3
1 Kay manga inulug ku dun ni probinsiya na Galacia, ayin da pakabetang ya anenganeng mayu? Singan ya migbelengbeleng kamayu na maka-agad kamu sa Uldin aw katanem na manga Judiyu? Kay mabangal to-o ya pigpa-ede' ku kamayu idtu muna aw ya kakawasan na pagkamatay ni Jisus Kristu na yan ya kalyu kamayu adti krus. 2 Na, awun usip ku kamayu: Ayin mayu kadawat ya Ispiritu na Tyumanem, dun ni pagdalug mayu sa Uldin, aw adti pagpangintu-u mayu kan Kristu? 3 Ayin da pakabetang ya anenganeng mayu? Idtu muna, sa bagu pa kamu nyangintu-u, gayed kamu syumalig sa tabang na Ispiritu na Tyumanem, manang adun da, yan da ya syaligan mayu baling ya kamayu pagka-utawun. 4 Kun syaligan mayu ya kamayu pagka-utawun, syapadan ya kadég na pamulayam na kya-agiyan mayu * asuntu sa pagpangintu-u mayu. Manang dili' mayu galu kasapadan! 5 Usipen ta kamu: Unu ya du-an nan na pig-atag na Tyumanem kamayu ya Ispiritu nan aw pigpan-imo' nan adti kamayu ya manga imo-unun na mabatug olo' magi sa katulus nan? Asuntu ka' na dyumalug kamu sa uldin aw katanem na manga Judiyu? Ya tubag ku: Beke' nan! Pig-imo' nan ya kadég yeiy asuntu na migpakanyeg kamu sa madyaw na ubat-ubat kan Kristu aw nyangintu-u la kamu kanan.
6 Anenganenga mayu si Abraham asini muna. yeiy ya pigpasulat na Tyumanem, law nan, “Nyangintu-u la si Abraham sa manga pakang na Tyumanem, aw yan da ya pigsaligan nan ya Tyumanem. Aw pigdawat da sakanan na Tyumanem siling na wala' ya sala' nan.” * 7 Aw maynan uman kamu, kun pigsaligan mayu ya tingeg na Tyumanem siling ni Abraham asini muna, nya-imo' kamu tengteng buwadbuwad ni Abraham. 8 Miglong ya Tyumanem dun ni pigpasulat nan asini muna na pangkay ya manga utaw na beke' na Judiyu un nan dawaten kun mangintu-u silan kanan. Dadan da nan piglong kan Abraham ya madyaw na ubat-ubat, law nan, “Asuntu na nyangintu-u la kaw sa kadég na piglong ku kanmu, ikaw ya pag-agiyan na kadyawan ku na un ku atag sa kadég na manga utaw asini tas na lupa'.” * 9 Aw nyangintu-u si Abraham sa piglong na Tyumanem kanan aw yanagaw pigpakadyaw sakanan na Tyumanem. Maynan uman ya adun, kun awun utaw na mangintu-u sa piglong na Tyumanem, pakadyawun uman sakanan na Tyumanem.
10 Manang ya kadég na utaw na pigsaligan nilan ya pagtuman nilan sa Uldin aw manga katanem na manga Judiyu pada dawaten silan na Tyumanem, pa-emel-emelen nan silan baling. Kay pigpasulat da nan, law nan, “Pa-emel-emelen agaw na Tyumanem ya utaw na dili' magtuman sa kadég na sugu' dun ni Uldin nan.” * 11 Aw pigbangal da uman na Tyumanem na wala' ya utaw na un nan dawaten asuntu sa pagdalug nilan sa Uldin. Kay pigpasulat da nan, law nan, “Ya manga utaw na syumalig kanak, pigdawat ku silan kasiling na wala' da ya sala' nilan, aw silan ya un meya' adti sayid ku na wala' ya katigkasan.” * 12 Kun awun utaw na makatuman sa kadég na sugu' dun ni Uldin, wala' ya katukanan nan saligan ya pig-imo' ni Kristu, kay wala' ya sala' nan. Aw pigpasulat da na Tyumanem asini muna, law nan, “Ya utaw na makatuman da sa kadég na sugu' dun ni Uldin aw wala' ya sala' nan pangkay sambuk, yan ya utaw na un atagan na ginawa na wala' ya katigkasan.” * 13 Manang kya-ede-an da tadun na wala' ya utaw na makabatug magtuman sa kadég na sugu' na Uldin, pangkay sambuk. Yanagaw ya un tadun galu datengan ya mangkamatay aw ka-eletan kitadun adti Tyumanem. Manang miglekat da si Kristu kanaten magi sa pagpakamatay nan adti krus * aw yan ya migkalyu kanaten. Kay pigpasulat na Tyumanem asini muna, law nan, “Kun awun utaw na pigpapatay magi sa pagtati' adti tas na kawuy, yan ya pangilala na pigpa-emel-emel sakanan na Tyumanem.” * 14 Aw dun ni pig-imo' ni Kristu Jisus adti krus, dyumateng da adti kadég na manga utaw na beke' na Judiyu ya kadyaw na Tyumanem idtu na pigpakang nan kan Abraham asini muna. Aw migpakamatay da si Jisus na migkalyu kanaten, aw kun mangintu-u kitadun kanan, un meya' ya Ispiritu na Tyumanem * adti ginawa tadun siling na pigpakang nan.
