9
Nyangintu-u la si Saulo kan Kristu
1 Manang dun ni manga allaw yan, kenne' pa ni Saulo migpadeleg sa pagpamulayam sa manga mangintu-uway kan Jisus aw byantakan nan silan kay kaliman nan galu apnasen. Yanagaw nyadtu sakanan ni pangulu na manga magdadugsu-ay adti Témplo na awun ni Jérusalim 2 aw migsekat sa manga sulat na un pakita' adti magdadumala͡ay sa manga sinagoga * na manga Judiyu adti syudad na Damasko. Ya manga sulat yan, palangad katundanan nan magdakep sa manga utaw na nyangintu-u kan Jisus. Taman na kita-en nan dun ni kanan pagpanaw na nyangintu-u la, pangkay eseg aw ka͡ubayan, dakepen nan silan aw pa-agad nan adti Jérusalim.
3 Na, sagwa si Saulo nyamapa adti Damasko, awun bigla' na kilangkilang na kalalamdag na lekat adti tas na langit na nyakapalibed kanan, 4 aw dayaw nyatuwad sakanan dun ni lupa', aw awun tingeg na dyengeg nan, “We Saulo! We Saulo! Ananga' gayed aku mu pyamulayaman?”
5 Aw tyumubag si Saulo, “Wettay! Singalan kaw, kay Sir?”
Aw awun tubag na dyengeg nan, “Aku saba si Jisus na gayed mu pigpamulayaman. 6 Manang pagbangun kaw baling aw kadtu kaw ni syudad. Pagdateng da mu dun, paglongun kaw sa unu ya un mu imo-un.”
7 Na, ya manga eped ni Saulo, wala' silan pakapaglong kay to-o silan kyabigla-an. Kay dyengeg nilan ya manga tingeg manang wala' nilan kita-a ya lyekatan. 8 Yanagaw migbangun si Saulo lekat adti lupa', manang pagbeka' nan sa mata nan, wala' da sakanan kita'. Yanagaw pig-agak sakanan na manga eped nan aw pig-ated nilan adti Damasko. 9 Seled na tulungallaw wala' sakanan kita', aw wala' kan aw wala' uman inem.
10 Na, dun ni syudad na Damasko pag-eya' ya sambuk na Judiyu na pigngalanan na si Ananiyas, aw nyangintu-u la sakanan kan Jisus. Aw migpakita' si Jisus kanan liwan na tagaynep, long nan, “We Ananiyas.”
Aw law ni Ananiyas, “Ini aku, kay Sir.”
11 Aw miglong si Jisus kanan, “Kadtu kaw ni dalan na pigngalanan na Matulid, aw paninawa adti balay ni Judas ya sambuk na eseg na pigngalanan na si Saulo na taga syudad na Tarso. Kay tolobo sakanan nyanawagtawag adti Tyumanem 12 aw pigpakita' da ta kaw kanan liwan na tagaynep na nyadtu kaw ni pigka-eya-an nan aw pigbetang mu ya kanmu palad adti tas na ulu nan pada salut sakanan kumita'.”
13 Manang tyumubag si Ananiyas, “Kay Sir, dyengeg ku adti madég na utaw ya bet na utaw yan. To-o nan pyamulayaman ya manga mangintu-uway kanmu dun ni Jérusalim na wala' ya kallat nan kanilan, 14 aw adun da, awun da kunu katundanan nan lekat adti mangkatas na manga magdadugsu-ay dun ni Jérusalim na magtumbay kanan sa pagdakep sa kadég na utaw asini syudad na nyanawagtawag adti kanmu ngalan.”
15 Manang miglong si Jisus kanan, “Kadtu kaw ni kanan, kay pigpamalli' ku dadan si Saulo na un magpa-ede' sa kanak ngalan adti manga utaw na beke' na Judiyu, aw adti asdangan na manga hari' nilan, aw adti manga utaw na buwadbuwad ni Isra-él. 16 Aw un ku pa-ede' kanan ya kadég na un nan ti-isan asuntu na nyangintu-u la kanak.”
