10
Ya pagpatawag ni Cornéliyo kan Pédro
1 Na, ya syudad na Césariya dun ni probinsiya na Judiya, yan ya pig-eya-an ni Cornéliyo. Sambuk sakanan na cénturiyon na miggagad sa sanggatus ya sundalu na kohort na taga Italiya. * 2 Aw pangkay Héntil sakanan aw beke' na Judiyu, manang nyatibulluk ya ginawa nan dyumalug sa Tyumanem, dala uman ya manga ka-epedanan nan dun ni kanan balay. Aw dakula' to-o ya tabang nan adti manga Judiyu na wala' ya pagkamangan. Aw malikit uman sakanan magpanawagtawag adti Tyumanem.
3 Sambuk na allaw na alas trés na ambung, awun anghil na Tyumanem na migpakita' kan Cornéliyo liwan na tagaynep. Syumeled ya anghil adti balay nan aw miglong, “We Cornéliyo!”
4 Aw to-o si Cornéliyo migteneb aw nyakatengteng sa anghil. Aw law nan, “Walan yan, kay Sir?”
Aw tyumubag ya anghil, law nan, “Dyengeg da na Tyumanem ya kanmu pagpanawagtawag kanan aw kyinita' nan ya pagtabang mu sa manga utaw na makalalat. 5 Na, pagsugu' kaw sa manga eseg adti Joppé aw pa-angayan si Simon na pigngalanan uman na Pédro. 6 Nyeya' sakanan dun ni balay na sambuk na Simon na mag-imo-ay sa manga pametang lekat adti kindal na ayep. Apit adti dulug na dagat ya balay nan.”
7 Pagkalanas da na anghil dun ni pag-inunu nan, migtawag si Cornéliyo sa duwa ya sugu-anen nan aw sambuk uman na sundalu na pigsaligan nan na nyatibulluk ya anenganeng nan dyumalug sa Tyumanem. 8 Aw pig-ubat nan kanilan ya kadég na nya-imo'. Aw tigkas yan, pigsugu' nan silan adti Joppé.
Ya palna-u na Tyumanem kan Pédro na dili' pagkele͡an ya manga Héntil
9 Salut na allaw na manga alas dosi, nyamapa la adti Joppé ya manga pigsugu' ni Cornéliyo.
Aw yan uman na udas, nyanik si Pédro adti tas na atep na balay ni Simon na un manawagtawag adti Tyumanem.* 10 Aw wala' kadugay nyagetem da si Pédro aw kaliman nan kuman, manang talana sakanan tyumagad sa migpan-imo' sa kakan, awun kyinita' nan na liwan na tagaynep: 11 Nyabeka' ya langit aw awun kyinita' nan na nyatonton dun ni asdangan nan na iman mu aw dakula' na abul na nya-ulad na pig-eketan ya upat ya tuktuk. 12 Adti seled na abul awun madég na punganan na mannanap aw ayep, dala ya manga magpanaw aw ya manga magpananap aw ya manga mannanap na maglupad.* 13 Aw awun tingeg na dyengeg nan na miglong, “Kay Pédro, indeg kaw aw iyawa ya sambuk, aw kana!”
14 Manang tyumubag si Pédro, law nan, “Dili' aku beg san magkan! Taman adun wala' pa ya pigkan ku na malipa' na pigpigil na Uldin nami na manga Judiyu.”
15 Tigkas yan, salut nan dyengeg ya tingeg na miglong, “Kun unu ya piglong da na Tyumanem na malinis da, dili' da mu pagngalanan na malipa'.”
16 Makatlu ni Pédro dengga yeiy, aw tigkas yan, nya-engat da ya dakula' na abul adti langit.
Ya pag-agad ni Pédro adti balay ni Cornéliyo
17 Sagwa nyabelengbeleng pa si Pédro kun unu ya kakawasan na kyinita' nan, nyaka-ibwang da adti suwangan na inalad na balay ya manga eseg na pigsugu' ni Cornéliyo kay nyusip da silan kun ayin ya balay ni Simon. 18 Aw migtawag silan nyusip, “Ayin asini bantuk si Simon na pigngalanan na Pédro?”
