada mabatug ya imo-unun na kanaten pangulu na si Jisus Kristu. Aw matinawun nilan adti kamayu kun unu ya pagbaya' nami asini katipun.
28 “Aw yan saba ya pigpalna-u kanami na Ispiritu na Tyumanem aw pigtande' nami na dili' kamu nami pakalugun sa kadég na katanem na manga Judiyu. Manang yan olo' ya un nami sekaten kamayu: 29 Dili' mayu pagkanen ya unud na pig-atag da dun ni dugsu' adti manga tyumanem na galu'. Aw dili' kamu magkan sa dugu' na ayep, aw dili' kamu uman magkan sa unud na ayep na wala' luwa' ya dugu'. Aw dili' kamu magkasala-enen. Kun tumanen mayu yeiy, yan saba ya madyaw.
“Na, yan da. Asini la taman ya sulat nami ini.”
30 Yanagaw pigpapanaw da silan pasinan adti Antiyokiya. Pagdateng nilan dun, pigpantipun nilan ya madég na mangintu-uway aw pig-atag kanilan ya sulat. 31 Aw pagbasa na manga mangintu-uway sa sulat, to-o silan migleya sa palna-u na pigsulat kanilan. 32 Na, si Judas aw si Silas mag-ubat-ubatay silan na Tyumanem, aw madég uman ya piglong nilan adti mangintu-uway na un magdasig kanilan aw magpakasalig sa pagpangintu-u nilan. 33 Aw nyeya' pa dun silan seled na pilangallaw, aw pagkatigkas yan, nyanabi silan. Aw tyumubag ya manga mangintu-uway, long nilan, “Pakadyawun kamu na Tyumanem sa panaw mayu.” Aw nyuli' da silan adti manga migsugu' kanilan na awun ni Jérusalim. 34 [Manang si Silas migpatagak adti Antiyokiya.] 35 Aw kenne' pa ni Pablo aw si Bérnabi nyatingen dun ni Antiyokiya, aw pigpalna-uwan pa nilan ya manga utaw aw pigpa-ede' nilan ya madyaw na ubat-ubat kan Kristu lekat adti tingeg na Tyumanem. Aw madég uman ya eped na manga mangintu-uway na migtabang kanilan.
Ya Manga Panaw ni Pablo adti Asia, aw Macédonya, aw Akaya
Ya pagsuway ni Bérnabi aw si Pablo
36 Na, paglabay da na pilangallaw, miglong si Pablo kan Bérnabi, “Nate' liku-an tanawun ya manga inulug ta na nyeya' adti kada banwa na pigpa-ede-an ta idtu muna sa madyaw na ubat-ubat kan Jisus, aw wan ya pagpakabetang nilan.” 37 Aw tyumande' si Bérnabi, aw kaliman nan pa-agad nilan si Juan na pigngalanan uman na Markos, 38 manang si Pablo dili' malim, kay idtu muna talana ni Pablo aw si Bérnabi adti probinsiya na Pampiliya, pig-ayawan silan ni Markos aw wala' sakanan pagpadeleg pagtabang kanilan adti nyasama' na panaw nilan. 39 Yanagaw to-o mig-ayil si Pablo aw si Bérnabi, aw ya syampetan nan, migsuway silan. Pigpa-agad ni Bérnabi si Markos aw syumakay silan sa barko pasinan adti pulu' na Cipré. 40 Aw si Pablo, pigpamalli' nan si Silas na un magad kanan. Aw sa un da silan manaw, nyanawagtawag ya manga mangintu-uway dun ni Antiyokiya aw migsekat adti Tyumanem na atagan silan na kadyawan nan. Aw tigkas yan, nyanaw da silan. 41 Aw pyangkadtuwan nilan ya manga mangintu-uway na migkatipun nyanimba adti manga probinsiya na Sirya aw Ciliciya na un pakabagsegen ya pagpangintu-u nilan kan Jisus.