17 Yanagaw nyadtu la si Ananiyas aw syumeled adti balay ni Judas. Pigbetang nan ya palad nan adti tas na ulu ni Saulo, aw law nan, “Kay inulug Saulo, si Jisus na kanate' pangulu, yan ya migpakita' kanmu dun ni dalan pasinan adi. Aw pigsugu' aku nan na madi sayid mu pada salut kaw kumita' aw matmu' kaw na Ispiritu na Tyumanem.”
18 Aw tigkan awun nyangkataktak lekat adti mata ni Saulo na iman mu aw manga imbis na isda', aw dayaw kyumita' salut. Pagkatigkas yan, nyindeg sakanan aw migpaba͡utismu la. 19 Aw tigkas yan, kyuman sakanan aw lyumiku' da ya kabagseg na lawas nan.
Ya pag-ubat-ubat ni Saulo dun ni Damasko
Na, seled na pilangallaw nyeya' si Saulo adti sayid na manga mangintu-uway dun ni Damasko. 20 Aw dyumiritsu sakanan adti manga sinagoga aw pigpalna-uwan nan ya manga Judiyu, law nan, “Si Jisus, yan saba ya Ise' na Tyumanem.”
21 Aw ya kadég na utaw na dyumengeg kanan, to-o silan nyabelengbeleng. Aw mig-usip-usipay silan, “Ananga' ya utaw iyan? Idtu muna, pigpamulayaman nan ya manga mangintu-uway kan Jisus adti Jérusalim, aw pagaw ya tud nan asini banwa yeiy ya pagdakep sa manga mangintu-uway pada pa-agad adti asdangan na mangkatas na manga magdadugsu-ay dun ni Jérusalim.”
22 Manang dun ni manga allaw yan, si Saulo to-o la baling kyadugangan ya katulus na palna-u nan, aw dun ni palna-u nan pigmatinaw nan na si Jisus, yan ya Kristu. Aw ya manga utaw na Judiyu dun ni Damasko, wala' nilan kabatug tubaga ya palna-u nan.
23 Paglabay da na madég na allaw, awun eped na manga Judiyu dun ni Damasko na migsambuk nyantak kan Saulo na patayen. 24 Kada allaw aw gabi, pigbanganan nilan si Saulo dun ni manga agiyanan na inalad na syudad. Manang pigpa-ede' kanan ya pigpalpa nilan. 25 Aw ya manga utaw na dyumalug sa palna-u ni Saulo, kaliman nilan tamengan sakanan. Yanagaw, sambuk na gabi pigpa-ingkud nilan adti seled na anes aw pigtonton nilan adti bintana' dun ni inalad na syudad taman ni lupa' adti luwa'.
Ya pagliku' ni Saulo adti Jérusalim
26 Aw lyumiku' si Saulo adti Jérusalim aw pigtagala' nan ya pagsambuk adti manga mangintu-uway kan Jisus, manang nyallek silan kanan kay iman nilan aw migtallalingu olo' sakanan nyangintu-u. 27 Yanagaw pig-alladan sakanan ni Bérnabi adti asdangan na manga apostolés aw pig-ubat ni Bernabi kanilan ya pagpakita' ni Jisus kan Saulo adti dalan pasinan ni Damasko aw ya paglong ni Jisus kanan, dala ya pag-ubat-ubat ni Saulo dun ni ngalan ni Jisus adti manga utaw dun ni Damasko na wala' ya kakallekan. 28 Yanagaw mig-iyubay da si Saulo sa manga mangintu-uway pangkay ayin silan dun ni Jérusalim. Aw wala' si Saulo kallek mag-ubat-ubat dun ni ngalan ni Jisus. 29 Na, awun manga Judiyu na yan ya kanilan tingeg ya Grigo. Aw ya kanilan palna-u gayed pigbilingbiling ni Saulo. Yanagaw byantakan nilan na patayen sakanan. 30 Manang pagka-ede' na manga mangintu-uway sa bantak kan Saulo, pig-ated nilan sakanan lekat adti Jérusalim taman adti syudad na Césariya. Tigkas yan, pigpa-uli' nilan adti kanan lunsud na Tarso.
