6
Ya Pagkadég na Manga Mangintu-uway na Manga Judiyu
Ya pagpamalli' sa pitu ya dyakono
1 Dun ni manga allaw yan, gayed kyadugangan ya manga utaw na nyangintu-u kan Jisus. Na, ya manga mangintu-uway na Judiyu wala' pagsambuka, kay ya eped kanilan miglong sa tingeg na Grigo aw ya eped miglong sa tingeg na manga utaw na Hibriyu. Aw kada allaw, awun pagpan-atag na tabang adti manga ka͡ubayan na nyabalu. Manang ya manga Judiyu na miglong sa tingeg na Grigo, migdiklamu silan kay kyalabayan baling ya kanilan manga balu. 2 Yanagaw pagdengeg na sampulu' tag duwa ya apostolés sa diklamu nilan, pigtipun nilan ya kadég na mangintu-uway na awun ni Jérusalim. Aw miglong ya manga apostolés, law nilan, “Dili' madyaw kun masalang ya pag-ubat-ubat nami sa tingeg na Tyumanem asuntu sa pag-atag-atag nami sa tabang. 3 Yanagaw, kay manga inulug, pamalli' kamu adti eped mayu sa pitu ya eseg na un tadun taliguwan sa manga imo-unun yeiy. Yan galu ya pamalli-en mayu ya madyaw ya dengeg adti eped na utaw aw nyatmu' na Ispiritu na Tyumanem aw nyatmu' uman na katadeng sa unu ya madyaw imo-un. 4 Manang ya kanami, un nami tibullukun ya kanami anenganeng adti pagpanawagtawag sa Tyumanem aw pag-ubat-ubat sa kanan tingeg.”
5 Pagdengeg na manga mangintu-uway sa palpa na manga apostolés, kyatutukan ya kadég nilan. Yanagaw pigpamalli' nilan si Éstéban na to-o masalig ya pagpangintu-u nan aw nyatmu' na Ispiritu na Tyumanem, aw si Pilipi, aw si Prokoro, aw si Nicanor, aw si Timon, aw si Parménas, aw si Nikolas. Na, si Nikolas taga syudad na Antiyokiya aw beke' sakanan na Judiyu manang nyagagad asini muna adti katanem na manga Judiyu aw uldin nilan. 6 Ya pitu na pigpamalli' da, pigpa-indeg silan adti asdangan na manga apostolés. Aw pigbetang na manga apostolés ya palad nilan adti tas na ulu na pitu yeiy aw pyanawagtawagan nilan adti Tyumanem na tabangan nan silan sa kanilan manga imo-unun.
7 Aw gayed mig-ubat-ubat ya manga mangintu-uway sa tingeg na Tyumanem. Aw to-o kyadugangan ya manga nyangintu-u kan Jisus dun ni Jérusalim. Aw madég uman ya manga magdadugsu-ay adti Témplo na nyagagad aw nyangintu-u la.
Ya paglimanda kan Éstéban
8 Aw si Éstéban, pigpakadyaw na Tyumanem aw pig-atagan nan na katulus aw yanagaw mig-imo' sakanan sa madég na pangilala na to-o mangkadyaw dun ni manga utaw na Judiyu. 9 Manang awun manga syumungsung sa palna-u nan. Judiyu silan na migkatipun adti Sinagoga na manga Libértino,* dala ya manga utaw lekat adti manga syudad na Ciréné aw Aléksandriya, aw manga probinsiya na Ciliciya aw Asia. Aw migpalekat silan mig-ayil kan Éstéban. 10 Manang tyumabang kanan ya Ispiritu na Tyumanem kun unu ya madyaw nan tubag kanilan, aw wala' silan paka-atu kanan.
11 Yanagaw tyumandan silan na tagu-tagu' sa manga eseg na un magmatinaw sa galu' adti paglimanda kan Éstéban. Aw pyamene-an nilan na yan ya un nilan paglongun dun ni asdangan na Sanhédrin: “Dyengeg nami ya piglong nan na malat kan Moysis aw sa Tyumanem.”
12 Yanagaw pigsutsutan nilan ya manga utaw aw ya mangkalangkaw na manga Judiyu aw ya manga talaglawung, aw kyadtuwan nilan alag si Éstéban aw pig-ugmunan nilan aw piggakgak adti asdangan na Sanhédrin. 13 Aw ya manga utaw na dyumawat sa kuwalta na tagu-tagu', silan ya migmatinaw sa galu', law nilan, “Ya utaw ini, gayed nan pigkasampetan na malatay ya Témplo na Tyumanem aw ya uldin tadun. 14 Kay dyengeg nami ya piglong nan na si Jisus na taga Nasarit, un nan kunu kalaten ya kadakula' na Témplo ini aw un nan sayuwan ya manga katanem na pig-atag ni Moysis adti manga tyugbulan tadun asini muna.” 15 Aw ya kadég na manga utaw na Sanhédrin, sa pag-inunu nilan, nya-uman ya giya ni Éstéban, iman mu aw giya na anghil.