Lukas 5

Si Ananiyas aw si Sapira nya-imo' malat na pundinganan

¹ Manang awun sambuk uman na eseg na si Ananiyas aw ya ka͡ubayan nan na si Sapira na miggalin sa sangutud na lupa' nilan, ² aw migsambuk ya ginawa nilan na dili' nilan ubusun atag ya eleg, aw yanagaw pigtagu' nilan ya eped, aw ya sobla yan ya pigbetang ni Ananiyas adti asdangan na manga apostolés.

³ Manang miglong si Pédro kanan, “Kay Ananiyas, ananga' pig-atmu' ni Satanas ya kanmu anenganeng na piggalu-an mu ya Ispiritu na Tyumanem? Kay yan ya piglong mu na yeiy da ya kadakula' na eleg lekat adti paggalin sa lupa', manang awun pigtagu' mu baling. ⁴ Idtu muna ikaw ya tyumagtun sa lupa' mu, aw kun galinen da mu, ikaw ya magbaya' kun unun mu ya kuwalta na eleg nan. Manang yan baling ya pagbaya' mu ya paggalu'. Paglongun ta kaw: Beke' saba na utaw ya piggalu-an mu, manang yan ya tengteng piggalu-an mu ya Tyumanem!”

^5-6 Pagdengeg ni Ananiyas sa piglong ni Pédro, tigkan sakanan nyatuwad adti lupa' aw nyabugtu' ya ginawa nan. Aw dyumateng ya manga bata', aw pigputus nilan ya lawas nan aw dyala adti palangad lebenganan. Aw dakula' to-o ya kakallekan na kadég na manga mangintu-uway na dyumengeg sa kyagamakan nan.

⁷ Na, lyumabay da ya manga tulung ka udas aw nyaka-ibwang uman ya ka͡ubayan ni Ananiyas. Aw wala' nan ka-ede-i kun unu ya kyagamakan na eseg nan. ⁸ Aw miglong si Pédro kanan, “Kay Sapira, ubatan beg kanami. Unu ka', yeiy da ya eleg na lupa' mayu?”

Aw tyumubag si Sapira, “E-e, yan da ya eleg nan.”

⁹ Tigkas yan, miglong si Pédro, “Ananga' migsambuk ya anenganeng mayu ya eseg mu na un mayu tanda-en ya Ispiritu na Tyumanem? Inunuwa! Iyan da ya manga bata' na bagu pa miglebeng sa eseg mu. Aw maynan uman ya kagamakan mu.”

¹⁰ Aw tigkan nyatuwad da uman si Sapira dun ni asdangan ni Pédro aw nyabugtu' ya ginawa nan. Aw pagdateng da na manga bata', kyinita' nilan na nyatay da. Aw uman da nilan pigdala adti lebenganan, aw pigbetang nilan dun ni tampid na eseg nan. ¹¹ Aw to-o la kyadugangan ya kakallekan na kadég na manga mangintu-uway aw ya kadég na dyumengeg sa kyagamakan nilan.

Ya pigpan-imo' na manga apostolés adti Témplo

^12-14 Na, madég ya manga eseg aw madég uman ya manga ka͡ubayan na bagu nyangintu-u kan Jisus aw gayed migsambuk ya kadég nilan adti Portiko ni Solomon dun ni pamanag na Témplo. Ya manga utaw na wala' pa pangintu-u wala' paka-eles kanilan sumambuk manang pigbasa͡an nilan ya manga mangintu-uway. Aw kyinita' da na manga utaw ya madég na mangkadyaw na pangilala na pigpan-imo' na manga apostolés magi sa katulus na Tyumanem, aw nya-eneng-eneng silan. ¹⁵ Yanagaw ya kadég na pyangkedelan pigpandala adti manga tabu-an aw pigpakulang dun ni manga kulanganan aw kamen nilan. Kay yan ya pig-iman nilan na kun lumabay dun si Pédro pagaw kalandungan silan na alung nan aw kaguli-an da silan. ¹⁶ Aw dyumulud uman adti manga apostolés ya madég to-o na manga utaw lekat adti manga balyo na nyakapalibed sa syudad na Jérusalim. Aw dyala nilan uman ya manga pyangkedelan aw ya manga utaw na pyamulayaman na manga malipa' na ispiritu. Aw nyabus silan pyangkaguli-an.

