Lukas 3

Ya pagpaguli' ni Pédro sa kapig

¹ Sambuk na allaw, syuminan si Pédro aw si Juan adti Témplo na manga alas trés na ambung kay yan ya udas na pagpanawagtawag na manga utaw na Judiyu sa Tyumanem. ² Aw pagpamapa la nilan adti Témplo, awun dyumateng na eseg na pigtingga͡an kay kapig sakanan lekat adti pagka͡utaw nan. Na, ya sambuk na manga suwangan dun ni Témplo pigngalanan na Manenggeya. Aw dun nilan betangan ya kapig kada allaw na un sakanan magsekat sa limos adti manga utaw na sumeled adti Témplo. ³ Aw pagkita' nan kan Pédro aw si Juan, migsekat kanilan sa kuwalta. ⁴ Manang pig-inunu nilan ya utaw yan, aw law ni Pédro, “Inunuwa kami!” ⁵ Aw pig-inunu nan silan duwa kay yan ya pig-iman nan na atagan nilan na kuwalta. ⁶ Manang miglong si Pédro, “Wala' ya kuwalta ku, manang ya ini kanak na nyatagtun ku, yan ya un ku atag kanmu. Na! Dun ni ngalan ni Jisus Kristu na taga Nasarit, indeg kaw aw panaw kaw!” ⁷ Aw pig-awidan ni Pédro ya kalintu na bekten nan aw pigpa-indeg nan. Aw tigkan migkabagseg ya siki nan ⁸ aw nyaka-indeg da aw nyanaw, aw nyagad kanilan adti seled na Témplo na gayed mig-ugpasen aw migdeyen sa Tyumanem. ^9-10 Aw kyilala na kadég na manga utaw na yan ya eseg na gayed nyingkud aw nyangilalat dun ni suwangan na Témplo na pigngalanan na Manenggeya. Aw kyinita' nilan na nyakapanaw da sakanan aw migdeyen da sa Tyumanem, aw to-o silan nya-eneng-eneng sa nya-imo' kanan.

¹¹ Wala' kadugay, kyadtuwan ni Pédro aw si Juan ya Portiko ni Solomon, aw wala' pakaluwat kanilan ya eseg na bagu nyakapanaw. Aw migkagallat ya madég na manga utaw migpalapit kanilan kay to-o silan nyabelengbeleng sa kyinita' nilan. ¹² Aw pagkita' ni Pédro sa manga utaw, miglong sakanan kanilan, “Kay manga kadégan ku na buwadbuwad ni Isra-él, ananga' kamu ma-eneng-eneng sa kyinita' mayu? Ananga' gayed kamu nyinunu kanami? Basi iman mayu aw awun katulus nami magpapanaw sa utaw yeiy. Aw pagaw iman mayu aw nyakapanaw da sakanan kay dyalug nami ya uldin na Tyumanem. ¹³ Manang beke' nan! Ya kyinita' mayu kakayna lyumekat saba adti kana Tyumanem. Yan ya Tyumanem na pigpangintu-uwan na manga tyugbulan tadun na si Abraham aw si Isa-ak aw si Jakub. Aw pigpakita' da nan ya pagka Tyumanem na sugu-anen nan na si Jisus. Manang si Jisus yeiy, pigtumbay mayu na un patayen, aw pigkele͡an mayu adti asdangan na gubirnador na si Pilato, pangkay kaliman ni Pilato ya magpaluwa' kanan. ¹⁴ Pigkele͡an mayu kalaw ya pigpadala na Tyumanem na wala' ya sala' pangkay sambuk! Aw pigsekat mayu baling ya pagpaluwa' sa sambuk na utaw na nyakamatay. ¹⁵ Aw pigpapatay mayu ya piglekatan sa ginawa, manang pigmataw baling na Tyumanem lekat adti nyangkamatay, aw sistigus kami na nyataw da sakanan. ¹⁶ Aw ya utaw ini na pigkilala mayu, ya pagpangintu-u nan sa ngalan ni Jisus, yan ya migpakabagseg sa siki nan. Si Jisus saba ya pyangintu-uwan nan aw yan ya nyatag kanan sa kadyaw na lawas nan asini asdangan na kadég mayu.

¹⁷ “Na, kamu na manga kadégan ku, kya-ede-an da ku adun na idtu na pagpapatay mayu kan Jisus, wala' mayu kilala͡a na yan ya pigpadala na Tyumanem. Aw wala' uman sakanan kilala͡a na mangkalangkaw na manga Judiyu na migdumala kamayu. ¹⁸ Manang dun ni pig-imo' mayu kan Jisus, pigtuman na Tyumanem ya pigpa-ede' nan dadan magi sa manga propita nan asini muna na un magti-is ya Kristu aw matay. ¹⁹ Yanagaw pagselsel kamu sa manga sala' mayu aw ka͡agadi mayu ya Tyumanem pada lanasen nan ya manga sala' mayu. Kun imo-un mayu yeiy, un dumateng ya manga allaw na pakaganen na Tyumanem ya ginawa mayu, ²⁰ aw padala pa nan salut asini tas na lupa' ya Kristu na pigtaliguwan nan dadan na un sakanan magdumala kamayu. Aw yan si Jisus. ²¹ Manang nyatingen pa sakanan adun adti tas na langit taman na allaw na baguwun ya kadég na pig-imo' nan asini kadengan, kay pigpa-ede' na Tyumanem dadan adti kanan manga propita na yan ya un nan imo-un.

²² “Miglong si Moysis asini muna adti manga buwadbuwad ni Isra-él, law nan,

‘Un magpadala ya Tyumanem kamayu adti moli na allaw

sa propita siling kanaken.

Aw ya propita yan un lumekat adti buwadbuwad ni Isra-él.

Pakanyegi mayu ya kadég na un nan paglongun.

²³ Aw pangkay singalan ya dili' dumalug sa piglong na propita yeiy,

taniyen sakanan aw patayen.’

²⁴ “Aw si Samwél uman aw ya eped na manga propita na syumayu kanan, mig-ubat-ubat ya kadég nilan asini muna kun unu ya ma-imo' adun na manga allaw yeiy. ²⁵ Aw kitadun saba na Judiyu ya dyumawat adun sa pigpakang na Tyumanem adti tyugbulan tadun asini muna magi sa manga muna propita. Kay miglong ya Tyumanem kan Abraham asini muna, ‘Magi dun ni buwadbuwad mu, dumawat ya kadég na utaw na meya' asini tas na lupa' sa kadyawan.’ ²⁶ Yanagaw pigpadala na Tyumanem asini tas na lupa' ya kanan sugu-anen. Aw kitadun na buwadbuwad ni Isra-él ya muna nan pigpadala͡an, pada tabangan ya tag sambuksambuk kanaten na ayawan tadun ya pag-imo' sa malatay.”