2
Ya pagpadala na Tyumanem sa Ispiritu nan
1 Na, dyumateng da ya Pista na Péntékostés, * aw ya kadég na manga mangintu-uway kan Kristu dun ni Jérusalim, migsambuk silan adti dakula' na balay. 2 Aw tigkan awun dalagunut na lekat adti langit siling na mabandes na samet, aw dyengeg na kadég na utaw adti seled na pigkatipunan nilan. 3 Awun uman migpakita' kanilan na iman mu aw laga na atulun na mig-atped-atped adti tag sambuksambuk kanilan. 4 Aw nyatmu' ya kadég nilan sa Ispiritu na Tyumanem, aw migpalekat silan miglong sa madég na punganan na tingeg na beke' na kanilan tingeg. Nyakapaglong silan sa manga tingeg yeiy magi sa katulus na Ispiritu na pig-atag kanilan na Tyumanem. 5 Na, asuntu sa manga pista, awun madég na utaw na Judiyu * na dadan da dyumateng adti Jérusalim lekat adti madég na nasud kay to-o nyatibulluk ya kanilan ginawa sa pagdalug sa Uldin * na Tyumanem. 6 Pagdengeg nilan sa kawayit lekat adti seled na balay yan, nyaksay silan adti luwa' na balay. Aw nyabelengbeleng silan kay dyengeg na tag sambuksambuk ya kanilan tengteng tingeg, 7 aw to-o silan nya-eneng-eneng. Aw mig-usip-usipay silan, “Wettay, wan yangadi? Ya manga utaw yeiy alag saba silan taga Galiliya! 8 Ananga' silan makapaglong sa kanaten manga tingeg na lekat adti manga banwa na pigka͡utawan tadun? 9 Ya eped kanaten taga Partiya, aw taga Médiya aw taga Élam. Awun eped na lekat adti Mésopotamiya, aw Judiya, aw Capadocia aw Ponto aw Asia, 10 aw Pridya, aw Pampiliya. Awun uman lekat adti Ihiptu, aw lekat adti manga sakup dun ni Libya na malapit adti syudad na Ciréné, aw pangkay manga taga Roma dala ya Judiyu aw manga Héntil na dyumalug da sa Uldin aw katanem na manga Judiyu. 11 Aw ya eped tadun taga Krita aw taga Arabiya. Alag kitadun nyakadengeg sa piglong nilan adti tag sambuksambuk na kanaten tingeg. Aw yan ya pigkasampetan nilan ya to-o mangkadyaw na pigpan-imo' na Tyumanem!” 12 Aw to-o silan nya-eneng-eneng aw nyabelengbeleng sa nya-imo' dun. Aw mig-usip-usipay silan, “Walan ya kakawasan na kadég yeiy?”
13 Manang awun eped kanilan na migsi-odoy-odoy aw law nilan, “Ya manga utaw yan, nyalangulangu silan na inemenen!”
Ya paglong ni Pédro adti manga utaw
14 Manang si Pédro nyindeg eped na sampulu' tagesya' ya apostolés adti asdangan na kadég na manga utaw, aw miglong kanilan sa mabagseg na tingeg. Law nan, “Kay manga kadégan ku na manga Judiyu aw ya kadég mayu na nyeya' asini Jérusalim, tānan ya talinga mayu aw pakanyegi mayu ya un ku paglongun. 15 Ya manga utaw na dyengeg mayu kakayna, iman mayu aw nyalangulangu silan na bino, manang beke' na maynan, kay bagu alas nuwibi pa na maselem! 16 Ya nya-imo' adun na allaw yeiy, dun da katuman ya pigsulat asini muna na propita na si Joél:
17 ‘Yan ya piglong na Tyumanem,
Dun ni manga moli na allaw,
un ku asag ya kanak Ispiritu adti kadég na manga utaw.
Ya manga buwadbuwad mayu na eseg aw bubay,
ubat-ubat nilan ya kanak tingeg,
aw ya manga bata' mayu,
awun pakita' ku kanilan,
aw ya manga bakleg mayu,
un ku silan patagaynepen.