Ya pagpamulayam sa manga apostolés

¹⁷ Na, ya pangulu na manga magdadugsu-ay adti Témplo na Tyumanem aw manga eped nan na nyaka-akup adti partido na manga Sadusiyo, pagkita' da nilan sa pigpan-imo' na manga apostolés, to-o silan nyinga'. ¹⁸ Yanagaw pigpadakep nilan ya manga apostolés aw pigpaseled adti kalabusuwanan na syudad. ¹⁹ Manang yan na gabi, dyumateng ya sambuk na anghil na Tyumanem aw pig-uwangan nan ya manga tatakep na kalabusuwanan, aw pigpa-agad nan ya manga apostolés adti luwa', aw law nan, ²⁰ “Na, kadtu kamu ni pamanag na Témplo aw dayaw mayu palna-uwan ya manga utaw sa bagu na ginawa na pig-atag na Tyumanem.”

²¹ Pagdengeg nilan sa pamene' na anghil, lyumiku' silan adti pamanag na Témplo na nyamayapaya la ya banwa, aw migpalekat silan migpalna-u sa manga utaw dun.

Na, pagdateng adti Témplo na pangulu na manga magdadugsu-ay aw ya manga eped nan, pigpatawag nilan ya kadég na utaw na Sanhédrin na yan ya manga mangkalangkaw na manga utaw na Judiyu. Aw pigsugu' nilan ya manga magtatunggu-ay sa Témplo na angayen ya manga apostolés lekat adti kalabusuwanan. ²² Manang pagdateng da nilan adti kalabusuwanan, wala' da dun ya manga apostolés. Yanagaw lyumiku' silan adti Sanhédrin aw pig-ubatan nilan ya kadég, law nilan, ²³ “Kyinita' nami na dayaw pigbalagsangan ya manga tatakep na kalabusuwanan aw kenne' pa na manga magtatunggu-ay dun ni luwa', manang pag-uwang da nami, wala' ya utaw dun ni seled!”

²⁴ Na, pagdengeg da na kapitan na manga magtatunggu-ay sa Témplo aw manga mangkatas na manga magdadugsu-ay sa pig-ubat nilan, to-o nyangkabélét ya anenganeng nilan aw wan yeiy ya un sampetan na kadég yeiy.

²⁵ Aw tigkas yan, awun utaw na dyumateng aw miglong kanilan, “Tanawa! Ya manga eseg na pigpakalabusu mayu, awun saba silan ni pamanag na Témplo! Migpalna-u baling silan sa manga utaw!” ²⁶ Yanagaw nyagad ya kapitan sa manga magtatunggu-ay aw pig-angay nilan ya manga apostolés, manang wala' nilan legesa kay nyallek silan pagaw pamintuwun silan na manga utaw.

²⁷ Pagdateng da nilan adti asdangan na Sanhédrin, piglongan na pangulu na manga magdadugsu-ay ya manga apostolés, ²⁸ law nan, “Pigpigil da nami kamayu na dili' kamu magpalna-u dun ni ngalan yan, manang inunuwa ya pig-imo' mayu! To-o la baling dyengeg adti kadakula' na Jérusalim ya pigpalna-u mayu! Aw pigbetang da mayu adti ginawa mayu na pasala-en kami sa pagpatay sa utaw yan!”