Dili' mag-unawa ya tud na Uldin aw ya pakang na Tyumanem
15 Kay manga inulug ku na nyangintu-u, anenganenga mayu ya katanem na utaw. Simpan na awun duwa ya utaw na mig-imo' sa pakang aw dayaw nilan pigpirma͡an, wala' da ya un maka-uman san. Kun maynan ya pakang na utaw, to-o pa ya kana Tyumanem pakang. 16 Asini muna, pigpakangan na Tyumanem si Abraham aw sambuk na buwadbuwad nan. Kya-ede-an tadun dun ni pigpasulat na Tyumanem na beke' na madég na buwadbuwad nan ya pigpakangan, manang sambuk da olo' baling aw yan si Kristu. * 17 To-o ku kamayu bangalen ya kakawasan yeiy: Mig-imo' ya Tyumanem sa pakang kan Abraham na dayaw mig-iganget na dili' mabugtu'. Pagkatigkas yan, lyumabay da ya upateng gatus aw katluwan ya umay taman na allaw na pig-atag na Tyumanem ya Uldin adti kan Moysis. Nyaka-una ya pakang na Tyumanem aw nyakamoli ya Uldin, yanagaw wala' kabatug na Uldin ya pag-uman sa pakang na Tyumanem kan Abraham asini muna, kay pangkay unu ya pigpakang na Tyumanem, un nan saba alag tumanen. 18 Na, ya kallat kamayu na Tyumanem beke' na asuntu sa pagdalug mayu sa Uldin, manang asuntu na pigpakangan da kamu nan, siling ni Abraham na pigpakangan na Tyumanem sa ginawa na wala' ya katigkasan asuntu sa kallat kanan.
19 Pagaw awun utaw musip, long nan, “Kun wala' ya labet na Uldin dun ni pagpakadyaw na Tyumanem kan Abraham, na, wan saba ya tud na Uldin?” Tumubag aku kanan, long ku, “Pig-atag na Tyumanem ya Uldin pada ka-ede-an ya sala' tadun aw tagenan na manga utaw ya malat na imo-unun nilan.” Manang ya Uldin migdumala sa manga utaw taman olo' na allaw na dyumateng si Kristu na sambuk na buwadbuwad ni Abraham. Aw sa pag-atag na Tyumanem sa Uldin, si Moysis aw ya manga sugu-anen na Tyumanem lekat adti tas na langit, silan ya migkagun kanan adti manga utaw. 20 Manang pag-atag na Tyumanem sa pakang kan Abraham, wala' ya migkagun kanilan. Sayda nan olo' ya migpakang kan Abraham, aw yan ya pangilala na matas pa ya pakang nan kay sa Uldin.
21 Pagaw iman mayu aw sangkamulu' ya Uldin na pig-atag na Tyumanem kan Moysis aw sangkamulu' ya pakang nan adti kan Abraham. Manang beke' nan, kay mig-iguyud ya pakang aw ya Uldin. Aw ya tud nilan olo' ya wala' pag-unawa. Kay kun atagan ya manga utaw na uldin na mabatug nilan tumanen aw dun da silan atagi na ginawa na wala' ya katigkasan, na, mabatug uman dawaten na Tyumanem ya manga utaw asuntu sa pagtuman nilan sa uldin yeiy. 22 Manang miglong ya Tyumanem dadan adti pigpasulat nan na kyaliputan da ya kadég na manga utaw na manga sala' nilan, aw yan ya syampetan nan, wala' kabatug na manga utaw tumana ya kadég na sugu' dun ni Uldin. Yanagaw ya kadég na pigpakang nan * asini muna un olo' atag adti manga utaw na nyangintu-u kan Jisus Kristu.
23 Asini muna, wala' pa kitadun pa-ede-a na Tyumanem na mabatug kitadun nan atagan na ginawa na wala' ya katigkasan magi sa pagpangintu-u tadun kan Jisus. Aw yanagaw ya Uldin yan ya migkalabusu kanaten, kay yan ya palangad magbabantayay na migtunggu' kanaten aw wala' tadun kabatug ya pagluwa' taman na dyumateng si Kristu. Manang adun da, pigpa-ede' da na Tyumanem kanaten ya pa-agi na un kitadun nan dawaten, aw yan ya pa-agi na pigpangintu-uwan tadun ya pig-imo' ni Jisus Kristu kanaten. 24 Siling na manggagatay na pigtaliguwan sa mangayse', yan ya migpitul kanilan. Maynan uman ya Uldin. Kay ya Uldin yan ya pigtaliguwan kanaten taman sa allaw na dyumateng si Kristu. Pagdateng da ni Kristu, mabatug da kitadun dawaten na Tyumanem kun mangintu-u kitadun kanan. 25 Aw nyangintu-u la saba kitadun kan Kristu, yanagaw wala' da ya katundanan na Uldin kanaten.
26 Kay ya kadég mayu ise' na Tyumanem magi sa pagpangintu-u mayu sa pig-imo' ni Kristu Jisus, aw dun da kamu pakasambuk kan Kristu. 27 Aw sa pagba͡utismu kamayu, yan ya palangad pagsut mayu kan Kristu kay nyakasambuk da kamu kanan. 28 Aw yanagaw, wala' ya du-an mayu miman na ya Tyumanem migkibang sa manga utaw. Kay adti kanan anenganeng alag mig-unawa ya manga utaw, pangkay Judiyu aw beke' na Judiyu, pangkay allang aw beke' na allang, pangkay eseg aw ka͡ubayan. Alag kamu migsambuk da magi sa pagpangintu-u mayu kan Kristu Jisus. 29 Aw asuntu na kasakupan da kamu ni Kristu, nya-imo' da kamu buwadbuwad ni Abraham aw kamu uman ka-atagan sa pigpakang na Tyumanem kan Abraham asini muna.