18 Aw pangkay ya kanak manga sugu-unun na eseg aw bubay,
asag ku kanilan ya kanak Ispiritu,
aw ubat-ubat nilan ya tingeg ku.
19 Magpakita' aku sa madég na pangilala adti langit
aw manga pangilala asini tas na lupa':
Kita͡en ya dugu' aw atulun
aw ebel-ebel na madakmel.
20 Ya sega magkangitngit,
aw ya bulan iman mu aw dugu'.
yeiy alag ya un mangka-imo' adti allaw
na agpet da ya pagdateng na Tyumanem,
aw yan ya allaw na to-o madyaw
aw wala' ya maka-unawa.
21 Aw yan saba ya ma-imo',
na pangkay singalan ya manginayu' adti Tyumanem sa kallat nan,
yan ya utaw na paluwa-en lekat adti pagpa-emel-emel nan.’ ” *
22 Migpadeleg si Pédro mig-ubat-ubat kanilan, law nan, “Kay manga kadégan ku na lekat adti buwadbuwad ni Isra-él, * pakanyegi mayu ya tingeg ku! Ya Tyumanem ya migpa-ede' kanaten na si Jisus na taga Nasarit, yan ya pigpadala nan asini kanaten, aw kya-ede-an mayu kay pigmatinaw nan adti kamayu magi sa madég na manga pangilala aw manga mangkadyaw na imo-unun na mabatug olo' na katulus na Tyumanem. 23 Aw si Jisus yeiy, dadan da na Tyumanem pigpalpa na un nan atag adti kamayu, aw kya-ede-an da nan dadan na un mayu tumanen ya pigpalpa nan, kay pigtumbay mayu si Jisus adti manga utaw na wala' paka-ede' sa Uldin na Tyumanem, aw silan ya migkalabu kanan adti krus aw yanagaw kamu ya migpapatay kanan. 24 Manang pigmataw sakanan na Tyumanem aw pigpaluwa' dun ni pagti-is sa pagkamatay nan, kay wala' kabatug si Jisus katageni adti nyangkamatay. 25 Kay awun pigsulat ni Dabid asini muna na nyatuman dun ni kan Jisus:
‘Gayed ku pigkita' ya Tyumanem,
kay dun da sakanan adti kalintu ku
pada dili' aku ma-inang-inang.
26 Yanagaw to-o aku migleya,
aw ikaw, kay Tyumanem, ya pigdeyen ku.
Aw kya-ede-an ku uman na pangkay matay pa ya lawas ku
manang awun pa imanen,
27 kay dili' mu pabaya-an adti kan Kaludukan
ya kalaluwa ku,
aw ya Sugu-anen mu na un mu padala,
dili' mu tumbay na malandak ya lawas nan adti lebeng.
28 Pigpa-ede' da mu kanak ya un ku agiyan
pasinan ni ginawa na wala' ya katigkasan,
aw to-o aku nyatmu' na pagleya
kay gayed kaw awun ni sayid ku.’ * ”
29 Miglong pa si Pédro kanilan, “Kay manga kadégan ku na buwadbuwad ni Isra-él, matinaw saba ya piglong ku kamayu sa tyugbulan tadun asini muna na si Dabid. Nyatay da sakanan aw piglebeng, aw kenne' pa na piglebengan kanan asini kanaten. 30 Yanagaw asuntu na si Dabid sambuk na propita, kya-ede-an da nan na pigsapa-an sakanan na Tyumanem na ya sambuk na buwadbuwad nan un na Tyumanem pa-ingkudun adti trono na paghari' nan. 31 Aw asuntu na kya-ede-an ni Dabid ya un dumateng, pigsulat nan ya pagkataw na Kristu lekat adti pagkamatay. Aw matinaw saba ya pigsulat nan na wala' na Tyumanem pabaya-i ya kalaluwa ni Jisus adti kan Kaludukan, aw wala' kalandak ya lawas nan adti lebeng.
