Lukas 7

Ya paglong ni Éstéban adti asdangan na Sanhédrin

¹ Tigkas yan, nyusip kan Éstéban ya pangulu na manga magdadugsu-ay, “Unu, matinaw ya piglong nilan kanmu aw galu'?”

² Aw tyumubag si Éstéban, law nan: “Kay manga kadégan ku na Judiyu aw manga kapatas nami, pakanyegi mayu ya un ku paglongun: Ya Tyumanem na pigdeyen tadun migpakita' adti kanaten tyugbulan na si Abraham talana pa sakanan nyeya' adti banwa na Mésopotamiya sa wala' pa pag-alin adti lunsud na Haran. ³ Miglong ya Tyumanem kanan, ‘Indeg da kaw lekat asini banwa na kya͡utawan mu, aw ayawi ya kanmu manga kadégan, aw pag-alin kaw adti sambuk na banwa na un ku pakita' kanmu.’ ⁴ Yanagaw pig-indegan nan ya banwa na manga utaw na Kaldiyanen aw mig-alin sakanan adti Haran. Aw pagkatigkas na pagkamatay na ama nan, pigpakadi na Tyumanem si Abraham asini banwa na pig-eya-an tadun. ⁵ Idtu na pagdateng nan, wala' pa na Tyumanem bagi-i na lupa' pangkay min na palad. Manang pigpakangan nan si Abraham na atag nan ya lupa' ini adti kanan aw manga buwadbuwad nan, pangkay wala' pa ya ise' nan. ⁶ Aw migpa-ede' ya Tyumanem kanan na ya kanan manga buwadbuwad un ma-imo' dumadayu adti sambuk na banwa, aw un silan allangen aw pamulayaman seled na upatenggatus ya umay. ⁷ Manang miglong pa uman ya Tyumanem kan Abraham, ‘Un ku ukuman ya nasud na mag-allang kanilan. Aw pagkatigkas yan, paluwa-en ku ya buwadbuwad mu lekat adti nasud yan pada liku-an nilan ya lupa' ini aw asini la aku nilan simba͡a.’

⁸ “Aw pigsugu' na Tyumanem si Abraham na pantuli-en ya manga eseg kay yan ya pangilala sa pakang nan kanilan na dayaw mig-iganget. Aw nya͡utaw ya ise' nan na eseg na si Isa-ak, aw paglabay da na walungallaw, pigtuli' ni Abraham ya ise' nan. Aw maynan uman ya pig-imo' ni Isa-ak adti ise' nan na si Jakub, aw maynan uman ya pig-imo' ni Jakub adti sampulu' tag duwa ya ise' nan na eseg na silan ya nya-imo' tyugbulan tadun.

⁹ “Aw ya manga tyugbulan tadun, nyinga' silan sa mangud nilan na si José. Yanagaw piggalin nilan aw pigdala na manga utaw adti nasud na Ihiptu aw nya-imo' sakanan allang. Manang gayed pig-agad-agadan na Tyumanem ¹⁰ aw pigpaluwa' nan lekat adti kadakula' na pamulayam. Aw pig-atagan nan na katadeng kun unu ya madyaw imo-un dun ni allaw na pigpatawag sakanan adti asdangan na pada-un na hari' na Ihiptu. Aw to-o migleya ya pada-un kanan, aw yanagaw pig-imo' nan si José magdumala sa kadakula' na nasud na Ihiptu dala ya ka-epedanan na pada-un.

¹¹ “Na, dyumateng da ya bayil adti banwa na Ihiptu aw adti banwa na Kana-an. Aw migkapelek ya manga utaw dala uman ya tyugbulan tadun dun ni Kana-an. To-o silan migti-is kay wala' ya pagkanen na kyinita' nilan. ¹² Manang pagdengeg ni Jakub na awun trigu adti Ihiptu, pigsugu' nan dun ya manga tyugbulan tadun. Yan ya tagna' na pagsaka nilan. ¹³ Adti kadwa na pagsaka nilan, migpakilala si José adti manga mangkagulang nan, aw pigpa-ede' nan adti pada-un ya pamiliya nan.