31 Yanagaw, tyumeneng da ya manga pamulayam sa manga mangintu-uway dun ni manga banwa na Judiya aw Galiliya aw Samariya. Aw migkadég silan aw gayed uman migkabagseg ya pangintu-u nilan, asuntu na kyallekan nilan ya Tyumanem aw migtabang kanilan ya Ispiritu nan.
Ya Manga Pigpan-imo' ni Pédro aw ya Pagpangintu-u la na Manga Héntil
Ya panaw ni Pédro adti lunsud na Lida aw Joppé
32 Na, si Pédro gayed nan piglegeb ya manga pig-eya-an na manga mangintu-uway. Sambuk na allaw pigkadtuwan nan ya manga mangintu-uway na awun ni lunsud na Lida. 33 Dun ni lunsud yan, kyinita' nan ya sambuk na eseg na pigngalanan na si Éniyas. Si Éniyas, wala' sakanan pakapanaw seled na walungka͡umay kay nyapulid saba sakanan. 34 Aw miglong si Pédro kanan, “Kay Éniyas, pagbangun kaw aw luluna ya kamen mu, kay pigguli' da ni Jisus Kristu ya kanmu magkedel.” Aw nyaksay si Éniyas migbangun. 35 Pagkita' na kadég na utaw dun ni Lida aw adti kalatagan na Syaron na kyaguli-an da si Éniyas, nyangintu-u la silan uman kan Jisus.
36 Na, adti lunsud na Joppé nyeya' ya sambuk na ka͡ubayan na nyangintu-u na pigngalanan na si Tabita. Ya ngalan nan adti tingeg na Grigo, si Dorkas, aw ya kakawasan nan: latyanan. Madég ya pigpan-imo' nan na madyaw aw gayed migtabang sa manga utaw na wala' ya pagkamangan nilan. 37 Sa kenne' pa ni Pédro adti Lida, kyedelan si Tabita aw to-o kyatigda-an, aw nyatay da beg. Pig-ugasan na manga ubaybay nan ya kanan lawas kay yan ya katanem nilan, aw pigpakulang nilan dun ni tambi' adti kadwa na kansad na balay nan. 38 Na, wala' pag-iyawat ya lunsud na Joppé aw Lida. * Aw pagdengeg na manga mangintu-uway dun ni Joppé na adtu pa si Pédro ni Lida, pigsugu' nilan ya duwa ya eseg na un mangay kanan. Aw nyanginayu' silan kanan, long nilan, “Panamal kaw beg adti kanami!”
39 Aw nyaksay si Pédro nyindeg aw nyagad kanilan. Pagdateng nilan dun ni balay, pig-alladan si Pédro adti tas. Pagseled nan sa tambi' na kyakulangan na lawas ni Tabita, kyinita' nan ya manga utaw na mig-adung. Aw piglibedan sakanan na manga balu na alag migpansugaw, aw pigpakita' nilan kanan ya manga kadégkadég na pigté' ni Dorkas sa utaw pa sakanan.
40 Aw pigpaluwa' silan ni Pédro adti tambi'. Aw lyumuhud sakanan aw panawagtawag adti Tyumanem. Aw tigkas yan, pig-asdangan nan ya lawas ni Tabita aw long nan, “Kay Tabita, pagbangun kaw!” Aw tigkan nan pigbeka' ya mata nan. Pagkita' nan kan Pédro, dayaw sakanan nyingkud. 41 Pig-awidan ni Pédro ya taklayan nan aw pigpa-indeg nan.
Tigkas yan, pigpaseled ni Pédro ya manga balu aw eped na mangintu-uway, aw pigpakita' nan kanilan na nyataw da si Tabita. 42 Aw nyabekkal ya ubat-ubat kan Tabita adti kadakula' na lunsud na Joppé, aw yan ya syampetan nan na madég ya utaw na nyangintu-u la kan Jisus. 43 Aw si Pédro, nyeya' pa dun ni Joppé seled na madég na allaw, adti balay na sambuk na eseg na mag-imo-ay sa pametang lekat adti kindal na ayep. Aw ya utaw yan pigngalanan uman na si Simon.