32 “Si Jisus yeiy, pigmataw da saba na Tyumanem! Aw pagkatigkas na pagkataw nan, kyinita' na kadég nami. 33 Aw pigpatas da ya dengeg nan dun ni kalintu na Tyumanem adti tas na langit. Aw siling na pigpakang na Ama nan,* pig-atag nan kan Jisus ya Ispiritu nan, aw yan uman ya pig-asag da ni Jisus adti manga utaw. Aw ya kadég na kyinita' mayu aw dyengeg mayu kakayna, alag yeiy nya-imo' magi sa katulus na Ispiritu nan. 34 Kay beke' ni Dabid ya nya-engat adti tas na langit, manang yeiy ya pigsulat nan asini muna, law nan,
‘Miglong ya Tyumanem * adti kanaken pangulu,
“Ingkud kaw adti kalintu ku
35 taman na mabus ku degen ya kanmu manga po-on
aw imo-un ku silan gina-anan na siki mu.” *’ 36 Yanagaw kamu na buwadbuwad ni Isra-él, paglongun ta kamu na si Jisus na pigpakalabu mayu adti krus, yan saba ya pigpadala na Tyumanem aw pig-imo' nan Kristu aw pangulu tadun.”
37 Pagdengeg da na manga utaw sa ubat-ubat ni Pédro, pigkasakitan ya ginawa nilan, yanagaw nyusip silan kan Pédro aw manga eped na apostolés, law nilan, “Kay manga inulug, wan ya un nami imo-un?”
38 Aw tyumubag si Pédro kanilan, law nan, “Ya tag sambuksambuk kamayu, selseli ya manga sala' mayu aw pagpaba͡utismu kamu dun ni ngalan ni Jisus Kristu, aw lanasen na Tyumanem ya manga sala' mayu, aw atagan kamu nan na kanan Ispiritu. 39 Kay yan ya pigpakang na Tyumanem kanaten, na atag nan ya kanan Ispiritu adti kanaten aw manga buwadbuwad tadun aw pangkay adti manga utaw na Héntil, taman na kadég na utaw na magpakanyeg sa tawag nan aw mangintu-u aw ma-imo' kanan manga utaw.”
40 Madég pa ya pigpalna-u ni Pédro kanilan dun ni allaw na Péntékostés, aw nyanginayu' sakanan sa manga utaw na magselsel silan, law nan, “Paluwa-a mayu ya kamayu pagka-utawun pada dili' kamu pa-emel-emelen na Tyumanem siling na manga malat na utaw adun na manga allaw yeiy.”
41 Aw dun ni allaw yan, awun manga tulummalalan na nyangintu-u la sa piglong ni Pédro, aw pigba͡utismuwan silan aw nyaka-akup da adti manga eped na mangintu-uway dun. 42 Aw ya manga bagu na mangintu-uway, gayed nyatibulluk ya pagpakanyeg nilan sa palna-u na manga apostolés, aw migsambuk silan migkatipun, aw migsambuk uman silan kyuman, * aw migsambuk sa pagpanawagtawag adti Tyumanem.
Ya pagkatipun da na manga mangintu-uway
43 Aw pigpan-imo' na manga apostolés ya madég na pangilala aw mangkadyaw na imo-unun magi sa katulus na Tyumanem. Aw yanagaw kyadugangan ya pagkallek sa Tyumanem adti anenganeng na manga utaw. 44 Aw gayed migpangkatipun ya kadég na manga mangintu-uway, aw pigsambuk nilan ya manga pametang nilan. 45 Aw piggalin ya manga lupa' aw manga ka-unan nilan pada awun kuwalta na un atag adti manga eped nilan na migkapelek. 46 Aw kada allaw migkatipun ya mangintu-uway adti pamanag na Témplo na Tyumanem, aw gayed silan migsambuk kyuman adti manga balay nilan na to-o migleya, 47 aw gayed nilan pigdeyen ya Tyumanem. Aw pigsaya' silan na kadég na utaw. Aw kada allaw pigdugang na Tyumanem adti kanilan ya manga utaw na pigpaluwa' nan asuntu na nyangintu-u la kan Kristu.