4
Si Pédro aw si Juan adti asdangan na Sanhédrin *
1 Sa wala' pa katigkas ni Pédro aw si Juan ya pag-ubat-ubat adti manga utaw dun ni pamanag na Témplo, dyumulud adti kanilan ya manga magdadugsu-ay, * aw ya kapitan na manga magtatunggu-ay sa Témplo, aw ya manga Sadusiyo. 2 Aw nyadaman silan to-o kay pigpalna-uwan ni Pédro aw si Juan ya manga utaw aw pig-ubat-ubat nilan ya pagkataw ni Jisus aw ya pagkataw uman na manga utaw lekat adti nyangkamatay. * 3 Yanagaw pigdakep nilan si Pédro aw si Juan. Aw asuntu na gabi la, pigpakalabusu nilan taman na maselem. 4 Manang ya manga utaw na migpakanyeg sa pig-ubat-ubat ni Pédro, madég kanilan ya nyangintu-u. Aw dyumateng da adti manga limmamalalan ya kadég na eseg na nyangintu-u la kan Kristu dun ni Jérusalim. *
5 Na, pagkamaselem da, migkatipun dun ni Jérusalim ya mangkalangkaw na manga Judiyu, dala ya magdadumala͡ay kanilan aw manga talaglawung sa uldin nilan, 6 eped ni Annas na pangulu sa manga magdadugsu-ay, aw ya manga eped na nyaka-akup adti pamiliya nan dala si Kaypas aw si Juan aw si Aléjandro. 7 Pigpa-angay nilan si Pédro aw si Juan aw pigpa-indeg nilan adti asdangan na mag-usayay. Aw pig-usip nilan, “Kanyan ngalan ya dyala mayu na migpaguli' sa utaw na kapig? Ayin lekat ya katulus mayu yan?”
8 Aw si Pédro na nyatmu' na Ispiritu na Tyumanem tyumubag kanilan, law nan, “Kamu na manga migdumala kanami aw kamu na mangkalangkaw na Judiyu, 9 kun usipen mayu kami adun na allaw yeiy sa du-an na pigkallatan nami ya utaw na kapig aw kun pig-unu ya pagpaguli' kanan, 10 na, yeiy ya tubag nami kamayu aw adti kadég na utaw na buwadbuwad ni Isra-él: Ya eseg ini na nyindeg asini asdangan mayu adun na madyaw ya lawas, pigkaguli-an sakanan magi sa katulus na ngalan ni Jisus Kristu na taga Nasarit, na yan ya pigkalabuwan mayu adti krus, manang pigmataw sakanan na Tyumanem lekat adti nyangkamatay. 11 Si Jisus saba ya pigsulat dun ni Salmo na yan ‘ya dakula' na batu na iman na manga panday na wala' ya guna, aw kamu saba ya manga panday yan. Manang yan baling ya batu na dakula' ya katukanan kay yan kadi' ya salig na balay.’* 12 Aw wala' ya eped asini kadakula' na banwa na makapaluwa' kanaten lekat adti pagpa-emel-emel na Tyumanem, aw wala' ya eped na ngalan na pig-atag adti utaw na makapaluwa' kanaten. Kan Jisus olo' ngalan.”
13 Na, kyinita' da na manga mangkalangkaw na manga Judiyu na wala' ya kakallekan ni Pédro aw si Juan miglong kanilan, aw to-o silan nya-eneng-eneng, kay kya-ede-an nilan si Pédro aw si Juan na wala' abay silan pag-iskwila. Aw dun da nilan ka-ede-i na gayed silan duwa nyaka-iyeped kan Jisus idtu muna. 14 Aw pagkita' nilan uman sa eseg na kyaguli-an da dun ni tampid nilan, wala' silan pakapaglong sa malat adti pagpaguli' kanan. 15 Yanagaw pigsugu' nilan na pa-agad si Pédro aw si Juan adti luwa', aw migbalawbalaw ya mag-usayay adti seled, 16 law nilan, “Walan ya imo-un naten kanilan? Kya-ede-an da saba asini Jérusalim ya pig-imo' nilan na dili' mabatug na utaw, aw yanagaw dili' kitadun makabalyaw. 17 Manang pagaw mabekkal adti kadég na utaw ya pig-imo' nilan, naten silan pamene-an na dili' da silan mag-ubat-ubat dun ni ngalan yan adti pangkay singalan utawa.”
18 Yanagaw pigpatawag nilan si Pédro aw si Juan aw pigpigilan nilan na dili' da maglong dun ni ngalan ni Jisus adti manga utaw pangkay sambuk, aw dili' da uman silan magpalna-u sa manga utaw.
19 Manang tyumubag si Pédro aw si Juan kanilan, law nilan, “Ayin ya madyaw adti anenganeng na Tyumanem, kun imo-un nami ya kamayu piglong aw kun tumanen nami ya kanan sugu'? 20 Dili' nami mabatug tagenan ya pag-ubat-ubat adti manga utaw sa pigpan-imo' ni Jisus na pigkita' nami idtu muna aw ya kadég na dyengeg nami adti kanan.”
