8
Ya pagsabug na manga mangintu-uway adti Judiya aw Samariya
1-3 Aw nyakabantay si Saulo sa kadég na nya-imo' aw tyumande' sa manga utaw na migpatay kan Éstéban. Manang awun manga eseg dun na masalig to-o ya pagpangintu-u nilan aw pigbetang nilan ya lawas ni Éstéban adti ilib na palangad lebenganan. Aw to-o silan migmatay aw migpansugaw.
Aw dun ni allaw yan, migpalekat ya dakula' na pagpamulayam sa manga utaw na nyangintu-u kan Jisus dun ni Jérusalim, aw si Saulo nyatibulluk ya ginawa nan na apnasen ya kadég nilan. Pigpanseled ni Saulo ya manga balay na manga mangintu-uway aw pyandakep nan ya manga eseg aw ka͡ubayan aw pigpakalabusu nan silan. Aw yan ya syampetan nan, madég ya mangintu-uway na migtagisun nyamalaguy adti kadakula' na probinsiya na Judiya aw adti banwa na Samariya. Yan dakman olo' ya nyasama' kanilan dun ni Jérusalim ya manga apostolés.
Ya pag-ubat-ubat ni Pilipi adti Samariya
4 Na, ya manga mangintu-uway na nyampalaguy lekat adti Jérusalim, migpanlegeb da silan sa manga banwa na dyatengan nilan, aw gayed nilan pigpa-ede' adti manga utaw ya madyaw na ubat-ubat kan Jisus. 5 Ya sambuk kanilan, yan si Pilipi. Aw tyumubang si Pilipi adti sambuk na lunsud dun ni banwa na Samariya aw pig-ubat-ubat nan kanilan na si Jisus yan ya Kristu na pigpadala na Tyumanem. 6 Pagdengeg da na madég na utaw sa pig-ubat-ubat nan, aw pagkita' nilan sa manga mangkadyaw na pangilala na pig-imo' nan magi sa katulus na Tyumanem, dayaw nilan pyakanyegan ya piglong nan kanilan. 7 Kay ya manga malipa' na ispiritu na syumeled adti manga utaw idtu muna, lyumuwa' da adti kanilan na to-o mig-ulangag. Aw kyaguli-an da ya madég na pulid aw manga kapig. 8 Yanagaw migleya to-o ya manga utaw adti lunsud yan.
Si Simon na anituwan
9 Na, dun ni lunsud yan, awun anituwan na pigngalanan na si Simon. Aw madugay da nya-eneng-eneng ya manga utaw dun ni kadakula' na Samariya sa pigpan-imo' nan na dadela͡en, aw yanagaw migpalibantug sakanan sa pagka-utawun nan. 10 Aw idtu muna, alag migpakanyeg kanan ya manga utaw, dala ya tagitu' aw ya mangkalangkaw. Aw gayed silan miglong, “Ya utaw yeiy, katulus saba na Tyumanem na pigngalanan na To-o Matulus.” 11 Aw asuntu na madugay da silan nya-eneng-eneng sa manga dadela͡en na pig-imo' nan, gayed nilan pyakanyegan ya kanan palna-u.
12 Manang pagdateng da ni Pilipi dun ni Samariya, pigpa-ede' nan ya madyaw na ubat-ubat sa paghari' na Tyumanem aw kan Jisus na yan ya Kristu, aw nyangintu-u la ya madég na utaw sa piglong nan. Aw pigba͡utismuwan ya manga eseg aw manga ka͡ubayan. 13 Pangkay si Simon uman nyangintu-u la. Aw pagkatigkas sakanan ba͡utismuwan, nyagad kan Pilipi aw kyinita' nan ya manga mangkadyaw na pangilala aw manga pigpan-imo' na mabatug olo' magi sa katulus na Tyumanem, aw to-o si Simon nya-eneng-eneng.
14 Na, ya manga apostolés na awun ni Jérusalim, dyengeg nilan na dyawat na madég na utaw adti banwa na Samariya ya ubat-ubat kan Jisus na lekat adti Tyumanem. Yanagaw pigsugu' nilan adtu si Pédro aw si Juan. 15 Pagdateng da nilan dun, nyanawagtawag silan na dumateng galu ya Ispiritu na Tyumanem adti manga utaw na bagu nyangintu-u, 16 kay wala' pa dateng adti kanilan ya Ispiritu pangkay pigba͡utismuwan silan dun ni ngalan ni Jisus na yan ya pangulu. 17 Tigkas yan, pigbetang ni Pédro aw si Juan ya kanilan manga palad adti tas na ulu na tag sambuksambuk na bagu nyangintu-u, aw nyadawat nilan ya Ispiritu na Tyumanem.
18 Aw kyinita' ni Simon na pig-atagan ya manga utaw na Ispiritu na Tyumanem magi sa pagbetang na manga apostolés sa palad nilan adti tas na ulu na utaw. Yanagaw pig-atagan nan galu na kuwalta ya manga apostolés, 19 aw law nan, “Atagi aku uman beg na katulus yeiy pada pangkay singalan ya betangan ku na kanak palad atagan uman na Ispiritu na Tyumanem.”