¹⁴ “Aw pagkatigkas yan, pigpatawag ni José ya ama nan na si Jakub aw ya kanan kadégan na mabus silan mag-alin adti Ihiptu. Aw ya kadég nilan kapituwan tag lima. ¹⁵ Yanagaw nyanaw san Jakub adti Ihiptu aw dun da silan pag-eya'. Aw yan ya banwa na kyamatayan ni Jakub aw ya kadég na manga ise' nan na nya-imo' tyugbulan tadun. ¹⁶ Paglabay da na madég na umay, ya manga pesa' nilan pigdala adti banwa na Syékim aw pigbetang adti seled na ilib na palangad lebenganan. Yan ya ilib na pigbayadan ni Abraham na bulawan na maputi' asini muna lekat adti buwadbuwad ni Hamor dun ni Syékim.

¹⁷ “Na, pagkalapit da na allaw na tumanen na Tyumanem ya pigpakang nan kan Abraham asini muna, madég da to-o ya manga buwadbuwad nan adti banwa na Ihiptu ¹⁸ menda' na nyingkud da ya sambuk na hari' na wala' nan ka-ede-i ya tabang ni José dun ni Ihiptu asini muna. ¹⁹ Yanagaw gayed sakanan mig-imo' sa manga malat na kapandayan na un magpakalug sa manga tyugbulan tadun. Aw pigleges nan silan na ayawan nilan ya manga ise' na bagu nya͡utaw pada dili' da mataw.

²⁰ “Dun ni manga umay yan, nya͡utaw si Moysis. Aw to-o kyatutukan ya Tyumanem kanan. Seled na tulumbulan pigkalmukan sakanan na ina nan na tagu-tagu' dun ni kanilan balay. ²¹ Pagdateng na allaw na nyaleges silan pig-ayawan ya ise' nilan, pigkamang sakanan na biya' na yan ya ise' na pada-un, aw pig-ipatan nan siling na kanan ise'. ²² Yanagaw si Moysis pigpalna-uwan na manga Ihiptuwanen sa kadakula' na kanilan katanem aw katadeng. Aw madyaw ya dengeg nan asuntu sa katadeng nan maglong aw sa pigpan-imo' nan.

²³ “Pagdateng ni Moysis adti kapatan ya umay nan, nyakabetang adti anenganeng nan ya paglaba' adti manga kadégan nan na buwadbuwad ni Isra-él dun ni Ihiptu, aw kaliman nan tanawun ya pagpakabetang nilan. ²⁴ Aw dun nan kita-a ya sambuk na kadégan nan na pyamulayaman na sambuk na utaw na Ihiptuwanen. Aw pigtabangan ni Moysis ya kadégan nan aw pigpatay nan ya Ihiptuwanen. ²⁵ Na, iman ni Moysis aw kalabetan na manga kadégan nan na Isra-él ya tud nan adti kanilan, na pigpamalli' da sakanan na Tyumanem na un tumabang magpaluwa' kanilan lekat adti pagpamulayam na manga Ihiptuwanen. Manang wala' nilan kalabeti.

²⁶ “Pagkasalut da na allaw, lyumiku' si Moysis adti kadégan nan na Isra-él aw kya-ibwangan nan ya duwa kanilan na migtanam. Aw kalim nan patenengen ya pagtanam nilan, law nan, ‘Kay Léw, ananga' kamu kalaw maglalituway? Alag kamu saba mangkaylug!’

²⁷ “Manang ya eseg na nyanugbuk sa tanam, pigtulud nan si Moysis aw piglongan nan, ‘Singalan ka' ya mig-imo' kanmu kapatas nami? Singan kaw na magbaya-baya' kanami? ²⁸ Unu ka', silingen aku mu na Ihiptuwanen na pigpatay mu kagabi?’ ²⁹ Pagdengeg ni Moysis sa piglong nan, nyaksay nyanaw lekat adti Ihiptu aw dyumayu adti banwa na Midiyan. Aw dun da sakanan pangugnan, aw dun da uman ka͡utaw ya duwa ya ise' nan na eseg.

³⁰ “Paglabay da na kapatan ya umay, awun anghil na migpakita' kanan adti kaligbinan na kabuntudan na Sinay. Migpakita' kanan dun ni tagbi' na kawuy na lyumaga. ³¹ Aw pagkita' ni Moysis, to-o sakanan nyabelengbeleng. Aw pagpalapit nan adti kawuy na un nan tanawun, awun dyengeg nan na tingeg na lekat adti Tyumanem, ³² ‘Aku saba ya Tyumanem na pigpangintu-uwan na tyugbulan mayu na si Abraham aw si Isa-ak aw si Jakub.’ Pagdengeg ni Moysis sa tingeg nan, to-o sakanan migteneb aw tyakigan aw wala' paka-eles inunu. ³³ Aw miglong ya Tyumanem kanan, ‘Luwasa ya sandal mu, kay ya lupa' ini na pig-indegan mu, yeiy ya lupa' na pigpamalli' da ku na un pagdeyenan kanak. ³⁴ Kyinita' ku saba ya pagpakalat sa manga utaw ku adti nasud na Ihiptu, aw dyengeg ku uman ya pag-agele nilan. Aw nyanog aku lekat adti tas na langit kay un ku silan bawi-en lekat adti pagpamulayam na manga Ihiptuwanen. Yanagaw un ta kaw sugu-un adti Ihiptu.’