21-22 Na, ya mangkalangkaw na manga utaw na Judiyu, kya-ede-an nilan na dyeg da silan. Kay kun pa-emel-emelen nilan si Pédro aw si Juan, mangkadaman ya manga utaw na nyakabantay sa pig-imo' nilan. Kay sobla kapatan ya umay na eseg na pigkaguli-an da, aw alag silan migdeyen sa Tyumanem asuntu sa nya-imo' dun. Yanagaw pigpigilan si Pédro aw si Juan na dili' da nilan paglongun ya ngalan ni Jisus adti manga utaw, kay kun padelegen nilan, un silan pa-emel-emelen. Aw tigkas yan, pigpaluwa' silan.
Ya pagpanawagtawag na manga mangintu-uway na pakabagsegen na Tyumanem ya ginawa nilan
23 Pagkatigkas ni Pédro aw si Juan paluwa-en, nyadtu silan ni manga eped nilan na mangintu-uway aw pig-ubat kanilan ya kadég na piglong na manga mangkatas na magdadugsu-ay aw manga mangkalangkaw na Judiyu. 24 Aw pagdengeg da na manga mangintu-uway sa pig-ubat nilan, migsambuk silan nyanawagtawag, law nilan, “We Tyumanem na migdumala sa kadég: Ikaw ya mig-imo' sa langit aw lupa' aw dagat aw ya kadég na tagbanwa nilan. 25 Ikaw ya miglong adti sambuk na tyugbulan nami na si Dabid kay yan ya kanmu sugu-anen. Aw magi sa Ispiritu mu, yeiy ya pigsulat nan:
‘Wan ya du-an na to-o nyadaman ya manga utaw na Héntil?
Aw ya manga buwadbuwad ni Isra-él,
ananga' silan mag-anenganeng sa manga palpa na wala' ya guna?
26 Ya manga hari' na migdumala asini tas na lupa',
migtagilan silan sa tanam,
aw ya manga eped na utaw na migdumala, migkatipun silan
na un nilan atuwan ya Tyumanem
aw ya paghari' na Misiyas na pigpadala nan.’ *
27 Aw yan saba ya nya-imo' idtu muna asini syudad. Si Hérodés Antipas aw si Ponsyo Pilato aw ya manga Héntil aw ya manga utaw na Isra-él, migsambuk silan sa anenganeng na un nilan bantakan ya kanmu sugu-anen na si Jisus na pigpadala mu. 28 Manang asuntu sa katulus mu, yan olo' ya nyabatug nilan ya kanmu pagkaliman. Aw yan baling ya pigpan-imo' nilan ya dadan mu pigpalpa asini muna. 29 Aw adun da, kay Tyumanem, dyengeg mu beg ya kanilan pagpigil kanami aw ya piglong nilan na un nilan pa-emel-emelen ya kadég nami na maglong sa ngalan ni Jisus. Atagan mu beg na kabagseg ya ginawa nami na un maglong sa tingeg mu na wala' ya kakallekan nami. 30 Aw padelega beg ya pagpaguli' sa manga utaw na awun magkedel, aw pag-imo' pa kaw sa manga mangkadyaw na pangilala sa kanmu katulus, magi sa ngalan ni Jisus na kanmu sugu-anen.”
31 Pagkatigkas nilan manawagtawag adti Tyumanem, nya-eyeng ya pigkatipunan nilan, aw nyatmu' ya kadég nilan na Ispiritu nan. Aw miglong silan sa tingeg na Tyumanem na wala' ya kakallekan nilan.
Ya katanem na manga mangintu-uway
32 Na, ya kadég na mangintu-uway dun, migsambuk ya ginawa nilan aw ya anenganeng nilan. Aw gayed silan migtatabangay, aw wala' ya utaw na dyumemet sa kanan manga pametang aw ka-unan pangkay sambuk. 33 Aw ya manga apostolés uman, magi sa katulus na Tyumanem, pigmatinaw nilan na nyataw da lekat adti pagkamatay si Jisus na yan ya pangulu. Aw to-o pig-atagan na Tyumanem ya kadég nilan na kadyawan nan. 34 Ya syampetan nan, wala' ya sambuk na utaw adti kanilan na migkapelek, kay pigtagisun na manga eped nilan ya paggalin sa kanilan lupa' aw balay, aw dyala nilan ya eleg 35 aw pigbetang nilan adti asdangan na manga apostolés. Aw ya kuwalta pig-atped-atped nilan adti mangintu-uway na awun kapelek.
Si Bérnabi nya-imo' madyaw na pundinganan
36 Aw maynan ya pig-imo' ni José na taga pulu' na Cipré. Si José yan ya sambuk na lekat adti buwadbuwad ni Libi, aw pigngalanan sakanan na manga apostolés na si Bérnabi, kay yan ya kakawasan na Bérnabi: utaw na magpakagan sa ginawa na eped na utaw. 37 Awun piggalin nan na kanan lupa' aw ya eleg dyala nan aw pigbetang adti asdangan na manga apostolés.