20 Manang miglong si Pédro kanan, “Maka-eped kanmu ya kuwalta mu masangab adti impirno! Iman mu aw mabatug mu bayadan ya katulus na Ispiritu na Tyumanem, manang beke' na maynan. Kay pig-atag olo' na Tyumanem adti manga utaw na nyangintu-u kanan! 21 Wala' ya labet mu sa imo-unun na pigtaligu na Tyumanem kanami, kay kya-ede-an nan na kenne' pa na kabalukan na anenganeng mu. 22 Yanagaw pagselsel kaw sa malat na pigpalpa mu. Aw panginayu' kaw adti Tyumanem pagaw kallatan kaw nan aw dili' da kaw pa-emel-emelen asuntu sa anenganeng mu na baluk. 23 Kay kyinita' ku na to-o kaw nyinga' kanami aw kyaliputan da kaw dun ni imo-unun na malatay.”
24 Aw tyumubag si Simon kanilan, “Wettay! Panginayu' kamu beg kanake' adti Tyumanem na dili' dumateng adti kanak ya pangkay sambuk na piglong mayu.”
25 Aw migpadeleg si Pédro aw si Juan migpa-ede' adti madég na utaw dun ni Samariya sa ubat-ubat kan Kristu na lekat adti tingeg na Tyumanem aw ya manga kyinita' nilan adti kan Jisus idtu muna. Pagkatigkas yan, syuminan da silan adti Jérusalim. Aw sagwa silan nyanaw, nyapit silan adti madég na kabalayan aw pigpa-ede' nilan adti manga taga Samariya ya palna-u kan Kristu na lekat adti tingeg na Tyumanem.
Si Pilipi aw ya utaw na taga Étiyopiya
26 Manang si Pilipi, pigsugu' sakanan na anghil na Tyumanem, law nan, “Pagsaka la na sega, pagtagilan kaw aw panaw kaw adti dalan lekat adti Jérusalim pasinan ni Gasa.” yeiy ya dalan na nyagi adti kaligbinan. 27-28 Yanagaw nyindeg si Pilipi aw nyanaw dun ni dalan yan, aw kyinita' nan adti mawatawat ya sambuk na eseg na taga Étiyopiya. Na, ya utaw yan, pagsaligan ni Candasi na rayna na nasud na Étiyopiya, aw trisuriro sakanan sa kadakula' na ka-unan aw kuwalta nan. Tolobo sakanan nyuli' lekat adti Jérusalim kay abus da pagsimba dun sa Tyumanem. Nyingkud dun ni kalisa nan aw pigbasa nan ya liblu na pigsulat na propita na si Isayas asini muna. 29 Aw miglong ya Ispiritu na Tyumanem adti ginawa ni Pilipi, law nan, “Apit kaw dun ni kalisa!”
30 Yanagaw dyumalagan si Pilipi pasinan adti kalisa, aw dyengeg nan ya pagbasa na utaw yan na lekat adti pigsulat ni Isayas. Aw nyusip si Pilipi kanan, “Unu, kay Léw, kyalabetan mu ya puntu na pigbasa mu yan?”
31 Aw tyumubag ya pagsaligan na taga Étiyopiya, law nan, “Wala' ku kalabeti. Unun ku ya pagpakalabet kun wala' ya utaw na magpalna-u kanak?” Aw pigsekat nan kan Pilipi na sumakay adti kalisa nan. 32 Na, yan ya pigbasa nan:
“Siling na karniro na un tumba͡en,
aw siling uman na ise' na karniro na un da gupitan,
wala' ya tingeg na piglong nan.
33 Pigmulamula sakanan na manga utaw,
aw dili' matinaw ya pag-ukum nilan kanan.
Singan ka' ya un magtultul sa manga buwadbuwad nan adti moli na allaw?
Kay kyamangan sakanan sa ginawa asini tas na lupa'.” *
34 Aw miglong ya pagsaligan kan Pilipi, “Paglonga kanak. Singalan utawa ya pigsulat na propita na si Isayas? Ya kanan pagka-utawun aw kun eped na utaw?” 35 Aw migpalekat si Pilipi mig-ubat-ubat kanan, lekat adti pigsulat ni Isayas menda' adti kadakula' na madyaw na ubat-ubat kan Jisus.
36 Aw sagwa silan syumakay adti kalisa, dyumateng silan adti tubig, aw miglong ya pagsaligan, “Tengtengi! Awun tubig iyan! Ananga' dili' aku mu ba͡utismuwan adun?”
37 [Aw tyumubag si Pilipi kanan, law nan, “E-e. Kun mangintu-u kaw kan Jisus sa kadakula' na ginawa mu, ba͡utismuwan ta kaw.”
Aw law na pagsaligan, “Nyangintu-u la aku na si Jisus Kristu, yan ya Ise' na Tyumanem.”] 38 Aw pigsugu' nan ya dyumala sa kalisa na un tumeneng. Aw nyanog silan adti kalisa aw tyumala' sa tubig. Aw dun da ni Pilipi ba͡utismuwi ya pagsaligan na taga Étiyopiya.
39 Pagtungngaw nilan lekat adti linaw, tigkan si Pilipi pigkamang na Ispiritu na Tyumanem aw dyala nan adti eped na banwa, aw wala' da na pagsaligan kita-a. Aw migpadeleg ya pagsaligan adti panaw nan na to-o migleya.
40 Aw si Pilipi dun da pakabetang adti lunsud na Asoto. Aw pigpa-ede' nan ya madyaw na ubat-ubat kan Jisus adti manga utaw na nyeya' adti kadég na manga lunsud na pig-agiyan nan pasinan adti syudad na Césariya.