³⁵ “Si Moysis yeiy, pigkele͡an na manga tyugbulan tadun aw miglong silan, ‘Singalan ya mig-imo' kanmu kapatas nami? Singalan kaw na magbaya-baya' kanami?’ Manang yeiy baling na utaw ya pigsugu' na Tyumanem aw pig-imo' nan kanilan kapatas, aw yeiy ya migpaluwa' kanilan lekat adti manga Ihiptuwanen magi sa anghil na Tyumanem na migpakita' kanan dun ni tagbi' na kawuy na lyumaga. ³⁶ Aw si Moysis ya miggagad sa manga tyugbulan tadun lekat adti banwa na Ihiptu, manang sa wala' pa silan indeg, madég ya pangilala na pigpakita' nan magi sa katulus na Tyumanem dun ni banwa yan aw adti Dagat na Mapula, aw adtu uman ni kaligbinan na alag laganasen seled na kapatan ya umay. ³⁷ Aw si Moysis saba ya miglong adti manga buwadbuwad ni Isra-él, law nan, ‘Un pa magpadala ya Tyumanem adti kamayu sa sambuk na propita siling kanak na lumekat adti buwadbuwad ni Isra-él.’ ³⁸ Aw yeiy ya awun ni katipun na manga buwadbuwad ni Isra-él asini muna adti kaligbinan, eped na sambuk na anghil na miglong kanan dun ni tas na buntud na Sinay, eped uman na manga tyugbulan tadun na dyumawat adti Tyumanem sa Uldin na nyatag sa ginawa, aw ya Uldin pig-ayawan nilan sa kadég tadun. ³⁹ Manang ya tyugbulan tadun, dili' silan malim ma͡agad kanan, aw yan ya gayed nilan baling pig-anenganeng ya katanem na manga taga Ihiptu aw ya pag-eya' nilan dun idtu muna. ⁴⁰ Yanagaw miglong silan kan Aaron, ‘Imo-i kami sa manga tyumanem na un maggagad kanami, kay wala' da nami ka-ede-i kun ayin da adun ya utaw yan na si Moysis na miggagad kanami lekat adti Ihiptu.’ ⁴¹ Aw mig-imo' silan sa inutaw na siling na ise' na baka, aw pigdugsu-an nilan ya inutaw aw pig-imo-an nilan sa pista kay kyatutukan silan sa inimo-an na kanilan manga tullu'.

⁴² “Yanagaw pigpabaya-an da silan na Tyumanem na magsimba sa sega aw bulan aw manga bitun. Aw ya kanilan bet pigsulat adti liblu na manga propita:

‘Kamu na buwadbuwad ni Isra-él,

seled na kapatan ya umay miglegeblegeb kamu adti kaligbinan,

aw migpatay kamu sa madég na manga ayep

aw pigdugsu' mayu ya manga lawas nilan,

manang beke' ku baling ya pigdugsu-an mayu.

⁴³ Aw yan saba ya gayed mayu pigsidala ya layaglayag na inabelan na yan ya pag-eya-an na sambuk na inutaw mayu na si Molok.

Aw pigdala mayu uman ya inutaw na bitun na pigngalanan mayu na Répan.

Aw yeiy ya pig-imo' mayu manga tyumanem na galu' na un mayu simba͡en.

Yanagaw un ta kamu alilinan apit adti tadtu na banwa na Babiloniya.’