²⁹ Manang tyumubag kanilan si Pédro aw ya eped na manga apostolés, law nilan, “Ya Tyumanem, yan ya tengteng pagka͡agadan nami, aw beke' na utaw. ³⁰ Kay ya Tyumanem na pyangintu-uwan na tyugbulan tadun, yan ya migmataw kan Jisus na pigpatay mayu magi sa pagkalabu adti krus. ³¹ Aw si Jisus ya pigpakatas na Tyumanem aw pigpa-ingkud nan adti kalintu nan na un magdumala sa kadég, siling na principé, aw si Jisus ya pig-imo' nan Magpaluwa-ay sa kadég na buwadbuwad ni Isra-él. Aw yan ya du-an nan na magselsel galu silan sa manga sala' nilan aw ayawan ya manga pigpan-imo' nilan na malatay. Aw dun da nan lanasa ya manga sala' nilan. ³² Aw sistigus kami sa kadég yeiy na nyangka-imo', aw pigmatinaw da uman na Ispiritu na pig-atag da na Tyumanem adti kadég na utaw na dyumalug sa manga sugu' nan.”

³³ Pagdengeg na manga eseg dun ni Sanhédrin sa tubag nilan, to-o silan syumulu aw pigbetang nilan adti kanilan ginawa na patayen ya manga apostolés. ³⁴ Manang nyindeg dun ya sambuk kanilan na si Gamaliyél. Na, Parisiyo sakanan aw magpalna-uway sa uldin na manga Judiyu, aw pigsaya' na kadég nilan. Aw syumugu' sakanan na pa-agad ya manga apostolés dagawdagaw adti luwa' na usayanan. ³⁵ Aw miglong si Gamaliyél adti manga eped nan dun ni Sanhédrin, law nan, “Kay manga inulug na buwadbuwad ni Isra-él, dili' tadun gallaten ya un tadun imo-un sa manga utaw yeiy. ³⁶ Kya-anenganengan mayu na idtu muna awun sambuk na eseg na si Tyudas na migpatastas sa pagka-utawun nan aw mig-imo' sa kasakupan nan na manga upatenggatus ya manga eseg. Manang pigpatay da baling sakanan, aw ya kadég na eped nan nyabus migbeklag aw wala' da ya nyabatug nilan. ³⁷ Aw tigkas yan, si Judas na taga Galiliya nyatu dun ni manga allaw na sénsus, aw mig-imo' uman sa kasakupan nan na madég na utaw. Manang pigpatay da sakanan uman, aw maynan uman migbeklag da ya manga eped nan.

³⁸ “Yanagaw, adun na allaw paglongun ta kamu: Pabaya-i la mayu ya manga eseg yeiy! Paluwa-a la mayu silan. Kay kun ya palna-u nilan lyumekat adti utaw olo', aw kun ya palpa nilan lyumekat adti kanilan anenganeng, dili' magpadeleg. ³⁹ Manang kun lyumekat adti Tyumanem, na, dili' mayu silan katagenan, pagaw ka-atuwan mayu baling ya pagkaliman na Tyumanem!”

Yanagaw tyumande' ya Sanhédrin kan Gamaliyél. ⁴⁰ Aw pigpatawag nilan baling ya manga apostolés adti seled na usayanan, aw byadasan nilan pigpalabet. Tigkas yan, pigpigilan nilan na dili' da salutun ya pagpalna-u dun ni ngalan ni Jisus, aw pigpaluwa' da nilan.

⁴¹ Pag-indeg da na manga apostolés lekat adti asdangan na Sanhédrin, to-o silan migleya kay kya-ede-an nilan na dun ni pagti-is nilan asuntu sa ngalan ni Jisus, nyaka-unawa la silan sa kya-agiyan nan idtu muna. ⁴² Aw kada allaw migpalna-u silan adti pamanag na Témplo aw adti manga balay na mangintu-uway. Aw wala' silan teneng sa pagpalna-u nilan aw sa paglong nilan sa madyaw na ubat-ubat na si Jisus yan ya Kristu.