19 Aw sa kenne' pa ni Pédro mig-anenganeng sa kyinita' nan, piglongan sakanan na Ispiritu na Tyumanem, law nan, “Inunuwa! Iyan da ya tulu ya eseg na nyaninaw kanmu. 20 Indeg kaw aw panog kaw adti dalem. Aw dili' kaw magduwaduwa magad kanilan kay pigsugu' ku silan.”
21 Aw nyanog si Pédro adti dalem aw lyumagbet kanilan, aw long nan, “Aku saba ya pyaninaw mayu. Na, wan ya tud mayu kanak?”
22 Aw law nilan kan Pédro, “Si Cornéliyo na kapatas nami, cénturiyon sakanan. Nyatibulluk ya ginawa nan dyumalug sa Tyumanem, aw pigsaya' sakanan na kadég na manga Judiyu asuntu na matulid ya bet nan. Aw yan ya migsugu' kanami adi tampid mu, kay ya sambuk na anghil na Tyumanem miglong kanan na angayen kaw nami pada magpakanyeg sakanan sa un mu paglongun.” 23 Yanagaw pigpaseled silan ni Pédro aw pigpakulang nan yan na gabi.
Pagkamaselem da, migbangun si Pédro aw nyagad kanilan, aw awun uman nyagad kanan na manga inulug na nyangintu-u na taga Joppé. 24 Pagdateng da nilan salut na allaw adti Césariya, tyumagad da kanilan ya manga ka-epedanan ni Cornéliyo aw manga ubaybay nan na dadan nan pigtipun dun ni balay.
25 Pagseled da ni Pédro adti balay, lyumagbet kanan si Cornéliyo aw nyangillupung adti asdangan ni Pédro na nyamasa galu kanan. 26 Manang miglong si Pédro, “Indeg kaw, kay Léw! Kay utaw aku olo' siling mu.” Aw pigpa-indeg nan si Cornéliyo.
27 Tigkas yan, migbalawbalaw silan talana nilan migpasinan da adti katipunanan dun ni balay, aw dun da ni Pédro kita-a ya madég na utaw na migkatipun. 28 Aw miglong si Pédro kanilan, law nan, “Kya-ede-an da mayu ya uldin nami na manga Judiyu, na dili' kami makasambuk sa manga utaw na beke' na Judiyu aw dili' kami uman makalaba' adti sayid nilan. Manang migpa-ede' da kanak ya Tyumanem na dili' da ku pagngalanan na malipa' ya manga utaw na Héntil. 29 Yanagaw pagpa-angay mayu kanak, wala' aku pagduwaduwa, manang maksay da aku baling nyadi. Aw usipen ta kamu: Walan ya tud mayu kanak?”
30 Aw tyumubag si Cornéliyo kanan, law nan, “Idtu na upatengallaw pa ya lyumabay na minangadi na udas, manga alas trés na ambung, nyanawagtawag aku adti Tyumanem asini balay ku. Aw tigkan awun dyumateng adti asdangan ku na sambuk na eseg na migkilangkilang ya kadégkadég nan, 31 aw law nan kanak, ‘Kay Cornéliyo, dyengeg na Tyumanem ya panawagtawag mu, aw gayed nan pigka-anenganengan ya tabang mu adti manga utaw na makalalat. 32 Yanagaw pagsugu' kaw sa manga eseg adti Joppé, aw pa-angayan si Simon na pigngalanan uman na Pédro. Nyeya' sakanan dun ni balay na sambuk na Simon na mag-imo-ay sa manga pametang lekat adti kindal na ayep. Apit adti dulug na dagat ya balay nan.’
33 “Yan ya piglong nan kanak. Aw yanagaw nyaksay ta kaw pigpa-angay. Aw madyaw kay nyadi kaw. Na, migkatipun da kami asini asdangan na Tyumanem aw un nami pakanyegan ya kadég na pigpamene' nan kanmu.”