⁴⁴ “Na, ya tyugbulan tadun asini muna, mig-imo' silan uman sa Tabirnakulu na yan ya palangad pag-eya-an na tengteng Tyumanem dun ni kaligbinan. Aw dun ni pag-imo' nilan, dayaw nilan dyalug ya pigpakita' na Tyumanem kan Moysis kun unu ya giya na Tabirnakulu. ⁴⁵ Aw pig-ayawan nilan ya Tabirnakulu adti kanilan manga buwadbuwad, aw pigsidala uman nilan menda' sa paggagad ni Joswé kanilan adti banwa na Kana-an na yan ya kanilan dyatengan. Aw dun ni manga allaw yan, pig-alilinan na Tyumanem ya manga muna utaw na nyeya' asini banwa ini. Aw nyatagtun na manga tyugbulan tadun ya lupa' yeiy, aw asini la ni banwa tadun ya Tabirnakulu taman na manga allaw na paghari' ni Dabid. ⁴⁶ Aw kyatutukan ya Tyumanem kan Dabid, aw migsekat si Dabid na tumbay kanan ya pagtulluk sa dakula' na eya-anan na Tyumanem asini tas na lupa' na un pagsimba͡an na manga buwadbuwad ni Jakub kanan. ⁴⁷ Manang si Solomon baling ya pigtumbay na Tyumanem na un magtulluk sa balay nan.

⁴⁸ “Manang ya Tyumanem na To-o Matas, dili' mabatug na meya' sakanan adti balay na pig-imo' na utaw, siling na pigsulat na propita asini muna, law na Tyumanem,

⁴⁹ ‘Ya adti tas na langit, yan ya trono sa paghari' ku,

aw ya lupa', yan ya pagkatandayan na siki ku.

Unu pa balaya ya un mayu imo-un kanak?

Aw ayin aku na banwa paglagdeng?

⁵⁰ Unu ka', beke' ku ya mig-imo' sa kadég yeiy?’ ”

⁵¹ Aw miglong pa si Éstéban dun ni asdangan na Sanhédrin,

“Kamu kalaw ya utaw na to-o mangkategel ya ulu. Siling kamu na manga Héntil kay wala' ya kalim mayu mangintu-u sa Tyumanem, aw gayed mayu pigtampeng ya manga talinga mayu pada dili' kamu makadengeg sa tingeg nan! Gayed kamu nyatu sa Ispiritu na Tyumanem siling na tyugbulan mayu asini muna. ⁵² Nyabus pyamulayaman na kamayu tyugbulan ya manga propita! Aw pigpatay nilan ya manga mig-ubat-ubat dadan sa pagkadi na sambuk na wala' ya sala'! Aw ya sambuk yeiy, dyumateng da, manang pigtumbay da mayu baling adti manga po-on nan aw kamu saba ya migpapatay kanan! ⁵³ Aw pangkay kamu ya nyakatagtun sa Uldin na pig-atag na Tyumanem magi sa manga anghil asini muna, manang wala' mayu baling pagbetangan sa ginawa ya pagdalug sa Uldin.”

⁵⁴ Pagdengeg na manga utaw na Sanhédrin sa kadakula' na piglong ni Éstéban, to-o silan syumulu aw nyampanguliteb ya untu nilan. ⁵⁵ Manang si Éstéban nyatmu' na Ispiritu na Tyumanem, aw lyumangad sakanan adti langit aw pigkita' nan ya kalalamdag na katulus na Tyumanem aw si Jisus na nyindeg apit adti kalintu nan. ⁵⁶ Aw law nan, “Wettay, inunuwa! Nyabeka' da ya langit. Kyinita' da ku ya Ise' na utaw na nyindeg apit adti kalintu na Tyumanem!”

⁵⁷ Manang pigsengseng na manga utaw na Sanhédrin ya manga talinga nilan aw migpangkawayit silan, kay dili' silan malim magpakanyeg sa piglong nan. Tigkas yan, pig-ugmunan nilan, ⁵⁸ aw piggakgak nilan adti luwa' na syudad aw pigbadasan nilan na babintu. Aw ya manga utaw na migmatinaw sa galu' adti kan Éstéban, pigtaligu nilan ya kanilan manga sa-ul adti sambuk na bata' na pigngalanan na si Saulo, aw silan ya nyuna nyintu kan Éstéban.

⁵⁹ Talana pa nilan si Éstéban pyamintu, migtatawag sakanan adti Tyumanem, law nan, “We Jisus na kanak pangulu, dawata beg ya ispiritu ku!” ⁶⁰ Tigkas yan, lyumuhud si Éstéban adti lupa' aw mig-ulangag, law nan, “Kay Pangulu, dili' mu beg silan pagpa-emel-emelen asuntu sa pig-imo' nilan yeiy.” Aw pagkatigkas nan maglong, nyapalos ya ginawa nan.