34 Pagkatigkas da ni Cornéliyo maglong, tyumubag si Pédro, law nan, “To-o la ku adun nyabangal na wala' kadi' ya utaw na pigkibang na Tyumanem, 35 manang madawat da nan ya pangkay singalan utawa kun mallek sa Tyumanem aw mag-imo' sa pagkaliman nan, pangkay Judiyu sakanan aw beke' na Judiyu.
36 “Basi kya-ede-an da mayu ya madyaw na ubat-ubat na pigpa-ede' na Tyumanem adti kanami na buwadbuwad ni Isra-él, na mabatug da na manga utaw ya pagsambuk sa Tyumanem magi sa pigpan-imo' ni Jisus Kristu na yan ya pangulu na kadég na utaw. 37 Ya ubat-ubat yeiy, migpalekat adti probinsiya na Galiliya dun ni pagpalna-u ni Juan aw pagpamba͡utismu nan sa manga utaw na migselsel sa kanilan manga sala'. Aw nyabekkal da ya madyaw na ubat-ubat asini kadakula' na banwa na Judiya.
38 “Aw basi kya-ede-an da mayu na si Jisus na taga Nasarit pig-atagan na Tyumanem na katulus na Ispiritu nan, aw pangkay ayin sakanan panaw, pigpan-imo' nan ya madég na madyaw na imo-unun aw pigpangguli' nan ya manga utaw na syeledan na busaw, kay awun ni kanan ya Tyumanem. 39 Aw sistigus kami sa kadég na pigpan-imo' nan asini banwa na manga utaw na Judiyu aw adti Jérusalim. Manang baling nilan pigpatay magi sa pagkalabu nilan adti krus. 40 Manang pigmataw uman na Tyumanem dun ni katlu na allaw aw pigpakita' nan kanami. 41 Wala' sakanan pakita-an adti kadég na utaw, manang kami olo' ya pigpakita-an nan kay dadan kami nan pigpamalli' na un ma-imo' kanan manga sistigus sa kadég na kyinita' nami. Kay kyuman kami aw nyinem adti sayid nan pagkatigkas na pagkataw nan lekat adti nyangkamatay. 42 Aw pigsugu' kami nan na magpa-ede' sa madyaw na ubat-ubat kanan aw magmatinaw uman na si Jisus ya pig-atagan na Tyumanem na katundanan na un mag-ukum sa kadég na utaw, pangkay utaw pa silan aw pangkay nyatay da. 43 Aw si Jisus saba ya pigsulat na kadég na manga propita asini muna. Miglong silan na magi sa ngalan ni Jisus, un lanasen ya manga sala' na kadég na utaw na mangintu-u kanan.”
Ya pagdateng da na Ispiritu na Tyumanem adti manga Héntil
44 Sa kenne' pa ni Pédro miglong seiy, dyumateng ya Ispiritu na Tyumanem adti kadég na utaw na migpakanyeg kanan. 45 Aw ya manga Judiyu na mangintu-uway na nyagad kan Pédro lekat adti Joppé, nya-eneng-eneng to-o silan kay pangkay Héntil ya manga utaw dun ni balay ni Cornéliyo manang pig-asagan silan na Tyumanem na Ispiritu nan, 46 aw dyengeg nilan si Cornéliyo aw manga ka-epedanan nan migsideyen sa Tyumanem adti sangkamulu' na tingeg na beke' na kanilan tingeg.
Tigkas yan, miglong si Pédro adti manga eped nan, 47 “Ya manga utaw ini, pigdawat da nilan ya Ispiritu na Tyumanem kasiling naten. Yanagaw singan ka' ya makapigil kanilan kun kaliman nilan magpaba͡utismu?” 48 Aw piglongan ni Pédro si Cornéliyo aw ka-epedanan nan na magpaba͡utismu silan dun ni ngalan ni Jisus Kristu. Pagkatigkas da nilan ba͡utismuwan, nyanginayu' silan kan Pédro na meya' pa adti sayid nilan seled na pilangallaw.